އއ. މަތިވެރީގައި ޙަރަކާތްތެރިވަމުންދާ މަތިވެރީ އެސޯސިއޭޝަން ފޯރ ރިކްރިއޭޝަން އެންޑް ސްޕޯޓްސް، މާރންސް ޖަމިއްޔާއަކީ 2007 ވަނަ އަހަރުން ފެށިގެން އެކި ދާއިރާތަކުގައި ޙަރަކާތްތެރިވެ މަތިވެރީގައި ނަން ފަވަމުން އަންނަ ޖަމިއްޔާއެކެވެ.


ޖަމިއްޔާގެ ފަރާތުން ރަށުގެ ރައްޔިތުންނަށް އިޖްތިމާޢީ ޙަރަކާތްތަކުގައި އެހީތެރިކަން ފޯރުކޮށްދީ، ރަށުގެ ތަރައްޤީއަށް ބޭނުންވާފަދަ ގިނަ މަސައްކަތްތަކެއް މި ޖަމިއްޔާއިން ކުރަންފެށިއެވެ. އެއަށްފަހު، މާރންސް ގެ މަސައްކަތްތައް އިތުރަށް ފުޅާކޮށް މި ނަމަކީ ރާއްޖޭގައި ވިދާލާފަދަ ނަމަކަށް ހެދުމުގެ މަޤްސަދުގައި 2020 ވަނަ އަހަރު ޖަމިއްޔާ ވަނީ ކުޅިވަރާއި ހަށިހެޔޮކަމާ ބެހޭ ވުޒާރާގައި ރަޖިސްޓްރީކޮށްފަ އެވެ.

 

ޖަމިއްޔާ ރަޖިސްޓްރީ ކުރުމަށްފަހު، މަތިވެރީގެ ތަރައްޤީއަށް ބޭނުންވާ ކޮންމެ ކަމެއްގައި ވެސް ޖަމިއްޔާގެ މެންބަރުން އަންނަނީ ނުގުޑާފަދަ ޢަޒުމެއްގައި މަސައްކަތް ކުރަމުންނެވެ. އެގޮތުން، މަތިވެރީގެ ކައުންސިލާއި ރަށުގައި ހިންގަމުންދާ އިތުރު ޖަމިއްޔާތަކާއި ގުޅިގެން ރަށަށް ފައިދާވާނެފަދަ ކަންކަން ރާވާ ހިންގުމުގައި މާރންސް ވެފައިވަނީ މުޅި މަތިވެރިއަށް ނަމޫނާ ޖަމިއްޔާ އަކަށެވެ.


ހަމަ އެހެންމެ، މުޅި ރަށުގެ ތަރައްޤީއަށް ކުރާ މަސައްކަތްތަކުގެ އިތުރުން ވަކިވަކި ފަރުދުންގެ ދިރިއުޅުމުގައި ދިމާވާ ކަންކަމަށް އެހީތެރިވުމުގައި ވެސް މާރންސް ޖަމިއްޔާއިން އަންނަނީ ނަމޫނާ ދައްކަމުންނެވެ. އެގޮތުން، ބަލިޙާލަތު ދެރަވެ ޢާންމުންގެ އެހީތެރިކަން ބޭނުންވާ ފަރާތްތަކަށް ފަންޑް ރައިސިންގ އިވެންޓްތައް ހިންގާދީ އެފަދަ ފަރާތްތަކަށް އެހީތެރިވުމުގެ މަތިވެރި މަސައްކަތްވެސް މި ޖަމިއްޔާއިން ކުރަމުން އަންނަނީ ފޫހިކަމެއް، ވަރުބަލިކަމެއް ނެތިއެވެ.
 

 

މާރންސް ޖަމިއްޔާ ވުޖޫދަށް އައިސްފައިވާތާ 4 އަހަރު ވެފައިވާއިރު މި ޖަމިއްޔާއިން ވަނީ ރާއްޖޭގެ ތާރީޚުގައި ފާހަގަކޮށްލެވޭ ފަދަ މުހިންމު މަސައްކަތްތަކެއް ކޮށްފައެވެ. އެގޮތުން، ދިވެހިރާއްޖޭގައި އަލަށް ޤާއިމްކޮށް ހިންގަން ފެށި ވޮލީ އެކެޑަމީއަކީ މި ޖަމިއްޔާގެ މެންބަރުންގެ ދުރު ވިސްނުމާއި، ބުރަ މަސައްކަތާއި، އިސްނެގުމުގެ މަތިން ކާމިޔާބުކަމާއި އެކު ކޮށްފައިވާ މަސައްކަތެކެވެ. މި ޙަރަކާތަށް ރާއްޖޭގެ ކުޅިވަރު ދާއިރާގެ ބޮޑު ތަރުހީބެއް ލިބިފައިވާއިރު، މި ޖަމިއްޔާއިން އަންނަނީ ރަށުގެ ކުޑަކުދިންނަށް ޚާއްޞަކޮށްގެން ފުޓްބޯޅަ އެކެޑަމީއެއް ވެސް ހިންގަމުންނެވެ.

މާރންސް ޖަމިއްޔާއަކީ ކުޅިވަރުގެ ޙަރަކާތްތަކަށް ލޯބިކުރާ ގިނަ އަދަދެއްގެ ޒުވާނުންތަކެއް ހަރަކާތްތެރިވަމުންދާ ޖަމިއްޔާއެކެވެ. އެގޮތުން ކޮންމެ އަހަރަކުވެސް، ރަށު ފެންވަރުގައި ކުޅިވަރުގެ ވާދަވެރި މުބާރާތްތައް ބޭއްވުމަކީ އެ ޖަމިއްޔާއިން އިސްކަމެއްދީގެން ކުރަމުން އަންނަ މަސައްކަތެކެވެ. އެގޮތުން، ރަށު ފެންވަރުގައި ފުޓްބޯޅަ މުބާރާތްތަކާއި ވޮލީ މުބާރާތްތައް ހިންގަމުންދާކަން ފާހަގަ ކުރެވެއެވެ. އަދި މި މުބާރާތްތަކަށް ބޭނުންވާ ސްޕޮންސަރުން ހޯދުމުގައި ކޮންމެ އަހަރަކުވެސް ޖަމިއްޔާގެ މެންބަރުން އަންނަނީ އުންމީދީ މަސައްކަތްތަކެއް ކުރަމުންނެވެ.
 

