މިދިޔަ ސަރުކާރުން 'ގެދޮރުވެރިޔާ ސްކީމް' ހިންގީ ރިޔާސީ ދައުރުގެ ފަހުކޮޅުގަ އެވެ. އިންތިހާބަށް ވޯޓުކޮޅެއް ލިބޭތޯ އެވެ. އެޔެއް، މިޔެއް ނުބަލާ ހިންގި ކަމުގެ ތުހުމަތު އޭރު ވެސް އޮތެވެ. އެންމެ ފަހުން ރިޔާސީ އިންތިހާބުން ވެސް އެމްޑީޕީ ބަލިވީ އެވެ.

މާލޭގައި ދިރިނޫޅޭ އެތައް ބަޔަކަށް ފްލެޓް ދިން ކަން ފަޅާ އަރައިގެން އެންޓި ކޮރަޕްޝަން ކޮމިޝަން (އޭސީސީ) ން ވެސް މައްސަލައިގެ ތެރެއަށް ވަދެ ފްލެޓް ދިން ލިސްޓުގައި ތިބި މީހުންގެ ތެރެއިން 1/2 އަށް ވުރެ ބޮޑު ބަޔެއް އެއީ ޝަރުތު ހަމަނުވާ ކަމަށް ބަޔެއް ކަން ހާމަކުރި އެވެ.

ގެދޮރުގެ ވުޒާރާއިން ލިސްޓު މުރާޖާކޮށްފައި ނެރުނީ ކޮރަޕްޝަން ބަލާ ކޮމިޝަނުން ދިން އިރުޝާދުތަކާ އެއް ގޮތަށެވެ.

މިހާރު އެމްޑީޕީން މި ދަނީ މި ސަރުކާރަށް އެތައް ތުހުމަތެއް ކުރަމުންނެވެ. އިއްޔެ ނޫސްވެރިންގެ ބައްދަލުވުމެއް ބާއްވާފައި އެމްޑީޕީގެ ސަރުކާރުގައި ފްލެޓް ދޫކުރުމުގެ މަސައްކަތް ހަވާލުކުރި ކޮމިޓީގެ ޗެއާ އަކްރަމް ކަމާލުއްދީނާއި، އެމްޑީޕީގެ ނައިބު ޗެއާ އިބްރާހީމް ވަހީދު ތިއްބަވައިގެން ހެއްދެވިހާ ވާހަކަތަކަށް ސަރުކާރުން ރައްދު ދިނީ ވަރަށް ތަފްސީލްކޮށެވެ. ވަރަށް ވަރުގަދައަށެވެ.

------

1 - އެމްޑީޕީގެ ތުހުމަތު: 2018ވަނަ އަހަރު ވެރިކަން ބަދަލުވުމުގެ އިންތިގާލީ މަރުހަލާގައި އޭރުގެ ގެދޮރުގެ ވަޒީރު، މިހާރުގެ ރައީސް ޑރ. މުހައްމަދު މުއިއްޒު އެއްބާރުލުން ނުދެެއްވާ ކަމަށް.

- ވުޒާރާގެ ރައްދު: 2018ގައި އިއުލާން ކުރެވުނު 7000ފްލެޓް ލިބޭ ފަރާތްތަކުގެ ލިސްޓަށް ބެލުމެއްނެތި ފޯމް ލީ ހުރިހާ ފަރާތެއްގެ ފޯމު އެމްޑީޕީ ސަރުކާރުން ވަނީ އިވެލުއޭޓްކޮށް ފްލެޓް ލިބޭ ފަރާތައް އަލުން ކަނޑައަޅާފައި. އެހެން ނަމަވެސް މިފަހަރު ލިބޭ ކަމަށް ކަނޑައެޅި ފަރާތްތަކުގެ ފޯމު ވެރިފައިކުރީ އޭސީސީގެ އެންގުމަށް އަމަލު ކުރުމަށް.

