ޖާހު އިންވެސްޓުމަންޓު ޕްރައިވެޓް ލިމިޓެޑުން "ދަ ގާޑެންސް"ގެ ނަމުގައި ހުޅުމާލޭގައި ހަދަމުން އަންނަ ފްލެޓުތައް ދީފައިވާ ތާރީހަށް ނުނިންމިގެން، މުއްދަތު އިތުރުކުރުމުންވެސް މަސައްކަތް ނުނިމޭތީ ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ)އިން ވަނީ އެއްބަސްވުން ބާތިލުކޮށް، އެތަން ހަވާލުކުރުމަށް އަންގާފަ އެވެ. 

އެ ފްލެޓްތަކުގެ މަސައްކަތް ކުރަމުން އަންނަތާ ހަ އަހަރަށް ވުރެ ގިނަ ދުވަސް ވެފައިވާއިރު، އެ އިމާރާތް ނިންމުމަށް އެންމެ ފަހުން މުއްދަތު އިތުރުކޮށްދީފައި ވަނީ މިދިޔަ ޖެނުއަރީގެ 27ގެ ނިޔަލަށެވެ. މި ތަނުގެ އެޕާޓްމެންޓުތައް ބޮޑެތި އަގުތަކުގައި އާންމުންނަށް ވިއްކާފައިވާތީ، ފައިސާ ދެއްކި ގިނަ ބަޔަކު ވަނީ މި މައްސަލައާ ކަންބޮޑުވުން ފާޅުކޮށް އެކި ފަހަރު މަތިން މުޒާހަރާވެސް ކޮށްފަ އެވެ. 

"ދަ ގާޑެންސް" ހަވާލުކުރުމަށް އެންގިކަން އިއުލާންކޮށް އެޗްޑީސީން ނެރުނު ބަޔާނުގައި ބުނީ ޖާހު އިންވެސްޓުމަންޓަށް އެންމެ ފަހުން ދިން ގާނޫނީ ނޯޓިހުގެ މުއްދަތު (45 ދުވަސް) ހަމަވި އިރު އެ ތަންތަނުގެ މަސައްކަތް ނިމިފައި ނުވާކަމަށެވެ. އެޗްޑީސީން ބުނީ އެ ތަން އަތުލުމަށް ފަހު މަސައްކަތް ނިންމާނެ ގޮތް ރާވައި، އެކަން ފައިސާ ދައްކާފައިވާ ފަރާތްތަކަށް އަންގާނެ ކަމަށެވެ. 

ފައިސާ ދައްކާފައިވާ މީހުންނަށް ވީ އެންމެ އަވަސް މުއްދަތެއްގައި އެޕާޓްމަންޓުތައް ހަވާލުކުރުމުގެ މަގު ފަހިކޮށްދޭނެ ކަމުގެ ޔަގީންކަންވެސް އެޗްޑީސީން ދެއެވެ. 

"ދަ ގާޑެންސް"ގެ މަސައްކަތް ނުނިމި ދިގުލައިގެން ގޮސް، އެކަމާ ކަންބޮޑުވުން ފާޅުކޮށް، އެ ކަމުގައި ގެއްލުންވީ މީހުން ތަމްސީލްކުރާ ލޯފާމް، ޝުނާނާ އެންޑް ކޯ އިން ރައީސް ޑރ. މުހައްމަދު މުއިއްޒަށް ސިޓީއެއްވެސް ފޮނުއްވިއެވެ. ފްލެޓުތައް ވިއްކަން ބޮޑެތި އަދަދުން ފައިސާ ނަގާފައިވާއިރު، އާއްމުންނަށް ގެއްލުން ނުވާނެ ގޮތަށް މަޝްރޫއު ކުރިއަށް ދޭތޯ ބެލުމަކީ އެޗްޑީސީގެ ޒިންމާއެއް ކަމަށާއި އަދި އެޗްޑީސީ އާއި ރިއަލް އެސްޓޭޓް ކުންފުނިތަކާއެކު ވެފައިވާ އެއްބަސްވުންތަކުގައި އެކަން ހައްލު ކުރެވޭނެ ނިޒާމެއް ބަޔާންކޮށްފައިވާ ކަމަށް އެ ސިޓީގައި ބުނެފައި ވެއެވެ. 

އެއްބަސްވުންތަކާ އެއްގޮތަށް ފްލެޓުތައް ނުނިންމާނަމަ އެގްރިމެންޓު ބާތިލްކޮށް އެހެން ކުންފުންޏަކާ ހަވާލު ކުރެވޭނެ ކަމަށް، އެއްބަސްވުންތަކުގައި ބުނާ ކަމަށާއި، ފްލެޓުތައް ނިންމަން އެހެން ކުންފުންޏަކާ ހަވާލުކުރަން ޖެހުމުން އެޗްޑީސީއަށް ލިބޭ ގެއްލުމަށް އެ ކުންފުނިތަކުން ޒިންމާވާން ޖެހޭނެ ކަމަށާއި އަދި އެއްބަސްވުން ބާތިލް ކުރާއިރު އެ ކުންފުނިތަކަށް އެއްވެސް މާލީ ބަދަލެއް ދޭން ނުޖެހޭނެ ކަމަށް ވެސް އެގްރިމެންޓުގައި ބުނާ ކަމަށް ރައީސަށް ފޮނުވި ސިޓީގައި ބުނެފައި ވެއެވެ. 

އޭރު ހަދަމުންދިޔަ 83 އެޕާޓްމަންޓްގެ ފެލްޓްތައް 30 ދުވަހުގެ ތެރޭގައި ނިންމައި، އެޗްޑީސީ އަށް ބިމުގެ އަގު ދައްކަން 30 ދުވަހުގެ ނޯޓިސް ވެސް އޭރު ދިނެވެ. އެކަމަކު މުއްދަތު ހަމަވިއިރު ފައިސާ ދައްކާފައި ނުވާއިރު، މަސައްކަތް ވެސް ނުނިންމަ އެވެ. އެންމެ ފަހުން މުއްދަތަކަށް ފަހު މުއްދަތެއް ދީ، ޖާހުގެ އެއްބަސްވުން އެޗްޑީސީން އެ ބާތިލްކުރީއެވެ.