ސޭޝެލްސްއިން ރާއްޖެއައި ކްރޫޒްލައިނާއަކުން 500 އަށްވުރެ ގިނަ ފަތުރުވެރިން އައިސްފިއެވެ. 

"އެމްއެސް އިންސިގްނިއާ" ކަމަކަށް ކިޔާ އެ ކްރޫޒްލައިނާ ޝޭޝަލްއިން ރާއްޖެ އައީ މި މަހުގެ 8 ވަނަ ދުވަހުއެވެ. އެ ކްރޫޒްލައިނާއިން ރާއްޖެއަށް 576 ފަތުރުވެރިންނާއި 406 ކްރޫއިން ވަނީ ރާއްޖެ އައިސްފައެވެ.

މޯލްޑިވްސް އިމިގްރޭޝަނުން ވަނީ، އެ ކްރޫޒްލައިނާއިން އައި ފަތުރުވެރިންނަށް ކްލިއަރެންސް ދީފައެވެ. 

ޓޫރިސްޓު ސީޒަންގައި ރާއްޖެއަށް އާއްމުގޮތެއްގައި ގިނަ އަދަދެއްގެ ކްރޫޒްލައިނާތައް އާދެއެވެ. މޯލްޑިވްސް އެސޯސިއޭޝަން ފޯ ޔޮޓް އޭޖެންޓްސް (މާޔާ) އިން ބުނެފައިވާގޮތުގައި ރާއްޖޭގެ ޓޫރިސްޓު ސީޒަން ނިމުމުގެ ކުރިން އިތުރު 12 ކްރޫޒް ލައިނާއެއް ރާއްޖެ އައުމަށް ވަނީ ތާވަލުކޮށްފައެވެ. 

ސަރުކާރުން އަންނަނީ، ރާއްޖޭގެ ތިން ސަރަހައްދެއްގައި ކުރޫޒް ލައިނާތަކަށް ހާއްސަ ޖެޓީތަކެއް ތަރައްގީކުރުމަށް މަސައްކަތް ކުރަމުންނެވެ.