މުންބާއީގައި ބޭއްވުނު އޭޝިއާގެ އެންމެ ފާހަގަކޮށްލެވޭ މިއުޒިކް މުބާރާތްތަކުގެ ތެރެއިން އެއް މުބާރާތް ކަމުގައިވާ ބެޓަލް އޮފް ދަ ބޭންޑްސް އިންޓަނޭޝަނަލް 2025 ގައި ދިވެހިރާއްޖޭގެ ބޭންޑް "ޓޫ އޮފް އަސް" އިން ތިންވަނަ ހޯދުން ފާހަގަކުރުމުގެ ގޮތުން ބާއްވާ ޝޯއަށް ޓިކެޓު ގަންނަ ފަރާތްތަކަށް ލަކީ ޑްރޯގެ އިނާމެއް ލިބޭ ގޮތަށް ޓިކެޓު ވިއްކަން ފަށައިފި އެވެ.

ޓިކެޓު ވިއްކަމުން ދަނީ އޮންލައިންކޮށެވެ.

އެ ބޭންޑުން ބުނި ގޮތުގައި ތިން ކެޓެގަރީ އަކުން ޓިކެޓު ވިއްކުމަށް ހަމަޖެހިފައިވެެއެވެ. އަދި ޓިކެޓު ގަންނަ މީހުންގެ ތެރެއިން ގުރުއަތުން ހޮވޭ ތިން ފަރާތަކަށް ފައިސާގެ އިނާމު ދިނުމަށް ހަމަޖެހިފައިވެ އެވެ. އެއީ ކޮންމެ ކެޓަގަރީއަކުން އެއް ޓިކެޓަކަށެވެ.

• ޕްލެޓިނަމް: ޓިކެޓުގެ އަގަކީ 5000 ރުފިޔާ، ނަސީބުވެރި ފަރާތަށް ދެނީ 10،000 ރުފިޔާ
• ގޯލްޑް: 3،000 ރުފިޔާ، ނަސީބުވެރި ފަރާތަށް ދެނީ 5،000 ރުފިޔާ
• ބްރޯންޒް: 1،000 ރުފިޔާ، ނަސީބުވެރި ފަރާތަށް ދެނީ 2،000 ރުފިޔާ

ޕްލެޓިނަމް ޓިކެޓު ގަންނަ ފަރާތްތަކަށް ލިބޭ ހިދުމަތްތަކުގެ ތެރޭގައި ހިމެނެނީ ވީއައިޕީ ސީޓިން، ސްވެނިއާ، ސްނެކްސް، ރޭގަނޑުގެ ކެއުމުގެ އިތުރުން ބޭންޑާ ބައްދަލުކޮށް ވާހަކަ ދެއްކުމުގެ ފުރުސަތު ލިބެެއެވެ.

ގޯލްޑަން ޓިކެޓު ގަންނަ ފަރާތްތަކަށް ލިބޭނެ ހިދުމަތްތަކަކީ ހަދިޔާ، ސްނެކްސް އަދި ބުއިމެވެ. ބްރޯންޒް ޓިކެޓަށް ހުރި ހިދުމަތަކީ ޝޯއަށް ވަނުމުގެ ފުރުސަތާއި ސްވެނިއާ އެކަންޏެވެ.

އެ ބޭންޑުން ބުނި ގޮތުގައި ޝޯ އޮންނާނީ މި މަހުގެ 23 ވަނަ ދުވަހުގެ ރޭ އޮލިމްޕަސްގަ އެވެ. ޝޯ ފަށާނީ އެ ރޭ 8:00 ޖަހާއިރުގަ އެވެ. މިއީ މި ބޭންޑުން މާލޭގައި ބާއްވާ ފުރަތަަމަ ލައިވް މިއުޒިކް ޝޯ އެވެ.