ކުރިން ކުރެވިފައިވާ އަޅުކަންތަކަކީ ގިނަގުނަ ހެޔޮ އަމަލުތަކެއް ކަމުގައި އަހަރެމެން ދެކިގެން ނުވާނެކަމަށާއި ކުރެވިފައިވާ ހެޔޮ އަމަލުތަކަށްޓަކައި އަމިއްލަ ނަފްސަށް ބޮޑާވެ ފަހުރުވެރިވެ އެއީ މާގިނަ ހެޔޮ އަމަލުތަކެއް ކަމުގައި ދެކޭ މީހާގެ ހެޔޮއަމަލުތައް ބާތިލު ވެދާނެކަމަށް މިއަދުގެ ހުތުބާގައި ބުނެފިއެވެ.

މިއަދުގެ ހުތުބާގައި މި މައުލޫއަށް ވާހަކަދައްކަމުން ބުނެފައިވަނީ ކުރެވުނު ހެޔޮކަމެއްގެ މޮޅުކަމުން ނުވަތަ ގިނަކަމުން ސުވަރުގެ ޔަގީންވީކަމަށް އަހަރެމެން ދެކިގެން ނުވާނެ ކަމަށެވެ. އޭގެ ބަދަލުގައި ހެޔޮކަމެއް ކުރެވިއްޖެނަމަ، އޭގެ ފަހުގައި މަސައްކަތް ކުރަންވާނީ އެ ހެޔޮކަންމަތީ ދެމިތިބެވޭކަމަށެވެ. 

މިކަމާ ގުޅޭގޮތުން މިސާލު ޖައްސަވާ ކަހަފް ސޫރަތުގައި ބަޔާންކުރައްވާފައިވާ ދެ ބަގީޗާ ގެންގުޅުނު ދެ ފިރިހެނުންގެ ވާހަކަ ހުތުބާގައި ވަނީ ކިޔައިދީފައެވެ. އަދި އެތަނުން އެކަކުގެ ބޮޑާ ބަސްތަކުގެ ސަބަބުން އޭނާގެ ބަގީޗާ ހަލާކު ކުރެއްވިގޮތުގެ ވާހަކަ ކިޔައިދިނެވެ. މީގެ އިތުރުން ހުތުބާގައި ބުނެފައިވަނީ ﷲ ސުބްހާނަހޫ ވަތައާލާގެ ހަޟްރަތުގައި އެންމެ ލޮބުވެތިކަން ބޮޑު އަމަލަކީވެސް ކިތަންމެ މަދުން ނަމަވެސް ހެޔޮއަމަލެއް ކުރުމުގައި ދެމިހުންނަ މީހާ ކަމަށެވެ. 

މިއާއެކު ނިމިގެން މިދާ ބަރަކާތްތެރި ރަމަޟާން މަހުގައި އެ މީހެއްގެ އަމަލުތައް ހުރި ގޮތާމެދު ވިސްނާލުމަށާއި މި ރަމަޟާން މަހު ފަރުޟު ފަސް ނަމާދު ބަރާބަރަށް ގަވާއިދުން ކުރިގޮތަށް މި މަހަށްފަހުގައިވެސް އެގޮތުގައި ދެމި ހުރުމަށް ހުތުބާގައި ގޮވާލައިފައިވެއެވެ. އަދި ކޮންމެ ދުވަހަކުވެސް ގުރުއާނުން ސަފުހާއެއް ކިޔޭތޯ މަސައްކަތްކުރުމަށާއި، ހެޔޮ އަމަލުތައް ކުރުމުގައި ހީވާގިވުމަށާއި، ކިތަންމެ މަދުން ކުރެވުނު ނަމަވެސް ހުއްޓާނުލާ ކުރިޔަށް ގެންދިއުމަށް މިއަދުގެ ހުތުބާގައި ނަސޭހަތްތެރިވެފައިވެއެވެ. 

މީގެ އިތުރުން ރަމަޟާން މަސް ނިންމުމަށްފަހު އަންނަ ޝައްވާލުމަހުގެ ހަ ރޯދައަށްވެސް ރައްކާތެރިވުމަށް ހުތުބާގައި ނަސޭހަތްތެރިވިއެވެ. ޝައްވާލު މަހުގެ ހަ ރޯދައިގެ ސަވާބު ލިބިގަތުމަށާއި، އެލިބޭ ނިޢުމަތުގެ ބޭނުން ހެޔޮގޮތުގައި ހިފުމަށް ގޮވާލައިފައިވެއެވެ.