މި އަހަރުގެ ފިތުރު ޒަކާތް ބަހަނީ ފަގީރުންގެ ދަފްތަރުގައި ހިމެނޭ ފަރާތްތަކަށް އެއްހަމައަކުން ކޮންމެ ފަރުދަކަށް 4500 ރުފިޔާގެ މަގުންކަމަށް އިސްލާމީ ކަންތައްތަކާއިބެހޭ ވަޒީރު ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ. 

އިސްލާމީ ކަންތައްތަކާއިބެހޭ ވަޒީރު މިހެން ވިދާޅުވެފައިވަނީ ރޭ ސޯސަލްމީޑިއާގައި އާންމުކޮށްފައިވާ ޕޯސްޓެއްގައެވެ. ވަޒީރު ވިދާޅުވެފައިވަނީ މި ބަދަލު ގެނައުމުގެ މަގްސަދަކީ ޒަކާތް ދިނުމުގެ މަގްސަދުތަކުގެ ތެރޭގައި ހިމެނޭ އިޖްތިމާއީ އަދާލަތު ގާއިމުކުރުމުގެ ގޮތުން ކަމަށެވެ. 

މީގެ ކުރިން މިކަން ކުރަމުން އައިގޮތަކީ އެ ރަށަކުން ލިބޭ އެއްޗެއް އެކަނި އެ ރަށެއްގެ ފަގީރުންނަށް ބަހާގޮތަށް ކަމަށާއި، އެގޮތަށް އެކަން ކުރުމުގެ ސަބަބުން ރަށް ރަށުގައި ތިބޭ ފަގީރުންނަށް ލިބެނީ ވަރަށް މަދު އަދަދެއްކަމަށް ވަޒީރު ޝަހީމް ވިދާޅުވެފައިވެއެވެ. 

އިތުރަށް ޝަހީމް ވިދާޅުވެފައިވަނީ މި ގެނެވުނު ބަދަލަކީ ރާއްޖޭގައި ދެވުނު ފިތުރު ޒަކާތުގެ ތާރީހުގައިވެސް ފުރަތަމަ ފަހަރަށް ގެނެވުނު ބަދަލެއް ކަމަށާއި، މި ގެނެވުނު ބަދަލުގެ ސަބަބުން މި އަހަރުގެ ފިތުރު ޒަކާތަށް މިވަގުތާއި ހަމައަށް 12.4 މިލިއަން ދިވެހި ރުފިޔާ ލިބިފައިވާކަމަށް ވަޒީރު ވިދާޅުވިއެވެ. 

ފިތުރު ޒަކާތަކީ ކޮންމެ މުސްލިމެއްގެ މަށްޗަށް ދެއްކުން ވާޖިބުވެގެންވާ އެއްޗެކެވެ. އެބަޔަކު އެ ގައުމެއްގައި އާންމުކޮށް ކައިއުޅޭ ގޮވާމުގެ ބާވަތުން ފިތުރު ޒަކާތް ދެއްކުން ވާޖިބުވެގެންވެއެވެ. އެބަޔަކު އެ ގައުމެއްގައި ކައިއުޅޭ ތަކެތިން ސާއެއްގެ މިންވަރު ނުވަތަ ދެއަތް ގޮށިން ނެގޭ މިންވަރަކަށް ފިތުރު ޒަކާތް ދެއްކުން ކަނޑައެޅިފައި އޮވެއެވެ. 

ރައީސް ޑރ.މުހައްމަދު މުއިއްޒު ރާއްޖޭގެ ވެރިކަމާ ހަވާލުވެލެއްވުމަށް ފަހު "މޯލްޑިވްސް ޒަކާތު ހައުސް"ގެ ނަމުގައި ހާއްސަ އިދާރާއެއް އުފައްދައި ޒަކާތުގެ އަޅުކަމާއި މެދު މީހުން ހޭލުންތެރިކުރައްވަން ފެއްޓެވިއެވެ. އެހެންކަމުން މި ރަމަޟާން މަހުގެ ފުރަތަމަ 10 ދުވަހުވެސް މި ފާއިތުވެދިޔަ ފަސް އަޅާ ބަލާއިރު ފިތުރު ޒަކާތް އިތުރުވެފައިވާކަން ފާހަގަކޮށްލަންޖެހެއެވެ.