ހޮލިވުޑްގެ މަޝްހޫރު ޖޯޑު ނިކޯލް ކިޑްމަން އާއި ކީތް އަރބަންއަކީ ވޭތުވެދިޔަ އަހަރު ހާއްސަ ސަމާލުކަމެއް ލިބިފައިވާ ތަރީންނެވެ. ލޮސް އެންޖެލެސްގެ ގެތަކަށް ވަދެގެން ކުރާ ވައްކަމުގެ އެންމެ ފަހުގެ ޝިކާރައަށްވެސް މިދެތަރީން ވަނީ ވެފައެވެ. ރިޕޯޓުތަކުގައިވާ ގޮތުން، ކެލިފޯނިއާގެ ބެވަރލީ ހިލްސްގައި ހުރި އެމީހުންގެ 4.7 މިލިއަން ޑޮލަރުގެ މެންޝަން އަށް މިދިޔަ ހަފުތާ ބަންދުގައި ވައްކަން ކުރަން ވަދެފައިވެއެވެ.

ވައްކަން ކުރަން ވަން މީހާ ބިއްލޫރި ކުޑަދޮރެއް ތަޅާލި އަޑަށް ކުޑައިރުކޮޅެއްގެ ތެރޭގައި ގޭގެ މުވައްޒަފުން ނުކުތުމުން، ފިލައިގެން ގޮސްފައިވެއެވެ.

"ބޭބީގާލް" ފިލްމުގެ ތަމްސީލުކުރި އެކްޓްރެސް އާއި އޭނާގެ ކަންޓްރީ މިޔުޒިކްގެ ފިރިމީހާ މި ހާދިސާ ހިނގިއިރު ގޭގައެއް ނެތެވެ. ހޮލީވުޑް ހަބަރުތައް ބުނާގޮތުގައި، އެމީހުންގެ ބެވަރލީ ހިލްސްގެ ގެއިން އެއްވެސް އެއްޗެއް ވަގަށް ނަގާފައިވާކަން އަދި ސާފެއް ނުވެއެވެ. މިހާތަނަށް، ލޮސް އެންޖެލެސްގެ ގެތަކަށް ވަދެގެން ކުރާ ވައްކަމާ ގުޅިގެން އެއްވެސް މީހަކު ހައްޔަރުކޮށްފައެއް ނުވެއެވެ.

މި ގޭގައި 5 ކޮޓަރިއާއި 4 ފާޚާނާގެ އިތުރުން، ފްލެޓް ޓޮޕް ރޫފަކާއި، ޕޫލަކާއި، ދެވަނަ ފަންގިފިލާގައި ގެ ވަށައިގެން ހުރި ޑެކަކާއި ޕެޓިއޯ ސަރަހައްދުތަކެއް ހިމެނެއެވެ. މި ގެ ހުރީ އެކްސްކްލޫސިވް ބެވަރލީ ހިލްސް ޕޯސްޓް އޮފީސް ސަރަހައްދުގައެވެ. މި ގެ އިމާރާތްކޮށްފައިވަނީ 1965 ގައެވެ. އަދި މިއީ 1.25 އޭކަރުގެ ބިމެއްގައި ހުރި ގެއެކެވެ.

ނިއު ޔޯކް ޕޯސްޓުން ބުނާ ގޮތުގައި، އަޑެލް، ޖެނިފަރ ލޯރެންސް، އެޝްޓަން ކަޗަރ-މިލާ ކުނިސް، ނިކޯލް ރިޗީ، ޒޯއީ ސަލްޑާނާ އަދި ޕެނެލޮޕީ ކްރޫޒް ފަދަ މަޝްހޫރު މީހުންވެސް އަހަރުތަކެއް ވާންދެން މި ސަރަހައްދުގައި ދިރިއުޅެފައިވެއެވެ.

ނިކޯލާއި ކީތްގެ ފަހުރުވެރި ގެތަކުގެ ލިސްޓުގައި ނޭޝްވިލްގައި ހުރި 3.4 މިލިއަން ޑޮލަރުގެ ގެއަކާއި، އޮސްޓްރޭލިއާގައި ހުރި ދެ ގެއަކާއި، އަދި ނިއު ޔޯކް ސިޓީގައި ހުރި 10 މިލިއަން ޑޮލަރުގެ ގެއެއްވެސް ހިމެނެއެވެ.

ޑެއިލީ މެއިލްއިން ބުނާ ގޮތުގައި، މި ވައްކަމުގެ މައްސަލަ ހާމަވެފައި މިވަނީ މާވެލްގެ ތަރި ސިމު ލިއުގެ ގެއަށްވެސް ޗުއްޓީ ދުވަސްވަރު ވަދެފައިވާތާ ހަފުތާތަކެއް ފަހުންނެވެ. ލޮސް އެންޖެލެސްގައި މި ވައްކަމުގެ ރޭވުމުގެ ޝިކާރައަކަށްވެފައިވާ މަޝްހޫރު އެހެން ތަރީންގެ ތެރޭގައި ޓޮމް ހޭންކްސްއާއި ރިޓާ ވިލްސަން، ޖެސީ ޖޭ، ސޯފިއާ ބުޝް، ސާރާ ހައިލަންޑް، ބަޑް ބާބީ އަދި ސިޑްނީ ސްވީނީ ފަދަ މީހުން ހިމެނެއެވެ.