ލޯނުތައް ދެއްކުމަށް މި އަހަރުގެ މިހާތަނަށް ދެ ބިލިއަނަށްވުރެ ގިނަ ރުފިޔާ ހަރަދުކޮށްފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.

މި އަހަރަށް ފާސްކުރި ދައުލަތުގެ ބަޖެޓުގައި ލޯނު ދެއްކުމަށް ކަނޑައަޅާފައިވަނީ 3.8 ބިލިއަން ރުފިޔާއެވެ.

ފިނޭންސް މިނިސްޓްރީން ކޮންމެ ހަފްތާއަކުން އާންމުކުރާ މާލީ ތަފާސްހިސާބުތަކުގައިވާ ގޮތުން، މި މަހުގެ ހަ ވަނަ ދުވަހުގެ ނިޔަލަށް ލޯނު ދެއްކުމަށް ސަރުކާރުން ވަނީ 2.28 ބިލިއަން ރުފިޔާ ހޭދަކޮށްފައެވެ. މިއީ މިދިޔަ އަހަރުގެ މި މުއްދަތައި އަޅައި ބަލާއިރު، 188.5 ޕަސަންޓުގެ އިތުރުވުމެކެވެ.

ތަފާސްހިސާބުތައް ދައްކާ ގޮތުގައި މި މަހުގެ 6 ގެ ނިޔަލަށް ލިބުނު އާމްދާނީގެ ގޮތުގައި ލިބިފައިވަނީ 7.18 ބިލިއަން ރުފިޔާ އެވެ. މިދިޔަ އަހަރުގެ މި މުއްދަތުގައި ލިބުނީ 7.16 ބިލިއަން ރުފިޔާ އެވެ.

މީގެ އިތުރުން ރިކަރަންޓް ހަރަދާއި ކެޕިޓަލް ހަރަދު މި އަހަރު ވަނީ ދަށަށް ގޮސްފައެވެ.