ފަތުރުވެރިކަމަށް ކުއްޔަށް ދީފައިވާ ތަންތަނުން އެންމެ ގިނައިން ޓޫރިޒަމް ބިމުކުލި ދެއްކީ މިދިޔަ އަހަރު ކަމަށް ތަފާސް ހިސާބުތަކުން ދައްކައިފި އެވެ.

މީރާއިން އާއްމުކޮށްފައިވާ ހިސާބުތައް ދައްކާގޮތުން ފާއިތުވި 10 އަހަރުތެރޭ އެންމެ ގިނައިން ޓޫރިޒަމް ބިމުކުލި ދެއްކި އަހަރަކީވެސް މިދިޔަ އަހަރެވެ. 

މޯލްޑިވްސް އިންލެންޑް ރެވެނިއު އޮތޯރިޓީ (މީރާ) މައުލޫމާތުތަކަށް ބަލާއިރު މިދިޔަ އަހަރު ޓޫރިޒަމް ބިމު ކުލީގެ ގޮތުގައި ދައުލަތަށް ޖުމްލަ ދެ ބިލިއަން ރުފިޔާ ލިބިފައިވާއިރު އެ އަދަދަކީ ކުރީ އަހަރު ލިބިފައިވާ 1.8 ބިލިއަން ރުފިޔާއާ އަޅާބަލާއިރު ބޮޑު އިތުރުވުމެކެވެ. 

ތަފާސްހިސާބުތައް ދައްކާ ގޮތުގައި މިދިޔަ 10 އަހަރަށް ބަލާއިރު އެވްރެޖުކޮށް އެންމެ މަތިން ޓޫރިޒަމް ބިމުކުލީގެ ގޮތުގައި ލިބިފައިވަނީ 1.6 ބިލިއަން ރުފިޔާ އެވެ.

އަދި ބިމުކުލީގެ އާމްދަނީ ބަޖެޓުގައި ލަފާކުރި މިންވަރަށްވުރެ ބޮޑު ތަނުން އިތުރުވެފައިވާއިރު ރިސޯޓްތަކުން ކުލި ދެއްކުމުގައި ކުރިން އުންމީދު ކުރި ވަރަށްވުރެ ރަނގަޅު ނަތީޖާއެއް ފެނުމެވެ.