ބާޒާރުގައި ކާށީގެ އަގު އިންތިހާއަށް މައްޗަށް ދިއުމުން އަގު ތިރިކުރުމަށްޓަކައި ހޯލްސޭލަރުންނަށް ހާއްސަކޮށްގެން އެސްޓީއޯއިން ކާށީގެ ބޮޑު ޝިޕްމެންޓެއް ގެންނަން ނިންމައިފިއެވެ. 

ބާޒާރުގައި ކާއްޓެއްގެ އަގު މިހާރު އުޅެނީ 30-65 ރުފިޔާއާ ދެމެދުގެ އަގެއްގައެވެ. ގިނަ ތަންތަނުން ކާށި ލިބޭކަށްވެސް ނުހުރެއެވެ. 

އެސްޓީއޯއިން ބުނި ގޮތުގައި ކާށީގެ އަގު ތިރިކުރުމަށް އެ ކުންފުނިން ވަނީ ޕީޕަލްސް ޗޮއިސް މެދުވެރިކޮށް 20 ރުފިޔާގެ ރޭޓުން ސީދާ އާއްމުންނަށް ކާށި ވިއްކަން ފަށާފައި ކަމަށެވެ. 

އެސްޓީއޯ އިން މިހާރު ވަނީ، ބާޒާރުގައި ކާށީގެ އަގު ތިރިކުރުމަށްޓަކައި ވިޔަފާރިވެރިންނަށް ބޭނުންވާ މިންވަރަށް ކާށި އިމްޕޯޓް ކޮށްދިނުމަށް ނިންމައި، ކާށީގެ ސްޓޮކް ބުކްކުރުމުގެ ފުރުސަތު ހުޅުވާލައިފަ އެވެ. އެކަމުގެ ބޭނުމަކީ ރާއްޖޭގެ ބާޒާރަށް މި ވަގުތު ބޭނުންވެފައިވާ ކާށީގެ ޖުމްލަ ޑިމާންޑް ދެނެގަނެ، އެއާ އެކަށޭނަ މިންވަރަށް ސަޕްލައި އިތުރުކުރުން ކަމަށް އެ ކުންފުނިން ބުންޏެވެ. 

އެސްޓީއޯއިން ބުނީ ކާށީގެ ސްޓޮކަށް ޝައުގުވެރިވާ ވިޔަފާރިވެރިން އެސްޓީއޯ ޕީޕަލްސް ޗޮއިސްގެ 3012575 ނަންބަރަށް ގުޅުމުގެ އިތުރުން 7291124 އަށް ވައިބާ ކޮށްގެންވެސް ބުކްކުރެވޭނެ ކަމަށެވެ. 

އެސްޓީއޯ އިން ބުނީ ކާށިގެ ޝިޕްމެންޓް ކޮންމެ ދިހަ ދުވަހަކުން ބުކިން ލިބޭވަރަކަށް ގެންނާނެ ކަމަށާއި އެކަށީގެންވާ އަގެއްގައި އެސްޓީއޯގެ ގުދަނާހަމައަށް ގެނެސްދީ ނެގޭނޭ އިންތިޒާމުތައް ހަމަޖައްސައި ދޭނެ ކަމަށެވެ. 

މީގެ އިތުރުން ގެންނަ މުދަލަށް ފައިސާ ދައްކަންޖެހޭނީ ޝިޕްމަންޓް އައުމުން ދިވެހި ރުފިޔާއިން ކަމަށްވެސް ބުންޏެވެ.