"މަސްޖިދުލް އުއްމުލް މުއުމިނީން ޢާޢިޝާ ރަޞިޔައްﷲ ޢަންހާ" މިސްކިތުގެ ބިންގާ ރައީސުލް ޖުމްހޫރިއްޔާ ޑރ.މުހައްމަދު މުޢިއްޒު މިއަދު އަޅުވައިދެއްވާފިއެވެ. މިރަސްމިއްޔާތުގައި އަނބިކަނބަލުން ސާޖިދާ މުޙައްމަދު އާއީ ދަޢުލަތުގެ ވަޒީރުންވެސް ހިމެނި ވަޑައިގެންފައި ވެއެވެ. 

މ.ޠައިބާ ފަޞީހަތުއް ޝައިހު އިސްމާޢީލް މުޙައްމަދުގެ ދީލަތި އެހީ އާއި އެކު މި މިސްކިތް ބިނާކުރުމައް ވަނީ   އަލް މަދީނާ އިންވެސްޓްމެންޓަކާ ހަވާލުކުރެއްވިފައެވެ. މިސްކިތް ބިނާކުރަނީ ހުޅުމާލެ ފޭސް(1) ގެ ރެޑްވޭވް ކައިރީ މީގެ ކުރިން އިން ވަގުތީ މިސްކިތް ހުރިތަނުގައެވެ. 

ޖާގައިގޮތުން  މި މިސްކިތަކީ ފިރިހެނުންނާއި އަންހަނުންނަށްވެސް ނަމާދު ކުރެވޭ ގޮތައް އަޅާ  މިސްކިތެކެވެ. މިސްކިތަކީ އެތެރެއާއި ބޭރުގައި މުޅި ޖުމްލަ 2000 ވަރަކަށް މީހުންނަށް ނަމާދު ކުރެވާ ގޮތައް ފަރުމާކޮށް އެޅޭ މިސްކިތެކެވެ.

މިސްކިތް ބިނާ ކުރެވިގެންދާއިރު މި މިސްކިތް ވެގެންދާނީ ދިރާސާ ކުރަން ބޭނުންވާ ކިޔަވާކުދިންނަށާއި، އެސައިމަންޓް ހެދުމަށް ފޮތް ކިޔަން ބޭނުންވާ ކުދިންނަށް ތިބެވޭ ގޮތަށް ތައްޔާރު ކޮށްފައިވާ މިސްކިތަކަށެވެ. ފާހަގަ ކޮށްލަންޖެހޭ ކަމަކީ  މި މިސްކިތަކީ ލައިބްރަރީއަކާއި އެކު ހުޅުމާލޭގައި މިގޮތައް އެޅޭ ފުރަތަމަ މިސްކިތެވެ.  

މިސްކިތުގެ އެތެރޭގައި ލައިބްރަރީއެއްވެސް އިންނަގޮތަށް މިސްކިތް ބިނާ ކުރާއިރު އަންހެނުންނަށް ޚާއްސަ ފާޚާނާވެސް ހުންނާނެއެވެ. މި މިސްކިތް ފުރިހަމަ ސޯލާ ނިޒާމަކުން ކަރަންޓުދެވި އޭސީ ކުރެވޭނެއެވެ.

މިއާއިއެކި އަމާޒަކީ އެއް އަހަރުތެރޭ މިސްކިތް ނިންމުމަށްފަހު 2026 ވަނަ އަހަރުގެ ރަމަޞާން މަހަށް މިސްކިތް ހުޅުއްވައި ދެއްވާ ބޭނުންކުރެވޭ ވަރު ކޮށްދިނުން ކަމަށް މ.ޠައިބާ ފަޞީހަތުއް ޝައިހު އިސްމާޢީލް މުހައްމަދު ވިދާޅުވެފައިވެއެވެ. މިސްކިތް ހުޅުއްވުމަށްފަހު މިސްކިތުގައި ދަރުސް ދިނުމާއި ޤުރުޢާން ހިތުދަސް ކުރުމުގެ މަޝްރޫޢުތަށް ކުރިއަށް ގެނެދެވާނެ ކަމަށްވެސް ވިދާޅުވެފައިވެއެވެ.