ޕެންޝަން އޮފީހުގައި އިސްތިއުފާގެ ސިލްސިލާއެއް މި ދަނީ ހިންގަމުންނެވެ. އިއްޔެއާ އެކީ 5 އިސްތިއުފާ އެވެ. 

• ސަރުވަޝް އާދަމް - ބޯޑު މެންބަރުކަމުން އިސްތިއުފާ ދެއްވީ 22 އޮކްޓޯބަރު 2025
• ހައްވާ ފަޖުވާ - ޗީފް ފައިނޭންޝިއަލް އޮޕަރޭޓަރު (ސީއެފްއޯ) ގެ މަގާމުން އިސްތިއުފާ ދެއްވީ 4 ނޮވެމްބަރު 2025
• އަހުމަދު އިނާޒް - ބޯޑުގެ ޗެއާމަން ކަމުން އިސްތިއުފާ ދެއްވީ 1 ފެބްރުއަރީ 2026
• ސުޖާތާ ހަލީމް - ޗީފް އޮޕަރޭޓިން އޮފިސަރު (ސީއީއޯ)ގެ މަގާމުން އިސްތިއުފާ ދެއްވީ 4 ފެބްރުއަރީ 2026
• މުހައްމަދު މާދިން - ބޯޑު މެންބަރުކަމުން އިސްތިއުފާ ދެއްވީ 5 ފެބްރުއަރީ 2026

މި އެންމެން އިސްތިއުފާ މި ދެއްވީ، ސަރުކާރާ އެކު ބޮޑު މުއާމަލާތެއް ހިންގަން ހުށަހަޅާފައި ވަނިކޮށެވެ. މި އެންމެންގެ އިސްތިއުފާއާ އެކު ސަރުކާރުގެ ޓީބިލަކަށް އިންވެސްޓް ކުރަން ބޯޑުން މިހާރު ވަނީ ނިންމައިފަ އެވެ. 

އެއީ ޕެންޝަން ފަންޑުން އިންވެސްޓްކޮށްފައި ހުރި 2.4 ބިލިއަން ރުފިޔާގެ ބޮންޑް އެމްއެމްއޭއަށް ވިއްކާލުމަށްފަހު ސަރުކާރުގެ ބޮންޑަކަށް އެ ފައިސާ އިންވެސްޓް ކުރުމެވެ.

މީގެ ކުރިން ސަރުވަޝް ނެރުއްވި ބަޔާނެއްގައި މިއީ ފައިސާ ޗާޕްކުރުން ކަމަށް ތުހުމަތުކުރައްވާފައިވެ އެވެ. 

މި ހިންގަން އުޅެނީ ސީރިއަސް ކަމެކެވެ. ހާއްސަކޮށް މަސައްކަތްތެރިންގެ ފައިސާއިން އިންވެސްޓްކޮށްފައި ހުރި ބޮންޑެއް ވިއްކާލުމަކީ ވިސްނަން ޖެހޭ އަދި ކަންބޮޑުވުން ހުރި ކަމެކެވެ. 

މި ވާން އުޅޭ ގޮތަކާއި އިސްތިއުފާ ދެއްވަން ޖެހުނު ސަބަބު އިސްތިއުފާ ދެއްވި މީހުން ކިޔައިދޭން އެބަ ޖެހެ އެވެ. ހާއްސަކޮށް ބޯޑުގެ ޗެއާމަން އިނާޒެވެ. 

އިނާޒަކީ މާލީ ތަޖުރިބާކާރެކެވެ. މާލީ ވަޒީރުކަން އަދި އިގުތިސޯދީ ވަޒީރުކަން ވެސް ކުރެއްވި ބޭފުޅެކެވެ. 

އެންމެ ނިންމުމަކާ ގުޅިގެން ޕެންޝަން އޮފީހުން މިހާ ގިނަ އަދަދެއްގެ ބަޔަކު އިސްތިއުފާ ދެއްވީ މިއީ ރާއްޖޭގެ ތާރީހުގައި ކުރިން ފެނުނު ކަމެއް ނޫނެވެ. މި ވަރުން ވެސް މީގެ ސީރިއަސްކަން އެބަ ފެނެ އެވެ.