ހުސެއިން މުނައްވަރު ޑައިރެކްޓްކުރި ދިވެހި ފިލްމު ''ކަމަނަ'' އަށް ބައިނަލްއަގްވާމީ އެވޯޑެއް ލިބިއްޖެ އެވެ. 

އެ ފިލްމުން ވަނީ އިންޑިއާގެ ފަސް ވަނަ ކަރުނާޓަކާ އިންޓަނޭޝަނަލް ފިލްމު ފެސްޓިވަލް (ކޭއައިއެފްއެފް) ގެ ތިން ކެޓަގަރީއަކުން އެވޯޑު ހޯދާފަ އެވެ. އެގޮތުން އެންމެ މޮޅު ޑައިރެކްޓަރުގެ އެވޯޑު ހާސިލުކުރީ ފިލްމުގެ ޑައިރެކްޓާ މުނައްވަރު އެވެ.

އެ ފިލްމުގެ ބަތަލާ މަރިޔަމް އައްޒަ އަށް އެންމެ މޮޅު ލީޑް އެކްޓްރެސްގެ އެވޯޑު ހޯދައިރު އެންމެ މޮޅު ލީޑް އެކްޓަރުގެ އެވޯޑު ހާސިލުކުރީ ފިލްމުގެ ބަތަލު ޔޫސުފް ޝަފީއު (ޔޫއްޕެ) އެވެ.

''ކަމަނަ'' ފިލްމަކީ 200 އަށްވުރެ ގިނަ ހައުސްފުލް ޝޯއާއެކު ބޮޑު ތަރުހީބެއް ލިބުނު ފިލްމެކެވެ. ފިލްމުގެ ކާސްޓުންނަކީ އައްޒަ އާއި ޔޫއްޕެގެ އިތުރުން އައިމިނަތު ރަޝްފާ (އާޝާ)، މުހައްމަދު މަނިކު، އަހުމަދު ނިމާލު، މުހައްމަދު ރަޝީދު (ދަރާ) އަދި ނަތާޝާ ޖަލީލު އެވެ. ފިލްމުގެ ސްކްރިޕްޓް ތައްޔާރުކުރީ މަހްދީ އަހްމަދެވެ.

މި ފެސްޓިވަލްގައި ދިވެހި ފިލްމު ''ނޮވެމްބާ'' ގެ ސިނެމެޓޮގްރަފަރަށް ބެސްޓް ސިނެމެޓޮގްރަފާ އެވޯޑް ލިބުނު އެވެ.