ރައީސުލްޖުމްހޫރިއްޔާކަން ކުރެއްވި ބޭފުޅުންނަށް ދެއްވާ އިނާޔަތް ކުޑަކުރަން ސަރުކާރުން ނިންމި ކަމަށް، ރައީސް ޑރ. މުހައްމަދު މުއިއްޒު ސޯޝަލް މީޑިއާ ޕޯސްޓެއްގައި ލިއުއްވީ މިދިޔަ ސެޕްޓެމްބަރު މަހު ކުރީކޮޅެވެ.

"ރައީސުލްޖުމްހޫރިއްޔާކަން ކޮށްފައިވާ ފަރާތްތަކަށާއި ރައްޔިތުންގެ މަޖިލީހުގެ މެންބަރުކަން ކޮށްފައިވާ ފަރާތްތަކަށް ގާނޫނުތަކުން ލިބިދޭ ބައެއް އިނާޔަތްތައް އުނިކުރުމަށް ގާނޫނުތައް އިސްލާހު ކުރަން ރައްޔިތުންގެ މަޖިލީހަށް ހުށަހެޅުމަށް ސަރުކާރުން ވާނީ ނިންމާފައި،"

އެކަމަކު މާލީ ވަޒީރު މިދިޔަ ބުރާސްފަތި ދުވަހު ރައްޔިތުންގެ މަޖިލީހަށް ހުށަހެޅުއްވި އަންނަ އަހަރަށް ލަފާކުރާ ބަޖެޓްގައި ކުރީގެ ރައީސުންނަށް ދޭން ހިމެނި އަދަދުން ސަރުކާރުގެ ނިންމުމާ އެއްގޮތެއް ނުވި އެވެ. 

މި ފަހަރު ހުށަހެޅި އަންނަ އަހަރުގެ ބަޖެޓްގައި ވެސް ކުރީގެ ރައީސުންގެ އިނާޔަތަށް ހަރަދުކުރަން ޖެހި އަދަދަކީ 19.7 މިލިއަން ރުފިޔާ އެވެ. އެއީ މިދިޔަ އަހަރުގެ ބަޖެޓްގައި ވެސް އޮތް އަދަދެވެ. އަދަދު ކުޑަނުވެ އޮތުމުން މާނަައަކީ އިނާޔަތް ކުޑަކުރުމުގެ ވިސްނުން އަދި ނެތީ އެވެ.

ބަޖެޓްގައި ވާ ގޮތުން ކުރީގެ ރައީސުންނަށް ހަރަދު ކުރުމަށް ހަމަޖެހިފައިވާ ގޮތަކީ:

• މައުމޫން އަބްދުއްގައްޔޫމް - 4.3 މިލިއަން ރުފިޔާ 
• މުހައްމަދު ނަޝީދު - ހަތަރު މިލިއަން ރުފިޔާ
• މުހައްމަދު ވަހީދު ހަސަން މަނިކު - 3.4 މިލިއަން ރުފިޔާ
• އަބްދުﷲ ޔާމީން - ހަތަރު މިލިއަން ރުފިޔާ
• އިބްރާހީމް މުހައްމަދު ސޯލިހް - ހަތަރު މިލިއަން ރުފިޔާ