މާރންސް ޖަމިއްޔާގެ ރޭވުންތެރިކަމާއި ހިންގުން އިތުރަށް ރަނގަޅުކޮށް ހަރުދަނާ ކުރުމަށް އެ ޖަމިއްޔާއިން ވަނީ 15 މެންބަރުންގެ ކޮމެޓީއެއް އެކުލަވާލާފައެވެ. އެގޮތުން ކޮމެޓީގެ ރައީސް އާއި ނައިބު ރައީސްގެ އިތުރުން ކޮމެޓީ ހިންގުމަށް ބޭނުންވާ މުހިންމު މަޤާމުތަކަކާއި ހަވާލުވާނެ މެންބަރުންތަކެއް ޖަމިއްޔާގެ ތެރެއިން ވަނީ ހޮވާފައެވެ. މި މަޤާމްތަކުގެ ތެރޭގައި،މާރންސްގެ ރައީސް އަލްފާޟިލް އިސްމާޢިލް ނަސީމް، ނައިބު ރައީސް އަލްފާޟިލް އާދަމް ނިޔާޒު އިބްރާހީމް، ޖެނެރަލް ސެކްރެޓަރީ އަލްފާޟިލް ޙުސައިން ނިހާން، އެޑްވައިޒަރ އަލްފާޟިލް އިބްރާހީމް ޒަމްޢަތު، ސުޕަރވައިޒަރ އަލްފާޟިލް އަޙްމަދު ޝާހިރު، ބަޖެޓް އޮފިސަރ އަލްފާޟިލް އައްބާސް އިބްރާހީމް، މީޑިއާ ކޯޑިނޭޓަރ އަލްފާޟިލް އަރުޝަދު ޢަބްދުއްލަތީފް، އެސިސްޓެންޓް މީޑިއާ ކޯޑިނޭޓަރ އަލްފާޟިލް ސައިފް އިސްމާޢީލް، އިވެންޓް ސުޕަވައިޒަރ އަލްފާޟިލް ވިލްދާން މުޙައްމަދު، އެސިސްޓެންޓް އިވެންޓް ސުޕަވައިޒަރ އަލްފާޟިލް ޢަލީ ރިމާހް، ސްޕޯޓްސް ސުޕަވައިޒަރ އަލްފާޟިލް މުޙައްމަދު ޚަލަފް، އެސިސްޓެންޓް ސްޕޯރޓްސް ސުޕަވައިޒަރ އަލްފާޟިލް މުޙައްމަދު ޙަމްދާން، ހެޑް އޮފް އެކަޑަމީ އަލްފާޟިލް ޢަލީ ރިފާޙް އަދި އެކަޑަމީ ސުޕަވައިޒަރ އަލްފާޟިލް މުޙައްމަދު މިސްބާޙް ހިމެނެއެވެ.

 

މާރންސް ޖަމިއްޔާގައި އެކުލަވާލި މި ކޮމެޓީއާއި އެކު ޖަމިއްޔާގެ ހިންގުން އިތުރަށް ފުޅާވެގެންދާނެ ކަމަށް އެ ޖަމިއްޔާއިން ބުނެއެވެ. އެގޮތުން، މިހާރު ކުރަމުންދާ މަސައްކަތްތަކާއި، އެކިއެކި ޙަރަކާތްތައް އިތުރަށް ފުޅާވެ، ހަލުވި ދުވެއްޔެއްގައި މުޖްތަމަޢަށް ފައިދާކުރާނެ ގިނަ މަސައްކަތްތަކެއް ހިންގަމުންދާނެ ކަމަށް އެ ޖަމިއްޔާއިން މަޢުލޫމާތުދެއެވެ. ހަމަ އެހެންމެ، މި ޖަމިއްޔާގެ އެންމެ ބޮޑު އެއް މަޤްސަދަކީ ދިވެހި މުޖްތަމަޢަށް ފައިދާކުރާނެ ޖީލެއް ބިނާކުރުން ކަމަށް ވާއިރު، މި ޖަމިއްޔާއިން ކުރާ މަސައްކަތްތަކުގެ ސަބަބުން މަތިވެރިއަށާއި، މުޅި ރާއްޖޭގެ ތަރައްޤީއަށް ވެސް ކުޑަ ނަމަވެސް ކުރިއެރުމެއް އަންނާނެ ކަމަށް މާރންސް ޖަމިއްޔާގެ ކޮންމެ މެންބަރަކު ވެސް ޤަބޫލުކުރެއެވެ.

ފާއިތުވި އަހަރުތަކަށް ވުރެ ވަރުގަދަ ޢަޒުމަކާއި، ކާމިޔާބުކުރަން ބޭނުންވާ މުހިންމު އައު ލަނޑުދަޑިތަކަކާއި އެކު މާރންސް ޖަމިއްޔާ ގެ ޢުންމީދަކީ މުސްތަޤްބަލުގައި އަމިއްލަ ރަށަށްށާއި ޤައުމަށް ފައިދާކުރާނެ ފަދަ މުހިންމު މަސައްކަތްތަކެއް ކުރާ  ޖަމިއްޔާއަކަށް ވުމެވެ.