ދިވެހިރާއްޖޭގެ ފަތުރުވެރިކަން ކުރިއެރުވުމަށްޓަކައި އެމިރޭޓްސް އެއަރލައިންސް އާއި މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އާ ދެމެދު އެއްބަސްވުމެއްގައި ސޮއިކޮށްފިއެވެ. މި އެއްބަސްވުމުގައި ސޮއިކުރެވުނީ ދުބާއީގައި ކުރިއަށްދާ އެރެބިއަން ޓްރެވަލް މާކެޓް 2025 ގައެވެ.

މި އެއްބަސްވުމުގައި ސޮއިކުރެއްވީ އެމިރޭޓްސްގެ ސީނިއަރ ވައިސް ޕްރެޒިޑެންޓް ފޮރ ކޮމާޝަލް އޮޕަރޭޝަންސް، ވެސްޓް އޭޝިއާ އެންޑް އިންޑިއަން އޯޝަން، އީސާ ސުލައިމާން އަހުމަދު އާއި އެމްއެމްޕީއާރްސީގެ ސީއީއޯ އަދި މެނޭޖިންގ ޑިރެކްޓަރ އިބްރާހިމް ޝިއުރީއެވެ. މި ރަސްމިއްޔާތުގައި ދިވެހިރާއްޖޭގެ ޓޫރިޒަމް އެންޑް އެންވަޔަރަންމަންޓް މިނިސްޓަރ ތާރިޤް އިބްރާހިމް ވަނީ ބައިވެރިވެ ވަޑައިގެންފައެވެ.

އެމިރޭޓްސްގެ އީސާ ސުލައިމާން އަހުމަދު ވިދާޅުވި ގޮތުގައި، "ދިވެހިރާއްޖެއަކީ އެމިރޭޓްސްގެ ވެސްޓް އޭޝިއާ އަދި އިންޑިއަން އޯޝަން ނެޓްވޯކްގެ ފުރަތަމަ 5 މަންޒިލުގެ ތެރެއިން އެއް މަންޒިލެވެ. އަދި މިހާރު ވެފައިވަނީ އެންމެ މަޤްބޫލު އެއް މަންޒިލަށެވެ. ވޭތުވެދިޔަ އަހަރު އެކަނި ވެސް 360،000 އަށްވުރެ ގިނަ ފަސިންޖަރުން ރާއްޖެއަށް އުފުލާފައިވާނެއެވެ."

އެމްއެމްޕީއާރްސީގެ އިބްރާހިމް ޝިއުރީ ވިދާޅުވި ގޮތުގައި، "ދިވެހިރާއްޖެއަކީ ފަތުރުވެރިންގެ މެދުގައި އަބަދުވެސް މަޤްބޫލު މަންޒިލެކެވެ. އެމިރޭޓްސްގެ ފުޅާ ވިއުގައާއެކު، މި އެއްބަސްވުމުގެ ސަބަބުން ދިވެހިރާއްޖެ އިތުރަށް މަޝްހޫރުވެގެންދާނެކަމަށް ޔަޤީންކުރަމެވެ."

1987 އިން ފެށިގެން ދިވެހިރާއްޖެއަށް ޚިދުމަތް ދެމުން އަންނަ އެމިރޭޓްސްއިން މިހާރު ހަފްތާއަކު 28 ފްލައިޓް ބޯއިންގ 777-300އީއާރް މެދުވެރިކޮށް ރާއްޖެއަށް އޮޕަރޭޓްކުރަމުންދެއެވެ. މި އެއްބަސްވުމުގެ ދަށުން ދެ ފަރާތުން ގުޅިގެން މާކެޓިންގ ކެމްޕެއިންތައް ހިންގުމާއި، ޓްރެވަލް ޕެކޭޖްތައް ތައްޔާރުކުރުމާއި، ފެމިލިއަރައިޒޭޝަން ޓްރިޕްތައް އިންތިޒާމްކުރުން ހިމެނެއެވެ.