ރާއްޖޭގެ މަޝްހޫރު ދީނީ އިލްމުވެރިޔާ ޑރ. އިލްޔާސް ހުސައިންގެ މަންމާފުޅު، އައިޝަތު ދިޔެ އުމުރުފުޅުން 91 އަހަރުގައި ރޭ ނިޔާވީ، މުސްކުޅި ބަލީގައި އައްޑޫ އިކުއަޓޯރިއަލް ހޮސްޕިޓަލުގައި ފަރުވާދެމުންދަނިކޮށެވެ. ޝައިހް އިލްޔާސްގެ މަންމާފުޅުގެ ހާލު ދެރަވެ، އެނދުމަތިކުރީ އަރަފާތު ހައްޖު އަދި އުމުރާ ގްރޫޕުގެ އުމްރާވެރިން ގޮވައިގެން ޝައިހް އިލްޔާސް މައްކާއަށް ވަޑައިގެން އުޅުއްވަނިކޮށެވެ.  

ޝައިހް އިލްޔާސް މަންމާފުޅު ރޭ ނިޔާވުމާއެކު ޝައިހްގެ ދަރިވަރެއްކަމުގައިވާ އައްމާރު އަލީ ވަނީ އޭނާގެ ފޭސްބުކް އެކައުންޓަށް އަސަރުން ފުރިގެންވާ ޕޯސްޓެއް ދޫކޮށްލައިފައެވެ. އެ ޕޯސްޓު މިހާތަނަށް 800 އަށް ވުރެ ގިނަ މީހުން ޝެއާކޮށްފައިވާއިރު 600 އަށް ވުރެ ގިނަ ރިއެކްޓް އެ ޕޯސްޓަށް ލިބިފައިވެއެވެ. އެ ޕޯސްޓުގެ ފުރަތަމަ ޖުމްލައިންވެސް ހިތަށް ކުރުވީ ފުން އަސަރެކެވެ. 

"އީދުގެ އުފާވެރިކަން އަޅުގަނޑުމެންނަށް މިއަދު ބައްދަލު ކުރީ ދެ ހިތާމަ އާއެކުއެވެ. އަޅަމެންނަށް މާތް ﷲ ކެތްތެރިކަން މިންވަރު ކުރައްވާށިއެވެ. އަޅުގަނޑުގެ ލޮބުވެތި އުސްތާޒު އަދި އަޅުގަނޑުމެންގެ ޝެއިހް ޑރ. އިލްޔާސް ހުސައިންގެ މަންމާފުޅު މި ފަނާވަނިވި ދުނިޔެއާ ވަކިވެގެން ދިޔައީ ބަރަކާތްތެރި މި ރަމަޟާން މަހާ އަޅުގަނޑުމެން އަލްވާދާއު ކިޔުމުގެ ވަގުތު ކައިރިވެފައި ވަނިކޮންނެވެ. އެއީ ދެ ޝެއިހުންގެ މަންމައެވެ. ގާތް އެތައް މިތުރުންނެއްގެ މާމައެވެ." އައްމާރުގެ ޕޯސްޓު ފައްޓަމުން ލިޔެފައިވެއެވެ. 

އެ ޕޯސްޓުގައި ދެން އޮތީ މައިވަންތަ ކުލުނުގެ ނަމޫނާއެވެ. ނުވަ މަސް ދުވަހު، ރަހިމުގައި ގެންގުޅެ، ދުނިޔެއަށް އުފަންކޮށް، އެ ދަރިފުޅު ބަލައިބޮޑުކޮށް، ރަނގަޅު ތަރުބިއްޔަތެއް ދިން މަންމައެއް މަރު މަތީގައިވެސް އެދިއެދި ހުރި ކަމެއްގެ ވާހަކައެވެ. ލޯބިވާ ފުރާނަ ފަދަ ދަރިފުޅު ދެކިލުމަށެވެ. ގާތުގައި ދަރިފުޅު ނެތުމުން އެ ލިބޭ ފަޅުކަމާއި ހިތާމައިގެ ވާހަކައެވެ.

