އިނގިރޭސިވިލާތުގެ އެންމެ ކާމިޔާބު އެއް ކްލަބު ކަމަށްވާ ލިވަޕޫލްގެ ރަސްމީ ޓޫރިސްޓު ޑެސްޓިނޭޝަން ޕާޓްނަރަކަށް  މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ ދަށުން ހިންގާ ވިޒިޓް މޯލްޑިވްސް ހަަމަޖައްސައިފިއެވެ.

އެމްއެމްޕީއާރްސީން ނެރުނު ބަޔާނެއްގައި ބުނީ، މި ގުޅުމުގެ ސަބަބުން ވިޒިބިލިޓީ ދުނިޔޭގެ މައިގަނޑު ހުރިހާ ގައުމެއްގައި އިތުރުވެ ފަތުރުވެރިން އިތުރުވެ ރާއްޖޭގެ ފަތުރުވެރިކަމުގެ ސިނާއަތަށް އިގްތިސޯދީ ގޮތުން ބޮޑެތި ފައިދާތަކެއް ލިބިގެންދާނެކަމަށެވެ. އަދި މި ޕާޓްނާޝިޕް ރަސްމީކޮށް އިފްތިތާހުކުރާނީ އަންނަ މަހުގެ ދެ ވަނަ ދުވަހު ލިވަޕޫލް އެފްސީ އެވަޓަންއާ ދެކޮޅަށް ކުޅޭ މެޗުގައިކަމަށެވެ،

އެމްއެމްޕީއާރްސީން ބުނީ، އެ އެއްބަސްވުމުގެ ސަބަބުން ލިވަޕޫލުގެ މަގުބޫލުކަމުގެ ބޭނުންހިފައި ވަރުގަދަ އޯޑިއަންސުން ގިނަ ބަޔަކު ރާއްޖެ ގެނައުމަށް ބާރުއެޅިގެންދާނެ ކަމަށެވެ. 

މި އެއްބަސްބުމުގެ ސަބަބުން މި އަހަރު އިތުރު އެއްލައްކައަށްވުރެ ގިނަ ޓޫރިސްޓުން ރާއްޖެ އަންނާނެކަމަށް ލަފާ ކުރެވޭ ކަމަށާއި އާމްދަނީގެ ގޮތުގައި 100 މިލިއަން ޑޮލަރަށްވުރެ ބޮޑު އާމްދަނީއެއް ވަންނާނެ ކަމަށް ބުންޏެވެ. 

މީގެ އިތުރުން ޕާޓްނާޝިޕްގެ ދަށުން އެންފީލްޑް ސްޓޭޑިއަމްގައި ވިޒިޓް މޯލްޑިވްސްގެ ބްރޭންޑް ވިޒިބިލިޓީ އާއި ޕްރިމިއާ ލީގުގެ ހޯމް މެޗުތަކުގައި އެލްއީޑީ ނިޝާން ފެންނަން ހުންނާނެއެވެ. އަދި ޔޫރަޕުގެ އެކި ހިސާބުތަކުގައި މުހިންމު މާކެޓުތަކުގެ ފަތުރުވެރިންނަށް އަމާޒުކޮށްފައިވާ ބިލްބޯޑުތަކުން ރާއްޖެ ދައްކާލެވިގެން ދާނެއެވެ.

ރާއްޖޭގައި ލިވަޕޫލްގެ އެކަޑަމީއެއް ގާއިމްކުރުމާއި ސްޕޯޓްސް ޓޫރިޒަމް ހަރުދަނާކުރުމާއި ޑެސްޓިނޭޝަން ބްރޭންޑިން އިތުރުކުރުން ފަދަ ހައި ވެލިއު އެކްޓިވިސްޓްތައްވެސް މި ޕާޓްނާޝިޕްގައި ހިމެނޭ ކަމަށް އެމްއެމްޕީއާރްސީން ބުންޏެވެ.