ރާއްޖޭގެ މަޝްހޫރު ރެޕް އާޓިސްޓުންގެ ރެކޯޑް ލޭބަލް ސިމްބޮލިކް ރެކޯޑްސް (އެސްއާރު) އިން ރޭ ސެންޓްރަލް ޕާކުގައި ބޭއްވި ޝޯގައި އާ މޫނެއް ފެނިގެން ދިޔަ އެވެ. އާ މޫނެއް ފެނިގެން ދާނެ ކަން އެސްއާރުން އޮތީ ކުރިން ވެސް އިއުލާންކޮށްފަ އެވެ. 

އެސްއާރުން ފޭނުންނަށް ވީ ވައުދާ އެއް ގޮތަށް ރޭގެ ޝޯގައި އާ އާޓިސްޓް ވަނީ އޭނާގެ ފުރަތަމަ ލައިވް ޕާޕޯމެންސް ހުށަހަޅައިފަ އެވެ.

ޝޯގެ ތެރެއިން އެސްއާރުގެ އާޓިސްޓު މުހައްމަދު އިހުސާން (ޕެންޑާ) ވަނީ އެ ލޭބަލްގެ އާ އާޓިސްޓު ފޭނުންނަށް ތައާރަފު ކޮށްދީފަ އެވެ. ޕެންޑާ ބުނި ގޮތުގައި އެއީ ޕޮޓޭންޝަލް ހުރި އާޓިސްޓެއް އަދި މިއުޒިކް ޕްރޮޑިއުސަރެކެވެ.

އޭނާގެ ނަމަކީ ހައިޝަމް ނަސީރެވެ. 

ހައިޝަމް "ކުރިއަށް މީޑިއާ" އަށް ވާހަކަ ދައްކަމުން ބުނީ މީގެ ކުރިން ލައިވް ޕާފޮމެންސެއް ނުދޭއިރު އެހާ ބޮޑު އޯޑިއެންސަށް ކުރިމަތީގައި ޕާފޯމް ކުރުމަކީ ތަފާތު ތަޖުރިބާއެއް ކަމަށެވެ.

"އެސްއާރު ރެޕްރެޒެންޓް ކުރުން [އެކަނި] ވެސް ވަރަށް ތަފާތު ވާނެ ދޯ. ލައިފް ޗޭންޖިން އެކްސްޕީރިއަންސެއް މިއީ. އަހަރެން ކަހަލަ ބަޔަކާ އަލަށް ދިމާވި ކަހަލަ އިހުސާސެއް ވަނީ," ހައިޝަމް ބުންޏެވެ.

ހައިޝަމަކީ އުމުރުން 15 އަހަރުން ފެށިގެން ލަވަ ޕްރޮޑިއުސް ކުރަމުގައި އުޅޭ ފަންނާނެކެވެ. ވަރަށް ކުޑައިރުން ފެށިގެން ލަވަ ލިޔެ، ގިޓާ ކުޅެމުންދާ ކަމަށް އޭނާ ބުންޏެވެ.