މަޝްހޫރު ބޮޑުބެރު ގްރޫޕް ސާދަ ތިރީސް އަށެއްގެ މީޑިއާ ޕާޓްނަރަކަށް "ކުރިއަށް މީޑިއާ" ހަމަޖައްސައިފިއެވެ.

އެ ކަމުގެ އެއްބަސްވުމުގައި ސާދަ ތިރީސް އަށެއް ބޮޑުބެރު ގްރޫޕާއި ކުރިއަށް މީޑިއާގެ ފަރާތުން މިރޭ ވަނީ ސޮއިކޮށްފައެވެ. އެ އެއްބަސްވުމުގައި ސާދަ ތިރީސް އަށެއްގެ ފަރާތުން ސޮއިކުރީ އެ ގްރޫޕްގެ މަސްއޫލުވެރިޔާ ޖަޒްލާން ޝަރީފެވެ. ކުރިއަށްގެ ފަރާތުން ސޮއިކުރެއްވީ ކުރިއަށްގެ މަސްއޫލުވެރިޔާ އަހުމަދު އަލީ (އެކްމެޑް) އެވެ. 

އެ އެއްބަސްވުމާއެކު، ސާދަ ތިރީސް އަށެއް ބޮޑުބެރު ގްރޫޕުގެ އެކި ހަރަކާތްތައް ކުރިއަށް މީޑިއާއިން ކަވަރުކުރާނެ އެވެ. އަދި އެ ގްރޫޕް ޕްރޮމޯޓްކުރަން ހާއްސަ މަސައްކަތްތަކެއް ކުރާނެއެވެ.

ސާދަ ތިރީސް އަށެއް ބޮޑުބެރު ގްރޫޕުގެ އަސްލަކީ ބޮޑުބެރަށް ލޯބިކުރާ ޒުވާން ކުދީން ކޮޅެއް 2010 ހިސާބުގައި ބޮޑުބެރު ގްރޫޕެއް ރަޖިސްޓަރީކުރުމުގެ ހުވަފެންތަކާއެކު އުފެދިގެން އައި ހިޔާލެކެވެ. އެއިރު ގްރޫޕް ރަޖިސްޓަރީ ކުރީ "ހަބޭސް"ގެ ނަމުގައެވެ. އެ ނަމުގައި 2016 އާ ހަމައަށް ކުރިއަށް ގޮސް ބޮޑުބެރު ޗެލެންޖުގެ އިތުރުން އެތައް ބޮޑެތި ހަފްލާއެއްގައި ޕާފޯމްކުރުމަށް ފަހު، ހަބޭސް އިން ވަނީ ރާއްޖެއިން ބޭރުގައިވެސް ރާއްޖެ ތަމްސީލްކޮށްފައެވެ. އެއަށް ފަހު 2016 ގައި ހަބޭސްގައި އިތުރަށް ކުރިއަށްދާން ހުރި ހުރަސްތަކުގެ ސަބަބުން ވިއްސަކަށް ކުދިން އެ ގްރޫޕުން ވަކިވެ، އެ އަހަރު ކަމަށްވާ ސާދަސްތޭކަ ތިރީސް އަށްވަނަ އަހަރުގެ ފެށުމާއެކު އާ ގްރޫޕެއްގެ ގޮތުގައި ސާދަ ތިރީސް އަށެއް ވުޖޫދުކުރިއެވެ. ސާދަ ތިރީސް އަށެއްގެ ހަޔާތުން ފާއިތުވި އަށް އަހަރު ދުވަހުގެ ތެރޭގައި ވަނީ ރާއްޖޭގައި ގިނަ އަދަދެއްގެ ޝޯތައް ހުށަހަޅައިދީފައެވެ. އޭގެ ތެރޭގައި ރިސޯޓުތަކާއި ރަށްރަށާއި އެކިއެކި އިވެންޓުތައް ހިމެނެއެވެ. 
 
ސާދަ ތިރީސް އަށެއް ގައި މިހާރު 55 މެންބަރުން ތިބިއިރު، އެ ގްރޫޕުގެ ސްޕޮންސަރުންގެ ގޮތުގައި ޝީޝާ، ދިރާގު ފަދަ ބޮޑެތި ކުންފުނިތައް ހިމެނެއެވެ.