މި އަހަރުގެ މާޗް މަހުގެ (ރޯދަ މަހުގެ) ކަރަންޓު ބިލުގެ އިތުރުން، އޭޕްރިލް މަހުގެ ކަރަންޓު ބިލުން ވެސް ސްޓެލްކޯއިން ޑިސްކައުންޓު ދީފިއެވެ.

ރޯދަ މަހުގެ ޑިސްކައުންޓު ކަރަންޓު ބިލާއި މިދިޔަ މަހުގެ ކަރަންޓު ބިލު، އެއް އަދަދެއްގައި ހުރުމުން ގިނަ ބަޔަކު ވަނީ ސޯޝަލް މީޑިއާގައި އެކަމާ ކަންބޮޑުވުން ފާޅުކޮށް ސުވާލު ކޮށްފައެވެ.

މިކަމާ ގުޅިގެން ސްޓެލްކޯއިން މިއަދު ނެރުނު ބަޔާނެއްގައި ބުނީ، މާޗް މަހުގެ ދުވަސްތައް ނިމުމަށް ފަހު، އޭޕްރިލް މަހުގެ ބިލްތަކުން ވެސް ޑިސްކައުންޓު ދިނީ އޭޕްރިލް މަހަކީ ވެސް ހޫނު ގަދަވުމުގެ ސަބަބުން އާންމުކޮށް ކަރަންޓު ބިލުތައް ވަރަށް ބޮޑުވާ މަހަކަށް ވާތީ ރައްޔިތުންނަށް އިތުރު ލުޔެއް ދިނުމަށް ކަމަށެވެ.

އެހެންކަމުން އޭޕްރިލް މަހުގެ ކަރަންޓު ބިލު ކަސްޓަމަރުންނަށް ފޯރުކޮށްދިންއިރު އޭގައިވާ "ކަރަންޓު ބޭނުންކުރެވުނު ވަރު" ކުރީ މަހާއި ތަފާތުވި ނަމަވެސް، ބައެއް ބިލުތަކުގައި ބިލަށް ފައިސާ ކުރެވުނު އަދަދު ރޯދަ މަހުގެ ބިލާއި ސީދާ އެއް އަދަދެއްގައި އޮތީ އެފަދައިން ލުއިދީފައިވާތީ ކަމުގައި ވެސް ސްޓެލްކޯ އިން ބުންޏެވެ.