އޭނާގެ ނަން އާންމުންނަށް އެނގެން ފެށީ، ކުރީގެ ރައީސް އަބްދުﷲ ޔާމީން ސިޔާސީ ޕޯޑިއަމެއްގައި ދޫކޮށްލެއްވި މިސާލަކުންނެވެ. ޔާމީން އޭރު ދެއްވަން އުޅުއްވި މެސެޖަކީ ޒުވާނުން ގޯސް މަގަށް އަޅަނީ ފުރުސަތު ނުލިބޭތީ އެވެ. އޭރު އަހުމަދު ނަރީޝް ހުންނެވީ ގެދޮރުގެ ވުޒާރާގެ ކޯޑިނޭޓަރަކަށެވެ. ނަރީޝް ވެސް ވަޒީފާ ނެތް ނަމަ، ލޯބިވެރިޔާ ފޯނަކަށް އެދުނީމައި ދެން ޖެހޭނީ އާދޭސްކޮށްގެން ހޯދަން ނޫނީ ވަގަށް ނަގަން ކަމަށް ޔާމީން އެ ދުވަހު ވިދާޅުވި އެވެ.

އެކަމަކު އެއީ މިސާލެކެވެ. ނަރީޝަކީ އެންމެން ދަންނަ، އެކުވެރި މިޒާޖުގެ މިތުރެކެވެ. އޭރު ވެސް ހުންނެވީ ޒިންމާދާރު ވަޒީފާއެއްގަ އެވެ.

ނަރީޝްގެ މަގުބޫލުކަން ދެން އައީ ބަދަލުވަމުންނެވެ. އިތުރުވަމުންނެވެ. ޔާމީންގެ ސަރުކާރު ނިމުމަކަށް އައި ފަހުން ނަރީޝް ފެންނަން ފެށީ ޓީވީންނެވެ. ނަރީޝްގެ އެކުވެރި މިޒާޖު، އަދި ދޫހެލޭ ވާހަކަ ދެއްކުންތެރިއެއް ކަން އެންމެނަށް މާ ރަނގަޅަށް ވެސް ދެން ފެންނަން ފެށި އެވެ. ޔާމީން ހިންގަވާ ޗެނަލް 13 ގެ 'މަޑިސީލަ' އާއި 'ހަޖަމް' ޕްރޮގްރާމުން އޭރުގެ ސަރުކާރުގެ ގޯސްތަކުގެ ވާހަކަ ޖެހިލުމެއް ނެތި ދެއްކެވި އެވެ.

ނަރީޝްގެ މަގުބޫލުކަން އިތުރުވެގެން އައިސް އެންމެ ފަހުން މާލެ ސިޓީ ކައުންސިލަށް އިންތިހާބުވެއްޖެ އެވެ. އެއީ ނަރީޝްގެ ސިޔާސީ ހަޔާތުގެ ވެސް ފުރަތަމަ އިންތިހާބެވެ. ޑެޕިއުޓީ މޭޔަރުގެ ގޮނޑިއާ ހަމައަށް އައީ ޕާޓީގައި ނަގާ ކިޔާ ދުވަސްވީ އެތައް ބޭފުޅަކު އެ ގޮނޑިއަށް ފައި ވިއްދާފައި ވަނިކޮށެވެ. ވާދަކުރައްވައި އެ ބޭފުޅުން ބަލިކުރެއްވުމަށް ފަހުގަ އެވެ.

ސިޔާސީ ތަރިއެއް ގޮތުގައި ނަރީޝް ވިދަމުން ދަނިކޮށް މީގެ ދެ ދުވަސް ކުރިން ނަރީޝް ސޯޝަލް މީޑިއާއަށް ދޫކޮށްލެއްވި ޕޯސްޓް، އެހެންޏާ ލިޔުއްވާ ޕޯސްޓްތަކާ ތަފާތެވެ.

ނަރީޝްގެ ސޯޝަލް މީޑިއާ ޕޯސްޓްތަކަކީ އާންމުކޮށް ސިޔާސީ ޖޯޝް ބޮޑު، ހިޔާލުތަކުން މުއްސަނދި، ވާދަވެރި ރައްދުތައް ވަރުގަދަކޮށް ދީފައި ހުންނަ ޕޯސްޓްތަކެވެ. އެކަމަކު މި ފަހަރު ދޫކޮށްލެއްވީ ހަމަހިމޭން ޕޯސްޓެކެވެ. ސިޔާސީ ގޮތުން ފިކުރު އެއް ގޮތް މީހުނާއި، ފިކުރު ތަފާތު ވެރީންގެ ފަރާތުން ވެސް ލިބުނު ފިލާވަޅުތަކަށް ޝުކުރުއަދާރަކުރެއްވުމަށް ފަހު، ޑެޕިއުޓީ މޭޔަރު ކަމުން އިސްތިއުފާ ދެއްވި ކަން އިއުލާން ކުރެއްވީ އެވެ.

