ކުޅުދުއްފުށީ މަށި ކުޅިއަށް ކަހަނބު ދޫކުރާތީވެ ކަންބޮޑުވުން ފާޅުކޮށްފި އެވެ. 

އެ ކަންބޮޑުވުން އާއްމުންގެ ސަމާލުކަމަށް ގެނައީ ސިކްސެންސެސް ކަނުހުރާގައި މަސައްކަތްކުރާ ސީ ޓާޓުލް ބަޔޮލިޖިސްޓް އާދަމް އާތިފް މުހައްމަދެވެ. 

ފޭސްބުކްގައި އާތިފް ވަނީ ކުޅިއަށް ދިރޭ ކޮންމެ އެއްޗެއް، ހާއްސަކޮށް ކަނޑުގައި އުޅޭ ދިރުންތައް ދޫކުރުން ހުއްޓާލައިދޭން އެދި ޕޯސްޓެއް ކޮށްފަ އެވެ. އޭނާ ބުނީ ކުޅިއަށް ވެލާގެ އިތުރުން ވެނާއި އެހެނިހެން ކަނޑުގެ ދިރުންތައް ވެސް އަޅަމުންދާ ކަމުގެ މައުލޫމާތު ލިބޭ ކަމަށެވެ.

''ފޮޓޯއިން މި ފެންނަނީ މޫދުގައި އުޅޭ ވެލާ ކަހަނބުގެ ތެރެއިން, ކަހަނބެވެ. ކަންޒު ކަހަނބެއް ނޫނެވެ. މިއީ ކަނޑުގައި އުޅެންޖެހޭ އެއްޗެކެވެ، މިއީ ކަނޑާ ގުޅިފައި އޮތް ހުޅުވިފައިވާ ކުޅިއެއް ނަމަ ތަފާތުވީހެވެ. ނަމަވެސް މިއީ ބަންދުވެފައިވާ ކުޅިއެކެވެ" އާތިފް ބުނީ ކަނޑުގެ ދިރުންތައް ކުޅިއަށް ދޫކުރުމަކީ އެ އެއްޗެއްސަށް ވެސް އަދި ކުޅީގެ ތިމާވެއްޓަށް ވެސް ރަނގަޅު ކަމެއް ނޫން ކަމަށެވެ.

މި ނޫހާ ވާހަކަ ދައްކަމުން އާތިފް ބުނީ ވެލާ އަދި ކަހަނބު މީހުން ކުޅިއަށް ދޫކުރަނީ ހޭލުންތެރިކަން ކުޑަވުމުގެ ސަބަބުން ކަމަށެވެ. އަދި އެކަމުގެ މައުލޫމާތުވެސް އާއްމުންނަށް ލިބިފައިވެސް ނެތުމުން ކަމަށެވެ.