ޒަމާނުއްސުރެން އަހަރެމެން މުސްލިމުންނަށް އީދު ދުވަހަކީ ކުލަތަކުން ޖަރީކޮށް ފެން ޖެހުމާއި ކުލަ ޖެހުން އޮންނަ ގައުމެކެވެ. އެކި ކަހަލަ ކުޅިވަރުތައް ކުޅެ އީދުގެ މަޖާ އެންމެ ފުރިހަމައަށް ނަގަމުން އަންނަ ގައުމެކެވެ. މި އަހަރުގެ ފިތުރު އީދުވެސް މާލެއާއި ހުޅުމާލޭގެ މަގުތަކުން ފެންނަމުން އަންނީ ރީތި ކުލަބޮކިތަކުން ދިއްލައި ޖަރީކޮށްފައި ހުރިތަނެވެ. 

އީދު ދުވަސް ފެށިގެން ދިޔައީ ބޮޑު ޖަމާއަތުގެ އީދު ނަމާދުންނެވެ. އީދު ނަމާދަށް ރާއްޖޭގެ ލޮބުވެތި ރައީސުލްޖުމްހޫރިއްޔާ ޑރ. މުހައްމަދު މުއިއްޒުވެސް ވަޑައިގެންނެވިއެވެ. ނަލަވެލައިގެން އީދު ނަމާދަށް ގޮސް ތިބި މީހުންގެ ބޮޑު ޖަމާއަތް ބަލާލަން އެހާމެ ހިތްގައިމެވެ. އީދު ނަމާދަށްފަހު އީދު ސަލާން ކުރުންވެސް ވަނީ ކުރިއަށް ގެންގޮސްފައެވެ. 

އިހު ޒަމާނުގައި އީދު ދުވަހުގެ ތައްޔާރީތައް އީދުގެ އެއްދުވަސް ކުރިން ހަނދުބެލުމަށް ތައްޔާރުވާ ހިސާބުން ފެށެއެވެ. ދިވެހިންނަކީ ކުލަގަދަ ހަފްލާތަކުގައި ކެއްކުމާއި ކެއުން ދޫކޮށްލާނެ ބައެއް ނޫނެވެ. ކާފަމެން މާމަމެންގެ ޒަމާނުގައި އެކި ކަހަލަ ބޮނޑިބަތުން މޭޒުމަތި ހުންނާނީ އީދު ދުވަހު ފުރާލާފައެވެ. ރޭގަނޑު ހަނޑޫ ފެނަށްލާނެއެވެ. ހެނދުނު ވަރުގަދަ ހަނޑުލު ކުޅި ބޯކިބަލެއް ނެތީ ވިއްޔާ ދެން ސުފުރާމަތި ފަޅެއް ނުފިލާނެއެވެ. އީދު ދުވަސްކަން އިއުލާންކުރާ ހިސާބުން މީހުން އަވަސްވާނީ ގޭގެއަށް ގޮސް އީދު މަރުހަބާ ކިޔުމުގެ ކަންތައްތަކަށެވެ. 

ޒަމާން މިއަދު މިވަނީ ތަރައްގީވެފައެވެ. އިހުޒަމާނުގައި އެކައްކާ އެކި ކަހަލަ ބޮނޑިބަތްތައް މިއަދު ޒަމާނީވެއްޖެއެވެ. މިއަދު އެކި ގައުމުތަކުގެ އެކި ކަހަލަ ފޮނިކާތަކެތި ރާއްޖޭގެ އީދު ދުވަހުގެ ސުފުރާމަތިން ފެންނނެއެވެ. ކުޅި ބޯކިބަލުގެ ބަދަލުގައި ކޮންމެސް ކަހަލަ އާ ވައްތަރެއްގެ ކުޅިކާތަކެތިވެސް ފެންނާނެއެވެ. ދިވެހިންގެ ކެއުމާއި، ކެއްކުން ނެތިގެން ދިޔައީކީ ނޫނެވެ. ނަމަވެސް މިއަދު މި ކަންކަން ޒަމާނާއި އެއްގޮތަށް ބަދަލުވީއެވެ. ދެން މި ޒަމާނަކީ ޓޭކްނޮލޮޖީގެ ޒަމާނެއްކަމުން ގޭގެއަށް ގޮސް މީހުނަށް މަރުހަބާ ކިޔުމުގެ ސަގާފަތު ބަދަލުވެގެން މިދިޔައީ ފޯނުގެ ޒަރިއްޔާއިން މަރުހަބާ ކިޔުމުގެ ކަންކަން ނިންމާލުމެވެ. އެކަމަކުވެސް މާމަ އެފިހާ ކުޅިބޯކިބަލުގެ ރަހަ އަދިވެސް ފިލާ ނުދާނެއެވެ. އީދަށް އެ ހުންނަ މުގާއި ސާގާއި ފަޅޮލާއި،ހަނޑުލު ބޮޑިބަތް ވަރެއް އަދިވެސް ހަމަ އަހަރެމެން ދިވެހިންނަކަށް ނޯންނާނެއެވެ.  