އެކަމަކު ނަރީޝް ކައުންސިލް ދޫކޮށްލައްވައި އުދުއްސައިގަންނާނީ ސިޔާސީ ގޮތުން ދެން ހުންނަވާނެ ގަލެއް ބަލާފައި ކަން ޔަގީނެވެ. ނަރީޝް ހުންނެވި މަގާމު މިއަދު މީޑިއާތަކަށް ހާމަކޮށްދެއްވި އެވެ. މިދިޔަ ބުރާސްފަތި ދުވަހު ޒުވާނުންގެ ވަޒީރުގެ އެޑްވައިޒަރަކަށް ނަރީޝް އައްޔަން ކުރެއްވީ ވަޒީރު ފެންވަރުގަ އެވެ. ޔާމީން އަހަރުތަކެއް ކުރިން މިސާލު ދެއްކެވި ޒުވާނާ، އެ ހުންނެވީ ޒުވާނުންގެ މުސްތަގުބަލު އަރާސްތުކުރައްވާނެ ސިޔާސަތުތަކެއް ހޯއްދަވަން ހާއްސަ މުޝީރެއްގެ މަގާމުގަ އެވެ.

މި ބަދަލާ ގުޅޭ ގޮތުން ނަރީޝް "ކުރިއަށް މީޑިއާ"އަށް ވާހަކަ ދެއްކެވި އެވެ. ނަރީޝް ފުރަތަމަ ވެސް ވިދާޅުވީ، ރާއްޖޭގެ ވޯޓުލެވޭ އާބާދީގެ %60 އަކީ ޒުވާނުން ކަމެވެ. ޒުވާނުންނާ އެކީގައި ރަނގަޅު މަސައްކަތްތަކެއް އޭނާ ކުރަން ބޭނުންވެ އެވެ. އެފަދަ ފުރުސަތެއް ދޫކޮށްލަން ބޭނުމެއް ނުވެ އެވެ. 

"މި ދިވެހިރާއްޖޭގެ ވޯޓުލެވޭ އާބާދީގެ %60 އަކީ ޒުވާނުން. ޒުވާނުންނާ އެކީގަ ރަނގަޅު މަސައްކަތްތަކެއް އަޅުގަނޑަށް ކުރެވޭނެ ރަނގަޅު ތަޖުރިބާތަކެއް ލިބިގެންދާނެ ބަދަލެއް ގޮތުގަ އަޅުގަނޑު ދެކެނީ،"

މީގެ އިތުރުން ރައީސް ޑރ. މުހއްމަދު މުއިއްޒު ނަރީޝަށް ހަވާލުކުރެއްވި ޒިންމާ އޭގެ އެންމެ ފުރިހަމަ ގޮތުގައި އަދާކޮށް އޭގެ ނަތިޖާ ދައްކަން ތައްޔާރު ކަމަށް ނަރީޝް ވިދާޅުވި އެވެ.

ޒުވާނުންގެ ކުރިމަގަށް ސަރުކާރުގެ ސިޔާސަތުތައް އެކުލަވާލާ ވުޒާރާއިން ލިބުނު ފުރުސަތު ބޭނުން ކުރުމަށް، މާލޭގެ ޑެޕިއުޓީ މޭޔަރު ކަން ދޫކޮށްލެއްވުމަށް ފަހު މި މަސައްކަތަށް ނުކުމެވަޑައިގަތުމަކީ ނަރީޝް ގަބޫލުކުރައްވާ ގޮތުގައި މި ވަގުތަށް އޭނާގެ ސިޔާސީ ހަޔާތް ކުރިއަށް ގެންދަން އެންމެ ރަނގަޅު ގޮތެވެ.

ނަރީޝް މާދަމާ ރަސްމީ ވަޒީފާއަށް ނުކުންނަވާނެ އެވެ. އެއާއެކީ ޒުވާނުންގެ ވަޒީރު އިބްރާހީމް ވަހީދު (އަސްވާޑް) އާ އެކީ ނަރީޝް ދާނީ ކުރިއަށް ކަމަށް ވިދާޅުވި އެވެ.

--------

ރައީސް މުއިއްޒުގެ ޓީމުގައި ނަރީޝްގެ ދައުރު މުހިންމެވެ. ކާމިޔާބު ސަރުކާރެއް ހިންގަން، ޒުވާނުން އެދޭ ކުރިއެރުންތައް ހާސިލްކުރުމަށް މިއީ ވަރަށް މުހިންމު ބަދަލަކަށް ވެސް ހަމަ ވެދާނެ އެވެ. ނަރީޝަށް މި ދެއްވި ސިޔާސީ ވަޒީފާއިން ނުކުންނާނެ ބޮޑު ބަދަލެއް އޮތްތޯ ބަލަން ތިބެމާ އެވެ. އެނގިދާނެތާ އެވެ.