އިއްޔެއަކީ ބައިނަލްއަގްވާމީ ފެންވަރުގައި ފާހަގަކުރާ އުފާވެރިކަމުގެ ދުވަހެވެ. މި ދުވަސް ދުނިޔޭގައި ފާހަގަކުރަންފެށީ ކޮންމެ މީހެއްގެވެސް އާންމު ދިރިއުޅުމުގައި އުފާވެރިކަމަކީ ކިހާ މުހިންމު ކަމެއްކަން އަންގައިދިނުމަށެވެ. މި އުފާވެރި ދުވަހުގެ މުނާސަބާގައި މި ދުވަހަށް ބަލާލަމާ ހިނގާށެވެ.

2012 ވަނަ އަހަރުގެ ޖޫން މަހުގެ 28 ވަނަ ދުވަހު ޔުނައިޓެން ނޭޝަންސް ޖެނެރަލް އެސެންމްބްލީގެ މެންބަރުން ފާސްކޮށް ދުނިޔޭގައި މި ދުވަސް ފާހަގަކުރަން ނިންމިއެވެ. އެއަށްފަހު ދުނިޔޭގެ ހުރިހާ ގައުމެއްގައި މި ދުވަސް އަންނަނީ ކުލަގަދަކޮށް ފާހަގަކުރެވެމުންނެވެ. 

2012 ވަނަ އަހަރު މިދުވަސް ފާހަގަކުރުމުގެ ކުރިން "ހެޕިނަސް ފައުންޑޭޝަން"ގެ ރައީސް ލުއިސް ގެލާޑޯއާއި ޖޭމީ އިލިއަންވެގެން "ހެޕީޓަލިސަމް" ކިޔާ ކޭމްޕެއް ޔުނައިޓެޑް ނޭޝަންސްގައި ހިންގަންފެށިއެވެ. 2006 ވަނަ އަހަރުން ފެށިގެން 2011 ވަނަ އަހަރާއި ހަމައަށް މި ކޭމްޕް ކުރިއަށް ގެންދިޔައެވެ. އެއަށް ފަހު 2011 ވަނަ އަހަރު ލުއިސް ގެލާޑޯ ޔުނައިޓެޑް ނޭޝަންސް ޖެނެރަލް އެސެމްބްލީއަށް މި ދުވަސް ބައިނަލްއަގްވާމީ ފެންވަރުގައި ފާހަގަކުރަން ބިލެއް ހުށައެޅިއެވެ.    

2015 ވަނަ އަހަރު މިދުވަސް ފާހަގަކުރުން އިތުރަށް ފުޅާކޮށް ދިރިއުޅުން އުފާވެރިކުރުމަށް 17 ތަނެއްގައި ދެމެހެއްޓެނިވި ތަރައްގީ ލަނޑުދަނޑިތަކެއް ކަނޑައެޅިގެން ދިޔައެވެ. މި ތަރައްގީ ލަނޑުދަނޑިތަކުގެ ތެރޭގައި ފަގީރުކަން ނައްތާލުމާއި ތަފާތުކުރުން ކުޑަކުރުމާއި ދުނިޔެ ރައްކާތެރިކުރުން ހިމެނުނެވެ.

ހީލާށެވެ.. ހީލުމަކީ ސަދަގާތެކެވެ. ތިމާގެ ފަރާތުން އަނެކާއަށް ރައްދުކުރާ ހިނިތުންވުމުގެ ސަބަބުން އަނެކާއަށްވެސް ހިތްހަމަޖެހުމެއް ލިބިގެންދެއެވެ. ހީލުމުން އެ ދެވޭ އަގުހުރި ހަދިޔާއަކީ ތާއަބަދު އަނެކާގެ ހިތުގައި ބިންވަޅުނެގިފައިވާ ކަމަކަށްވެސް ވެދާނެއެވެ. 

ހީލާށެވެ..ހީލުމަކީ ވަރަށް ތަފާތު މާނަތަކެއްވެސް އޭގައި އެކުލެވިގެންވާ އެއްޗެކެވެ. މީހެއްގެ ހިނިތުންވުމުގައި އެމީހެއްގެ ހިތްދަތިކަންވެސް ފޮރުވިގެން ވުމަކީވެސް އެކަށީގެންވާކަމެކެވެ. މިފަދަ ދުވަހެއް ދުނިޔޭގައި ފާހަގަ ކުރަމުން ދާއިރު ފަލަސްތީނުގެ ލޮބުވެތި މުސްލިމް އަހުން އުފަލެއްނެތި އެ ހޭދަކުރާ ހިތްދަތި ދިރިއުޅުން ހަނދާން ނައްތާ ނުލާށެވެ. 

އަދުގެ ޝިއާރާ އެއްގޮތައް ހީލުމަށްފަހު އެހީލުން އަނެކާއަށްވެސް ހަދިޔާ ކުރުމަށްޓަކައި މި އަހަރު ފަލަސްތީނުގެ މުސްލިމު ކުޑަކުދިންނާ އެ ގައުމުގެ ރައްޔިތުންނަށް ހިނިތުންވުމެއް ދޭން ހިނގާށެވެ. މި ރަމަޟާންމަހު އަހަރެމެން އެންމެހާ ދިވެހީން ވެގެން ވެވެންއޮތް ކުޑަ މިންވަރަކަށް ނަމަވެސް އެހީވެ އެ މީހުންނަށް ހިނިތުންވުމެއް ދިނުމަށް އަތުކުރި އޮޅާލަމާ ހިނގާށެވެ. 

ހަނދާން ނައްތާ ނުލާށެވެ. ހިނިތުންވުން ހަދިޔާކުރަން ފަށާނީ އެންމެ ގާތުންނެވެ. މައިންބަފައިންނާއި އެއްބަޑު އެއްބަފާ މީހުންނާއި އާއިލާގެ މީހުނާއި ގާތް ރަހުމަތްތެރިންނުން ފަށަން ހިނގާށެވެ. ދުނިޔެއަކީ އުފާވެރި ތަނަކަށް ހެދޭނީ ތިމާ އާއި ހިސާބުން ކަންތައްތަކެއް ބަދަލުކުރަން މަސައްކަތް ކޮށްގެންނެވެ. ހީލާށެވެ. އަދި ހިނިތުންވުން ހަދިޔާކުރަމާތޯއެވެ.