ރަމަޟާން މަހުގެ ފަހު ދިހަ ގައި އިއުތިކާފަށް އިނުމަކީ ގަދަވެގެންވާ ސުންނަތެއްކަމުގައި މިއަދުގެ ހުކުރު ހުތުބާގައި ބުނެފިއެވެ.

މި އަދުގެ ހުކުރު ހުތުބާގައި ވަނީ ލައިލަތުލްޤަދް ރޭގެ ސަވާބު ހޯދުމަށް އަމަލުތައް ބަހައްޓަންވީގޮތުގެ މައްޗަށް ވާހަކަ ދައްކައިފައެވެ. އެގޮތުން ރަމަޟާން މަހުގެ ފަހު ދިހައެއްގައި އިއުތިކާފަށް އިނުމުގެ މުހިންމުކަން ހުތުބާގައި ބަޔާންކުރިއެވެ. 

ހުތުބާގައި ބުނީ، ރަމަޟާން މަހުގެ ފަހު ދިހައެއްގައި އިއުތިކާފަށް އިނުމަކީ ގަދަވެގެންވާ ސުންނަތެއްކަމަށެވެ.

އުއްމުލް މުއުމިނީން އާއިޝާ ރަޟިޔައްﷲއަންހާގެ އަރިހުން ރިވާވެގެންވެއެވެ. "ރަސޫލާ ސައްލަﷲ އަލައިހި ވަސައްލަމަ ދުނިޔެ ދޫކުރެއްވުމާއި ހަމައަށް ރަމަޟާންމަހުގެ ފަހު ދިހަގައި އިއުތިކާފަށް އިންނެވިއެވެ."

ހުތުބާގައި ވަނީ، އިއުތިކާފަށް އިންނަ މީހާގެ އަމަލުތައް ބަހައްޓަންޖެހޭ ގޮތުގެ މައްޗަށްވެސް ވާހަކަ ދައްކާފައެވެ. އެގޮތުން ބޭކާރު ކަންތައްތަކާއި ވާހަކަތަކުން ދުރުހެލިވެ، މާތްﷲއަށް އަޅުކަންކުރުމާއި ކީރިތި ގުރުއާން ކިޔެވުމާއި ޒިކުރު ކުރުމުގައި ގިނަވަގުތު ހޭދަކުރަންވާނެ ކަމަށް ހުތުބާގައި ބުނެފައިވެއެވެ. 

މީގެ އިތުރުން މިސްކިތުގައި ހޭދަކުރާ ވަގުތުތަކުގައި މިސްކިތުގެ ސާފު ތާހިރުކަމަށާއި މިސްކިތުގެ ހުރުމަތަށް އިސްކަން ދޭންވާނެކަމަށްވެސް ހުތުބާގައި ބުނެފައިވެއެވެ. އަދި މިސްކިތުގެ ހުރުމަތަށް ރައްކާތެރިވުމަށް ހުތުބާގައި ނަސޭހަތްތެރިވެފައިވެއެވެ. 

ބިންމަތީގައިވާ އެންމެ މާތް ތަނަކީ، މިސްކިތްކަން ފާހަގަކޮށް، ހުތުބާއި ބުނީ އެއީ މާތްﷲގެ ގެކޮޅު ކަމަށެވެ. 

މި ބަރަކާތްތެރި ރަމަޟާން މަހު އަޅުތަކުންގެ މަށްޗަށް އަދާކުރަން އަމުރުކުރައްވާފއިވާ އެހެން އަޅުކަމެއް ވާކަމަށްވެސް ހުތުބާގައި ބުނެފައިވެއެވެ. އެއީ ފިތުރު ޒަކާތް ދިނުންކަމަށް ބުންޏެވެ. އެގޮތުން ފިތުރު ޒަކާތަކީ ރޯދަ މަހުގެ ރޯދަތައް ހިފިއިރު ކުރެވިފައިހުރި އުނިކަންކަން ފޫބެއްދުން ކަމުގައި ހުތުބާގައި ބުނެފައިވެއެވެ. 

މިއާ ގުޅިގެން "ރޯދައަށް ހުރެ ދެއްކޭ ބާތިލު ވާހަކަތަކާއި، ކުރެވޭ ނުރަނގަޅު ކަންކަމުން، ރޯދަވެރިންނަށް ތާހިރު ކަމެއްގެ ގޮތުގައްޔާއި، މިސްކީނުންނަށް ދެވޭ ކެއުމެއްގެ ގޮތުގައި ރަސޫލުއްﷲ ސައްލައްﷲ އަލައިހި ވަސައްލަމް ފިތުރު ޒަކާތް ފަރުޟު ކުރެއްވެވި ކަމަށް އިބްން އައްބާސް ރަޟިޔައްﷲ އަންހުގެ ކިބައިން ރިވާވެގެންވެފައިވާ ކަމަށް ހުތުބާގައި ބުނެފައިވެއެވެ. 

ހުތުބާ ނިންމާލަމުން ވަނީ ރަސޫލާގެ މައްޗަށް ގިނަގިނައިން ސަލަވާތްކިޔަވައި، މި ބަރަކާތްތެރި ރަމަޟާންމަހުގެ ސަވާބާއި ދަރުމަ ލިބިގަތުމާއި ލައިލަތުލްޤަދް ވިލޭރޭގެ ދަރުމަ ހޯދުމަށް ގަދައަޅައި މަސައްކަތްކުރަން ނަސޭހަތްތެރިވެފައެވެ.