މިއަދު ކުރިއަށް ދިޔަ މަޖިލީހުގެ ޖަލްސާގައި ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް ކުރާ ސުވާލަކަށް ޖަވާބު ދޭން އިކޮނޮމިކް މިނިސްޓަރު މުހައްމަދު ސައީދު ހާޒިރުކުރި އެވެ. މީކާއީލް ސައީދުއާ ސުވާލުކުރީ ރާއްޖެއާއި ޔޫކޭ ދެމެދު މަޝްވަރާކުރެވުނު ފްރީ ޓްރޭޑް އެއްބަސްވުމަށް މި އަހަރު އަމަލުކުރަން ނިންމާފައިވަނީ ކޮން މަރުހަލާއެއްގައިތޯ ކަމަށެވެ.

ޖަވާބުގައި ސައީދު ވިދާޅުވީ، ޔޫކޭ އެކު ފްރީ ޓްރޭޑް އެއްްބަސްވުމެއް ހަދަން ހުށަހެޅީ އީޔޫއިން އެ ގައުމު ވަކިވާން ހުށަހެޅުމުން 2016 އޮކްޓޯބަރު 16 ސޮއިކުރި ކަމަށާއި، އޭރު އީޔޫގައި ޔޫކޭ އޮތްއިރު ނަގަމުން ދިޔަ 24 ޕަސެންޓުގެ ޓެރިފް ބްރެކްސިޓަށް ފަހު 20 ޕަސެންޓަށް އެ ގައުމުން ތިރިކޮށްފައިވާ ކަމަށެވެ.

ސައީދުގެ ޖަވާބާ ގުޅުވައި 'އެކްސް' ގައި މީކާއީލް ލިޔުނު ޕޯސްޓެއްގައި ބުނީ ދިވެހި ސަރުކާރުން ވަނީ ޔޫކޭ އެކު ބާއްވަމުން އައި ފްރީ ޓްރޭޑް އެއްބަސްވުމުގެ ވާހަކަތައް ހުއްޓާލާފައި ކަމަށެވެ. އަދި އެ ގައުމަށް ރާއްޖޭން ބޭރުކުރާ މަހުގެ ޓެރިފް މި ސަރުކާރުގައި ކުޑަވާނެކަމުގެ އުންމީދެއް ނެތް ކަމަށް ވެސް އެ ޕޯސްޓުގައިވެ އެވެ.

މިކާއިލް އެހެން ވިދާޅުވުމާއެކު މުޅި ސަރުކާރު ކަހަލަ ގޮތަކަށް ވަނީ އޭނާގެ ޕޯސްޓަށް ރައްދުދީފަ އެވެ. މީކާއިލްގެ ޕޯސްޓަށް ރައްދުދެމުން 'އެކްސް' ގައި ފިޝަރީޒް މިނިސްޓަރު އަހްމަދު ޝިޔާމް ވިދާޅުވީ ރާއްޖޭ ގައި ބާނާ ކަޅުބިލަމަހާއި ކަންނެލި ޔޫކޭ އަށް އެތެރެކުރުމަށް ނަގާ ޓެރިފް ކަނޑާލުމާގުޅޭ ގޮތުން މަޝްވަރާތައް ކުރިއަށް އެބަދޭ ކަމަށެވެ.

ރައީސް މުއިއްޒު މި ފަހުން ޔޫކޭ އަށް ކުރެއްވި ދަތުރުފުޅަކީ އެ މަސައްކަތް އަވަސްކުރުމަށް މި ސަރުކާރުން އެޅި ފިޔަވަޅެއް ކަމަށް ޝިޔާމް ވިދާޅުވި އެވެ.

ސައީދު ދިފާއުކޮށް ޑިފެންސް މިނިސްޓްރީގެ ސްޓޭޓް މިނިސްޓަރު މުއާޒު ހަލީމް 'އެކްސް' ގައި ވިދާޅުވީ މިނިސްޓަރުގެ ވާހަކަތައް މީކާއިލް އޮޅުވާލާފައިވާ ކަމަށެވެ. 

މީކައިލްގެ ޕޯސްޓަށް ސަރުކާރަށް ތާއިދުކުރާ ގިނަ ބަޔަކު ރިޕްލައިކޮށްފައިވާއިރު އެ އެންމެންގެ ވާހަކަ އަކީ ސައީދުގެ ވާހަކަތައް މީކައިލް އޮޅުވާލާފައިވާ ކަމަށެވެ. 

މިކާއިލްގެ ޕޯސްޓަށް ރައްދު ދެއްވަމުން ސައީދު ވިދާޅުވީ މެމްބަރު ސުވާލުކުރުމުން ކަންކަން އޮޅުންފިލާގޮތަށް ތެދަށްޖަވާބު ދިނުމުން މީކާއިލް ޓްވީޓްވެސް ކުރައްވަނީ އޮޅުންއަރާގޮތަށް ކަމަށެވެ.