ކ. ގުޅީގެ ބިން ހިއްކުމާއި ގޮނޑުދޮށް ހިމާޔަތްކުރުމުގެ އަމަލީ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމްޓީސީސީން ފަށައިފިއެވެ.

ގުޅީގެ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަސައްކަތް އެމްޓީސީސީއާ 2023 ވަނަ އަހަރު ހަވާލުކުރި ނަމަވެސް އެ މަސައްކަތުގެ އަމަލީ މަސައްކަތް ފަށާފައެއް ނުވެއެވެ. 

އެމްޓީސީސީން ގުޅީގައި ރޭ ބޭއްވި ރަސްމިއްޔާތެއްގައި އެ ރަށުގެ ބިން ހިއްކެވުމާއި ގޮނޑުދޮށް ހިމާޔަތްކުރުމުގެ މަޝްރޫއު ފައްޓަވައިދެއްވީ، އެމްޓީސީސީގެ ސީއީއޯ ރިޓަޔާޑް ޑީސީޕީ އަހުމަދު ސައުދެވެ.

ގުޅީ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއުގެ ދަށުން އެ ރަށުން 10.15 ހެކްޓަރުގެ ބިން ހިއްކާނެއެވެ. އަދި 940 މީޓަރުގެ ހިލަ ރިވެޓްމަންޓް ޖަހައި 362 މީޓަރުގެ ޖީއޯބޭގް ރިވެޓްމަންޓް ޖަހައި 88 މީޓަރުގެ ގްރޮއިންވެސް ޖަހާނެއެވެ.  

އެ މަޝްރޫއަކީ 89.3 މިލިއަން ރުފިޔާގެ މަޝްރޫއެކެވެ.

ގުޅީގެ ބިން ހިއްކުމުގެ މަސައްކަތް ކުރިއަށްގެންގޮސް ނިންމައިދެއްވުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.