ތިލަމާލެ ބްރިޖުގެ 52.44 ޕަސަންޓު މަސައްކަތް ނިމިފައިވާ ކަމަށް ހައުސިން މިނިސްޓްރީން ބުނެފިއެވެ. 

ހައުސިން މިނިސްޓްރީން ބުނީ، މި މަހުގެ 15 ވަނަ ދުވަހުގެ ނިޔަލަށް ތިލަމާލެ ބުރިޖު މަޝްރޫއުގެ 52.44 ޕަސަންޓު މަސައްކަތް ނިމިފައިވާ ކަމަށާއި މިހާރު ކުރިއަށްދަނީ ޕައިލް ކެޕް، ޕިއާ ކޮލަމްސް އެޅުމުގެ މަސައްކަތާއި ސުޕަ ސްޓްރަކްޗާގެ ސެގްމެންޓްސް ލޯންޗިން މަސައްކަތް ކަމަށެވެ.

ޖުމްލަ 6.7 ކިލޯމީޓަރުގެ ތިލަމާލެ ބުރިޖު ތަރައްގީކުރަން މިހާތަނަށް 251 މިލިއަން ޑޮލަރު ހަރަދުވެފައިވާ ކަމަށް ހައުސިން މިނިސްޓްރީން ބުންޏެވެ. 

ރާއްޖޭގައި އިންޑިއާއިން ހިންގާ އެންމެ ބޮޑު މަޝްރޫއު، ތިލަމާލެ ބުރިޖު މަޝްރޫއު ދެ އަހަރުގެ ތެރޭގައި ނިންމުމަށް އެފްކޮންސްއާ އެކު ސޮއިކުރީ 2021 ވަނަ އަހަރުގެ އޮގަސްޓު މަހުގެ ތެރޭގައެވެ. އެއީ އިންޑިއާ ސަރުކާރުގެ 100 މިލިއަން ޑޮލަރުގެ ހިލޭ އެހީ އަދި 400 މިލިއަން ޑޮލަރުގެ ލައިން އޮފް ކްރެޑިޓުގެ ދަށުން ހިންގާ މަޝްރޫއެކެވެ. އެ މަޝްރޫއުގެ އަމަލީ މަސައްކަތް ފަށާފައިވަނީ 2022 ވަނަ އަހަރުގެ އޮގަސްޓް މަހުގެ ތެރޭގައެވެ.

ތިލަމާލެ ބްރިޖް ޕްރޮޖެކްޓްގެ މަސައްކަތް ނިންމާ ސަރުކާރާ ހަވާލުކުރުމަށް ކަނޑައަޅައިފައިވަނީ އަންނަ އަހަރުގެ ސެޕްޓެމްބަރުގެ ނިޔަލަށެވެ.