ކޮންމެ ސަރުކާރެއްގައި ވެސް ލާމަރުކަޒީ ނިޒާމު ހަރުދަނާ ކުރުމުގެ ވާހަކަ ވަރަށް ގަދައަށް ދައްކާނެ އެވެ. ހާއްސަކޮށް އެމްޑީޕީންނެވެ. އެމްޑީޕީ އެއީ އެ ނިޒާމުގެ މަންމައޭ ވެސް ބުނާނެ އެވެ. ބައްޕައޭ ވެސް ކިޔަ އެވެ. އަދި އަންހެނުންގެ ހައްގުތަކުގެ ވާހަކަ ވެސް ނިކަން ބާރުލާފައި އެ ޕާޓީގެ ވެރީން ވާހަކަ ދައްކަވާނެ އެވެ.

އެކަމަކު އެނގޭ ހެއްޔެވެ؟ ރަށްރަށުގައި އަންހެނުންގެ ތަރައްގީއަށް މަސައްކަތްކުރާ ކޮމިޓީތައް މިދިޔަ އެމްޑީޕީގެ ސަރުކާރުގައި އުފެއްދީ ހަމަ ނަމެއްގަ އެވެ. އެ ކޮމިޓީއަށް މާ ބޮޑު ބާރެއް ނެތެވެ. ކައުންސިލްތަކަށް ލިބޭ ބަޖެޓުން ވެސް ވަކި މާ ބޮޑު އެއްޗެއް ނުލިބެ އެވެ. ކުޑަމިނުން ކޮމިޓީ މެންބަރުންނަށް ދެނީ އާދައިގެ މަހު އެލަވަންސެކެވެ. ފުލް ޓައިމް ސްޓާފުންނަށް ނުވާތީ ރޯދަ މަހު އެލަވަންސް ވެސް ނޯވެ އެވެ.

ނަމަވެސް މި ރޯދަ މަހު އެ ކަން ބަދަލުވީ އެވެ. ބައިނަލްއަގުވާމީ އަންހެނުންގެ ދުވަސް މި ފަހަރު މި އައީ ވެސް މި އަންހެނުންނަށް ފުރަތަމަ ފަހަރަށް ރޯދަ އިނާޔަތް ލިބިފައި ވަނިކޮށް، ރޯދަ މަހުގެ ތެރެއިންނެވެ.

ލާމަރުކަޒީ ގާނޫނުގައި އަންހެނުންގެ ކޮމިޓީތަކުގެ މެންބަރުންނަށް ރޯދަ އެލަވަންސް ލިބޭނެ ކަން ސާފުކޮށް ބަޔާން ކުރީ އެވެ. މަޖިލިސް މެންބަރުންގެ ނިންމެވުމުގެ ސަބަބުން މި ގެނައި ކުޑަ ބަލަދުން ވެސް ބޮޑު އަސަރެއް އެ އަންހެން ވެރީންނަށް ކުރާނެ އެވެ.

އަންހެނުންގެ ކޮމިޓީއަށް، އެ ކޮމިޓީ ނިސްބަތްވާ ރަށު ކައުންސިލަށް ސަރުކާރުން ކަނޑައަޅާ ބަޖެޓުގެ ފަސް ޕަސެންޓް ހާއްސަކުރަން ޖެހޭ ގޮތަށް ވެސް ލާމަރުކަޒީ ގާނޫނަށް ވަނީ ބަދަލު ގެނެސްފަ އެވެ.

އެކަމަކު މިއީ ވެސް ކުޑަ ވަރެކެވެ. އެ ކަން ވެސް ގަބޫލުކުރަން ޖެހެ އެވެ.

އަންހެނުންގެ ހައްގުތަކަށާއި ބާރުވެރިކުރުމަށް އަދިވެސް ގިނަ ސިޔާސަތުތަކެއް އެކުލަވާލަން އެބަ ޖެހެ އެވެ. ވަޒީފާގެ މާހައުލަކީ އާއިލީ އެކުވެރި މާހައުލަކަށް ހެދުމާއި، ދައުލަތް ހިންގުމުގައި އަންހެނުންގެ ބައިވެރިވުން އަދިވެސް އިތުރުކުރަން އެބަ ޖެހެ އެވެ.

އަންހެނުންނަކީ މި ގައުމުގައި ވެސް ދެބައިކުޅަ އެއް ބަޔެވެ. މުޅި ވަތަނުގެ މަސްލަހަތަށް ހަދާ ސިޔާސަތުތައް ވަށައިޖެހޭ ގޮތަށް ހިނގާނީ އާބާދީގެ ދެބައިކުޅަ އެއްބައި ބައިވެރިވެގެން ސިޔާސަތުތައް އެކުލަވާލެވޭހާ ވަރަށް އަންހެނުންގެ ބައިވެރިވުން ދައުލަތް ހިންގުމުގައި ހިމަނަން ޖެހެ އެވެ. ދައުލަތުގެ އިސް ސަފުގައި ވެސް އަންހެނުން ފެންނަން ޖެހެ އެވެ.