މުހައްމަދު ޝަމްއާން ވަހީދަކީ އިމިގްރޭޝަންގެ ހިދުމަތްތެރިއެކެވެ. އުމުރުގެ ބޮޑު ބައި ހޭދަކުރެއްވީ އެ ތާނގަ އެވެ. ދޮޅު ދަހަރު ހޭދަކުރައްވާފައިވަނިކޮށް ކުރީގެ ސަރުކާރުން އޭނާ ވަޒީފާއިން ކަނޑައިލީ، ރައީސް އަބްދުﷲ ޔާމީނަށް ތާއީދުކުރައްވާ ކަމަށް ސޯޝަލް މީޑިއާގައި ލިޔުއްވި ޕޯސްޓަކުންނެވެ.

އެހެން ނަމަވެސް އޭނާގެ އެނބުރި އައުންވީ ތާރީހުގެ ފަތްފޮތްތަކުގައި ވެސް ލިޔެވޭނެ ވަރުގެ ކަމަކަށެވެ. އަނބުރާ އިމިގްރޭޝަނަށް ވަޑައިގަތީ، ކުރިން ހުންނެވި މަގާމަކަށް ވެސް ނޫނެވެ. ހަވާލުވެވަޑައިގެންނެވީ ސީދާ އިމިގްރޭޝަން ހިންގެވުމަށެވެ. އިމިގްރޭޝަންގެ ކޮންޓްރޯލަރުގެ މަގާމަށް ޝަމްއާން އައްޔަންކުރެއްވީ ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތްތާ ތިން ދުވަސް ވެސް ނުވަނީހެވެ.

ދެން ޝަމްއާން ފެނުނީ ހީރޯއެއް ފަދަ ގޮތަކަށެވެ. ގިނަ ބަޔަކަށް އޭނާވީ ހަމަ ބަތަލަކަށެވެ.

އިމިގްރޭޝަން ކިޔާ ތަނެއް މި ގައުމުގައި އޮތް ކަން އިހުސާސް ކުރެވޭ ވަރުވީ ދެނޭ ބުނެވިދާނެ އެވެ. ގަވާއިދާ ހިލާފަށް އުޅޭ ބިދޭސީން ހޯދަން މާސް ރެއިޑްތައް ހިންގި އެވެ. ކުށުގެ ވެށީގައި ތަކުރާރުކޮށް އުޅޭ ބިދޭސީން ޑީޕޯޓްކުރަން ފެށި އެވެ. ދިވެހިންގެ ބަޔަކު ތިބެގެން ނަމަވެސް ބިދޭސީން އެތެރެކޮށްގެން ހިންގަމުން ދިޔަ ކުށުގެ ނެޓްވޯކްތައް ހުއްޓުން އަރާ ވަރަށް ބިދޭސީން ހިފަހައްޓައި، ޑިޓެއިންކޮށް، ފޮނުވަމުން ދިޔަ އެވެ. ހަށި ވިއްކުމާއި، ޑްރަގާއި، ނުތާހިރު ގޮތަކަށް ހަދަމުން ދިޔަ ކާބޯތަކެތީގެ ތަންތަން ހޯދަމުން ދިޔަ އެވެ.

މައްސަލަ މޫލާފައި އޮތް ވަރު އާންމުންނާ ހަމައަށް ތިލަވެ، ޝަމްއާނަށް ގިނަ ތައުރީފުތައް އިހަށް ދުވަހަކާ ހަމައަށް ވެސް ދިޔައީ އޮހެމުންނެވެ.

އެކަމަކު މިދިޔަ ބުރާސްފަތި ދުވަހުގެ ދަންވަރު ޝަމްއާން ވަކިކޮށް، ރޭ (ހުކުރު ދުވަހުގެ ރޭ) ހައްޔަރުކުރުމާ ހިސާބުން މަންޒަރު ތަފާތުވެއްޖެ އެވެ. ސޯޝަލް މީޑިއާގައި 'ސަމާސަ' އެންމެންގެ ކަމަކަށް އޮތީ ޝަމްއާނަށް ހަޖޫ ޖެހުމެވެ.

ބަންގްލަދޭޝްގެ ނޫހަކުން ވެސް ޝަމްއާން ވަކިކުރި ހަބަރު ރިޕޯޓްކުރުމުން، އެ ވެސް ދިވެހިންގެ ސަމާލު ކަމަށް އައިސް ސޯޝަލް މީޑިއާގައި ދަނީ ޕޯސްޓްކުރަމުންނެވެ.

ސަރުކާރަށް ތާއީދުކުރާ ފަރާތްތަކުން ދަނީ 'ރައީސް މުއިއްޒަށް ޝުކުރިއްޔާ ޕޯސްޓްތައް ހަދަމުންނެވެ. ޝަމްއާންގެ ގެއިން ބައި މިލިއަނަށް ވުރެ ގިނަ ރުފިޔާ ފެނި، އެއީ ބިދޭސީއަކު ދޫކޮށްލަން ރިޝްވަތަށް ނެގި ފައިސާ ކަމަށް ފުލުހުން ކުރި ތުހުމަތާއެކު، ސަރުކާރުގެ ސަޕޯޓަރުން ދެކެނީ މިއީ ކޮރަޕްޝަނަށް ރައީސް ގެންގުޅުއްވާ މޫނެއް ކަނދުރާއަކަށް ނުބެލުމުގެ ސިޔާސަތެވެ. ޒީރޯ ޓޮލެރެންސް ޓު ކޮރަޕްޝަނެވެ.

އެ މީހުން ދެކޭ ގޮތުގައި އިމިގްރޭޝަންގެ ހިންގުންތެރިކަން ފެނުނީ ސަރުކާރުގެ ސިޔާސަތުތަކުގެ ސަބުންނެވެ، ރައީސް މުއިއްޒުގެ ހިކުމަތްތެރިކަމެވެ. ޝަމްއާން ނެތަސް އަދިވެސް ޝަމްއާން ބަތަލެއް ގޮތުގައި ދެކޭ މީހުން ވެސް މަދެއް ނޫނެވެ. ޝަމްއާން ދޫކޮށްލަން ގޮވާލާ ޕޯސްޓްތައް ވެސް އެބަ ފެނެ އެވެ.

ކޮންމެ ގޮތެއް ވިޔަސް ފަތު އަޑު ކިޔާފައި އުދުހެމުން ދިޔަ ޝަމްއާން މި ވަނީ ވަރަ ކޮށާލުމަށް ފަހު، ހަމަ ބިމަށް ތިރިކޮށް، ތޭރިތަކުގެ ފަހަތަށް ގެންގޮސް ލައިފަ އެވެ.