ރަށް ރަށުގައި އެއާޕޯޓް އެޅުން މިހާރު ވަނީ ވާދާއަކަށްވެފަ އެވެ. ރައީސް ޑރ. މުހައްމަދު މުއިއްޒު ވަޑައިގަންނަވާ ދަތުރުުތަކުގައި އެއާޕޯޓަށް ރައީސް އަރިހު ރަށްރަށުގެ އެދޭ ވާހަކަ އެމަނިކުފާނު ގެންދަވަނީ ފާހަގަކުރައްވަމުންނެވެ. 

އެގޮތުން އެންމެ ގިނަ އެއާޕޯޓް ފެންނާނެ އަތޮޅަކަށް ށ. އަތޮޅުވުން ވަނީ ގާތްވެފަ އެވެ. ށ. އަތޮޅުގައި މިހާރު އެއާޕޯޓެއް އޮންނަނީ ހަމައެކަނި ފުނަދޫގަ އެވެ.

ރައީސް މުއިއްޒު ށ. އަތޮޅަށް ކުރައްވާ ދަތުރުފުޅުގެ ތެރެއިން ތިން ރަށެއްގައި ބިން ހިއްކުމާއި އެއާޕޯޓްގެ އަމަލީ މަސައްކަތް ހަވާލުކުރީ އެމްއޭސީއެލްއަށެވެ.

ދެން އެ އަތޮޅުގައި އެއާޕޯޓް އަޅާ ރަށްތަކަކީ:

• ށ. މިލަންދޫ
• ށ. ކޮމަންޑޫ
• ށ. ބިލެތްފަހި

ކޮމަންޑޫ އެއާޕޯޓު އެޅުމުގެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ ފިނޭންސް މިނިސްޓަރު މޫސާ ޒަމީރެވެ. އަދި އެމްއޭސީއެލްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އިބްރާހިމް ޝަރީފު މުހައްމަދެވެ.

މިލަންދޫގައި ރިޔާސީ އިންތިހާބުގައ ރައީސް މިލަންދޫ އަށް ވެވަޑައިގެންނެވި އެންމެ ބޮޑު ވައުދަކީ ރައްޔިތުން އެދުނު ގޮތަށް އެ ރަށުގެ އެއާޕޯޓު ހަގީގަތަކަށް ހައްދަވައިދެއްވުމެވެ. އެ މަސައްކަތުގެ އަމަލީ މަސައްކަތް މިއަދު ވަނީ ފަށާފަ އެވެ. 

އެ އެއާޕޯޓަށް ބޭނުންވާ ބިން ހިއްކުމުގެ އަމަލީ މަސައްކަތް ފައްޓަވައިދެއްވީ ފިނޭންސް މިނިސްޓަރު ޒަމީރެވެ.

ބިލެތްފަހީގަައި އަޅަން ނިންމާފައިވާ އެއާޕޯޓުގެ އަމަލީ މަސައްކަތް އެމްއޭސީއެލާ ހަވާލުކޮށް އަދި އެ މަސައްކަތް މިއަދު އަލުން ފަށާފައިވާއިރު އެ އެއާޕޯޓަށް ބޭނުންވާ 56.34 ހެކްޓަރުގެ ބިން ހިއްކުމުގެ މިދިޔަ ސަރުކާރުގެ ދުވަސްވަރު ވެސް އެމްޓީސީސީއާ ހަވާލުކުރި އެވެ. ނަމަވެސް އެ ވެރިކަން ނިމުނުއިރުވެސް އެ މަސައްކަތް ނުފެށެ އެވެ.