އީދު ދުވަހުގެ ކުޅިވަރުތައްވެސް މިއަދު މިވަނީ ބަދަލުވެފައެވެ. އިހު ޒަމާނުގައި ފެންކުޅިންނާއި ރަށްރަށުގައި ކުޅޭ ތިންމުގޯލި ކަހަލަ ކުޅިވަރުތައް ކުޅުނަސް މިހާރު ފެންނާނީ އާ ވައްތަރުގެ ކުޅިވަރުތައް ކުޅޭ ތަނެވެ. މި ތަރައްގީވެފައިއޮތް އަދުގެ ޒަމާނުގައި ފެނުގެ ބަދަލުގައި ޖަހާނީ އެކި ކަހަލަ ކުލަތަކެވެ. މިއަދު މީހަކަށް މަގެއްމަތިން ކުލަކޮޅެއްނެތި ހިނގާ ނުލެވޭއެވެ.

 

މި އުފާވެރި އީދު ދުވަހު އަހަރެމެން މަސައްކަތްކުރަންވީ އާއިލާ އާއި ރައްޓެހިންނާއި އޮތް ގުޅުންތައް އިތުރަށް ވަރުގަދަ ކުރެވޭތޯއެވެ. ދެވުނު މިންވަރަކުން އީދު ހަދިޔާ ދިނުމަށް މަސައްކަތް ކުރަންވާނެއެވެ. ދޭދޭ މީހުންގެ ގުޅުންތައް ރަނގަޅުކުރުމަށް މިއަދަކީ ރަނގަޅު ދުވަހެކެވެ. އެކުގައި ކިޔަވަން އުޅުނު ކުދިންނަށް ގުޅާލާ ހާލު ބަލާލަން މިއަދަކީ ރަނގަޅު ދުވަހެވެ. ދުރުގައި ތިބި އާއިލާ މަތިން އަދިވެސް ހަނދާންވާކަން ލޯބިވާކަން އަންގާދޭން މިއަދަކީ ހަމަ އެންމެ ރަނގަޅު ދުވަހެވެ.   

ފިތުރު އީދު ދުވަސް ހުރިހާ މުސްލިމުންނަށްވެސް މި އަންނަނީ ބަރަކާތްތެރި ރަމަޟާންމަހުގެ ރޯދައަށްފަހު އަންނަ އުފަލެއްގެ ގޮތުގައެވެ. ނަމަވެސް އީދު ދުވަސް ކިތަންމެ ކުލަގަދަކޮށް ފާހަގަ ކުރި ނަމަވެސް ހަނދާން ނައްތައިނުލާށެވެ. ފިތުރު އީދު ދުވަހަށްފަހު ދެންއޮތީ އަނެއްކާވެސް ބަރަކާތްތެރި މައްސަރެކެވެ. ކުރިއަށް މި އޮތީ ހަރޯދަވެރިންގެ ރޯދަ އަންނަ ދުވަސްތަކެވެ. ހަ ރޯދައިގެ ސަވާބު ހިފުމަށް ހަނދާން ނައްތައިނުލާށެވެ.