ސަރުކާރު ހަރަދުގައި، ހައްޖަށް ދިއުމުގެ ގާބިލްކަން ނެތް 1000 'ފަގީރުން' ހައްޖަށް ފޮނުވުމަކީ ރައީސް މުހައްމަދު މުއިއްޒުގެ ރިޔާސީ ވައުދެކެވެ. އެ ވައުދު ގެންދަވަނީ ވެސް ފުއްދަވަމުންނެވެ.

މިދިޔަ ދެ އަހަރު ޖުމުލަ 100 މީހުން ފޮނުވުމަށްފަހު މި އަހަރު ފޮނުވާނެ 50 މީހުން ވެސް ސަރުކާރުން ވަނީ ކަނޑައަޅައިފަ އެވެ. އެ ކަމާ ގުޅިގެން އަނެއްކާ ވެސް މިއީ ކުރަން ޖެހޭ ކަމެއްތޯ، އެ ބަހުސް ވަނީ ފެށިފަ އެވެ. 

އާންމު އިޖްތިމާއީ މައްސަލަތަކަށް ސޯޝަލް މީޑިއާގައި އިލްމީ ހިޔާލު ފާޅުކުރާ އެކަކީ ޅ. ނައިފަރަށް އުފަން އިސްލާމް ޓީޗަރު އަލީ ހަނޫން "ހުތްއަލި ދީދީ' އެވެ. 

ދިވެހި ވަޒަން ބަހުރުވައިގެ ފުރަތަމަ ޅެންވެރިޔާ ހުތްއަލި ދީދީގެ ދަރިފަސްކޮޅަށް ނިސްބަތްވާ ހަނޫން ދެކޭ ގޮތުގައި މިއީ ސަރުކާރުން ހަރަދުކުރަން ޖެހޭ ކަމެއް ނޫނެވެ.

އަދި މި ފައިސާ މިއަށް ވުރެ މައުނަވީ ގޮތެއްގައި ފައިދާހުރި އެތައް ކަމަކަށް ބޭނުން ކުރެވިދާނެ ކަމަށް ހަނޫން ލިޔެފައިވެ އެވެ. 

ހަނޫން ވަނީ ސަބަބުތަކުގެ ލިސްޓެއް ލިޔެފަ އެވެ؛

• ފަގީރުންނަށް އެންމެ މަސްލަހަތު އޮންނާނީ އެ މީހެއްގެ ހާލަތު ރަނގަޅު ވާނެ އެހީއެއް ދައުލަތުން ފޯރުކޮށްދިނުން 
• ކޮންމެ ފަގީރަކު ހައްޖަށް ފޮނުވަން ހޭދަ ކުރާ 70,000 ރުފިޔާއިން އެ މީހުންގެ ދިރިއުޅުމުގެ މާލީ ހާލަތަށް ހެޔޮ ބަދަލެއް ނާންނާނެ
• ފަގީރުންނަކީ ކޮންމެ މަހަކު ވެސް ދެކޮޅު ނުޖެހިގެން އުޅޭ ބަޔަކަށް ވުމުން ހައްޖަށް ދާ ދުވަސްވަރު އެ މީހުންގެ ބެލުމުގެ ދަށުގައި އުޅޭ މީހުންނަށް ބޭނުންވާ ކަންކަން ހަމަނުޖެހި އިތުރު މައްސަލަތަކެއް ނުކުމެދާނެ
• ހައްޖަކީ މާލީ ގޮތުން ވެސް ކުޅަދާނަ ލިބިގެންވާ މީހުންނަށް ފަރުޟުކޮށްފައިވާ ކަމެއް
• ކޮންމެ އަހަރަކު ފަގީރުން ހައްޖަށް ފޮނުވުން އާދައަކަށްވެ ހައްޖު ފަރުޟު ނޫން މީހުން ހައްޖަށް ފޮނުވުމުގެ ސަގާފަތެއް އުފެދޭނެ
• ހައްޖަށް ދާން ދިވެހިންނަށް އޮންނަ ކޯޓާގެ ދަށުން ހައްޖަށް ދިއުމަށް އެދި ހުށަހަޅައިގެން އިންތިޒާރުގައި އެތައް ބަޔަކު ތިއްބައި ފަގީރުންނަށް ޖާގަތަކެއް ނަގަން ފެށުމުން ކުރިން ކިއޫގައި ތިބި މީހުން އިންތިޒާރު ކުރަން ޖެހުން އިތުރު އަހަރުތަކަކަށް ދެމިގެންދިއުން

މި ފައިސާ ހޭދަކުރަންވީ ގޮތުގެ ހިޔާލެއް ވެސް ހަނޫނު ދިނެވެ. ކޮންމެ ފަގީރަކަށް އެ ވަރުގެ ފައިސާއެއް ޝަރީޢާ ކޮމްޕްލަޔަންޓް އިންވެސްޓްމަންޓެއްގެ ތެރެއިން އިންވެސްޓްކުރެވިގެން އޭގެ ފައިދާ އެ މީހާއަށް އޭނާގެ ފަޤީރުކަން ފިލައިދާންދެން ލިބޭނެ ގޮތަށް ހެދުމެވެ.

ޒަކާތާއި ވަކިން އޮންނަ އެއްޗަކަށް އެ ހެދިދާނެ ކަމަށް އޭނާ ގަބޫލުކުރެ އެވެ.