"ބަލިބޮޑުވެ ހޭވެރިކަންނުވާ ހިސާބަށް މަންމާފުޅުގެ ހާލަތު ދަށްވަމުންދިޔަ ހިނދުވެސް ހޭވެރިކަމެއްވާ ވަގުތެއްނަމަ ޝައިހް ކޮބައިތޯ ސުވާލު ކުރައްވަމުން ގެންދެވިއެވެ. ދަރިކަލުން އިލްޔާސް ކޮބައިތޯ އާއި ދަރިކަލުން އިލްޔާސް ނާދޭތޯ އާމެދު ކުރައްވަމުންގެންދެވި ސުވާލުތައް ތަކުރާކުރައްވަމުން ގެންދެވުންވީ ޝައިހަށް ފުން ހިތާމައެއް ތަހައްމަލު ކުރަންޖެހުނު ކަމަކަށެވެ. ޝައިހް އަކީ މަންމާފުޅު ދެކެ ވަރަށް ބޮޑަށް ލޯބިފުޅުވާ ދަރިކަލެކެވެ." އައްމާރުގެ ޕޯސްޓުގައިވެއެވެ. 

ބަލި އެނދުގައި، މަންމާފުޅުވާތަން ބެލުމަކީ ޝައިހް އިލްޔާސަށް ކެތްކުރަން ފަސޭހަ ކަމަކަށް ނުވިއެވެ. މަންމާފުޅުގެ ހާލަތު ދެރަވަމުންދާތީ ޝައިހްގެ މޫނުން އެ ފެންނަ މާޔޫސްކަމާއި މޮޅިވެރިކަން އެންމެ ރަނގަޅަށް ފެންނާނީ އުމްރާވެރީންނަށެވެ. ނަސީބު ކަންދިމާކުރި ގޮތުން ލޮބުވެތި މަންމާފުޅުގެ އަރިހަށް އައުމަށް ޝައިހަށް މަގުފަހިވީ، އުމްރާވެރީންގެ އުމުރާގެ އަޅުކަން ނިމިފައިވުމުން އަރަފާތު ގްރޫޕުގެ ޓީމުން ޝައިހް އިލްޔާސް ވީ އެންމެ އަވަހަކަށް ރާއްޖެ ގެނެސްދިނުމުންނެވެ. އެންމެ އަވަހަށް ރާއްޖެއަށް އޮތް ފްލައިޓުން ރާއްޖެ އައިސް އައްޑޫއަށް ވަޑައިގަތެވެ. އައްޑޫއަށް ވަޑައިގެން އައްޑޫ އިކުއެޓޯރިއަލް ހޮސްޕިޓަލްގެ އައިސީޔޫއަށް ވަޑައިގެން، މަންމާފުޅާއި ބައްދަލުކުރައްވާ ވާހަކަފުޅު ދެއްކެވިއެވެ. ޝައިހްގެ މަންމާފުޅު ނިޔާވީ އޭގެ ކުޑަ ވަގުތު ކޮޅެއް ފަހުންނެވެ. ޝައިހްގެ މަންމާފުޅު މި ފަނާކުރަނިވި އާލަމާ ވަކިއެވީ ލޯބިވާ ދަރިކަލުންގެ އަތުގައި ބޮސްދިނުމުގެ ފުރުސަތު ލިބުމަށް ފަހުއެވެ. ފަހު ނޭވާ އެ ދޫކޮށްލީ ޝައިހްގެ އަތްޕުޅަށެވެ. 

ޝައިހް އިލްޔާސްގެ މަންމާފުޅުގެ ކަށުނަމާދު ވަނީ މިއަދު ހެނދުނު އީދު ނަމާދަށް ފަހު އައްޑޫ ސިޓީ ހިތަދޫ މަސްޖިދުލް އިކްރާމް (ފަޒާ މިސްކިތް)ގައި ބާއްވައިފައެވެ. ދުޢާއަކީ ޝައިހްގެ މަންމާފުޅު ޖަންނަތުލް ފިތްދައުސްގައި ލެއްވުމެވެ.