ޒުވާން ޑައިރެކްޓަރު އަޒްހާން އިބްރާހިމް ޑައިރެކްޓްކުރާ ''ލިލީ'' ފިލްމުގެ ޓިކެޓް ގަނެގެން މެލޭޝިޔާގެ ދެކޮޅު ޓިކެޓް ލިބޭ ޕްރޮމޯޝަނެއް ކްރިއޭޓީވް ނެޓްވޯކްއިން ފަށައިފި އެވެ. 

މެލޭޝިޔާ އަށް ދިޔުމުގެ ދެކޮޅު ޓިކެޓް ލިބޭނީ ލިލީ ފިލްމުގެ ޓިކެޓް ނޮވެމްބަރު 19 ވަނަ ދުވަހުގެ ކުރިން ނަގާ ފަރާތްތަކުގެ މެދުގައި ބާއްވާ ގުރުއަތުލުމުންނެވެ. ޓިކެޓް ސްޕޮންސާ ކޮށްފައިވަނީ ކޮންސިއާޖް މޯލްޑިވްސް އިންނެވެ. ލިލީގެ ޓިކެޓް 7505079 ނަންބަރަށް ގުޅައިގެންވެސް ނެގޭނެ އެވެ. 

މި ފިލްމު އޮލިމްޕަހުގައި ޕްރިމިއާ ކުރަން ހަމެޖެހިފައިވަނީ މި މަހުގެ 20 ވަނަ ދުވަހު އެވެ. 

ނިމިދިޔަ އަހަރު ''މީ އިޝްގް'' ގެނެސްދިން އަޒްހާން އިބްރާހިމް ޑައިރެކްޓު ކުރާ މި ފިލްމަކީ ކްރައިމް ތްރިލާ ޖޯންރާގެ ފިލްމެކެވެ. ފިލްމުގެ މަންޒަރުތައް ނަގާފައިވަނީ ޅ. ހިންނަވަރުގެ އިތުރުން ލ. އަތޮޅުގެ ރަށްތަކުގަ އެވެ.

މި ފިލްމުގެ ފިލްމުގެ ލީޑު ތަރިންނަކީ އާއިޝާ އަލީ، މުހައްމަދު އިޝްފާން އަދި އަހުމަދު ޝާރިފްގެ އިތުރުން މަރިޔަމް ޝިމާ އެވެ.

ފިލްމުގެ މަންޒަރުތައް ނަގާދީފައިވަނީ ސަމާހު އިބްރާހިމް އެވެ. މިއީ ކްރިއޭޓިވް ނެޓްވޯކުގެ ކުޑައިގެ ދަށުން މުހައްމަދު އަރީހު ޕްރޮޑިއުސް ކުރާ ފިލްމެކެވެ.