ކުރިއަށް އޮތް ކައުންސިލް އިންތިހާބުގައި އިިދިކޮޅު މައި ޕާޓީ، އެމްޑީޕީގެ ޓިކެޓުގައި ސިޓީތަކުގެ މޭޔަރުކަމަށް ނުކުންނާނީ މިހާރުވެސް މޭޔަރުކަމުގައި ތިބި ކެންޑިޑޭޓުންކަން ހާމަވެއްޖެ އެވެ. 

ކައުންސިލް އިންތިހާބުގައި އެމްޑީޕީން މޭޔަރުގެ ޕްރައިމަރީ ބާއްވާފައިވަނީ މާލެ ސިޓީގެ އިތުރުން ތިނަދޫ ސިޓީގަ އެވެ. އެ ދެ ސިޓީ ފިޔަވާ އެހެން ހުރިހާ ސިޓީއެއްގެ މޭޔަރުންނަށް ޕްރައިމަރީއަކާ ނުލައި ޓިކެޓް ވަނީ ލިބިފަ އެވެ. 

މާލޭގެ މޭޔަރުކަމުގެ ޓިކެޓް މިހާރުގެ މޭޔަރު އާދަމް އާޒިމް މޭޔަރުގެ ޓިކެޓް ކަށަވަރުކުރީ މެދުހެންވޭރު ދާއިރާގެ ކުރީގެ މެމްބަރު އަލީ އާޒިމްއާ ވާދަކޮށެވެ. ތިނަދޫ ސިޓީ މޭޔަރުކަމުގެ އެމްޑީޕީ ޓިކެޓު، މިހާރުގެ މޭޔަރު ސައުދު އަލީ ކާމިޔާބު ކުރެއްވީ އަހުމަދު ނަސީރު (ހުސީ) އާ ވާދަކޮށެވެ. 

މިއާއެކު އެމްޑީޕީގެ ޓިކެޓުގައި ސިޓީތަކަށް ވާދަކުރައްވާނީ މިހާރުވެސް އެ މަގާމުގައި ތިއްބެވި ބޭފުޅުންނެވެ. 

• ކުޅުދުއްފުށި ސިޓީ: މުހައްމަދު އާތިފް
• ފުވައްމުލަކު ސިޓީ: އިސްމާއިލް ރަފީގް
• މާލެ ސިޓީ: އާދަމް އާޒިމް
• ތިނަދޫ ސިޓީ: ސައުދު އަލީ 
• އައްޑޫ ސިޓީ: އަލީ ނިޒާރު