2 - އެމްޑީޕީގެ ތުހުމަތު: 2018 ހިޔާ ފްލެޓްގެ ޑޭޓާބޭސް އޭރު ގެއްލުވާލައިފައި އޮތްކަމަށް އަދި އެންސީއައިޓީ އިން މަސައްކަތް ކޮށްގެންވެސް ރިކަވާ ކުރެވިފައި ނުވޭ.

- ވުޒާރާގެ ރައްދު: ވެރިކަން ބަދަލުވިއިރު ހުރިހާ މައުލޫމާތެއް ހުންނާނެ. އެ ގެއްލުމުގެ ޒިންމާ އެމްޑީޕީ ސަރުކާރުން ނަގަންޖެހޭނެ.

3 - އެމްޑީޕީގެ ތުހުމަތު: 2023 ވަނަ އަހަރު އިންތިގާލީ މަރުހަލާގައި ހުރިހާ ކަމެއް ހޭންޑްއޯވާ (ހަވާލު) ކޮށްފައިވާ ކަމަށް

- ވުޒާރާގެ ރައްދު: ހޭންޑްއޯވާ ކޮށްފައި ނުވާނެ. ޓްރާންސިޝަންގައި މައުލޫމާތު ދިނުމަށް ދެކޮޅު ހަދައި ވެރިކަން ބަދަލުވުމަށް 2 ދުވަހަށް ވެފައި ވަނިކޮށް ލިސްޓް ނެރެ އެފަރާތާއިއެކު 1 ސަފުހާގެ އެއްބަސް ވުމުގައި ސޮއި ކުރުވާ ހެދީ އެކަން އެގޮތައް ނުކުރުމަށް އެދިފައި ވަނިކޮށް.

4 - އެމްޑީޕީގެ ތުހުމަތު: އުސޫލުން ޕޮއިންޓް ދޭނަމަ ޝަރުތު ހަމަވާ އެއްވެސް ފަރާތަކަށް 30 މާކުހަށް ވުރެ މަދުން މާކްސް ނުލިބޭނެ ކަމަށް. މި ސަރުކާރުން ނެރުނު ލިސްޓުގައި 25 މާކްސް ވެސް ބައެއް ފަރާތްތަކަށް ލިބުނު. މިއީ އުސޫލަށް ބެލުމެއް ނެތި ބައެއް އަދަދުތަކާ ކުޅެގެން ހަދާފައިވާ މާކުހެއް

- ވުޒާރާގެ ރައްދު: މާކްސް ދީފައި ވަނީ ކުރީގެ ސަރުކާރުގެ ކޮމިޓީގެ ގައިޑްލައިނާ އެއް ގޮތަށް އެޕްލިކަންޓް ހުށަހަޅާފައިވާ މައުލޫމާތަށް. އެޕްލިކެންޓް ދީފައިވާ މައުލޫމާތާ ހިލާފަށް ޕޮއިންޓް ދީފައިވާނަމަ އިސްލާހުކޮށްފައި ހުންނާނެ. ނުކުޅެދުންތެރިކަން ހުންނަ ދަރިއަކު ނެތް ކަމަށް މައުލުމާތު ދިން ނަމަވެސް އެ ކަމަށް ޕޮއިންޓް ދީފައިވާ ކަން ވެސް ފާހަގަވެފައިވޭ

5 - އެމްޑީޕީގެ ތުހުމަތު: ކުރިން ލިސްޓުގައި ހިމެނުނު މާލޭގެ ރަށްވެހިންގެ ތެރެއިން 316 މީހުން މިހާރު ލިސްޓުން އުނިކޮށްފައިވާ ކަމަށް. ކުރީގެ ސަރުކާރުން އެ ފަރާތުން މާލެ ފިޔަވައި އެހެން ތަނެއްގައި ދިރިއުޅުނު ކަން އެނގޭނެ ރަސްމީ ލިޔުމެއް ނެތް ނަމަ ބެލީ މާލޭގައި އުޅޭ ގޮތަށް 

- ވުޒާރާގެ ރައްދު: ކުރީގެ ސަރުކާރުގެ ގައިޑްލައިންގައި ބުނެފައިވަނީ އެމްޑީޕީގެ ޕްރެސް ކޮންފެރެންސްގައި އެ ބުނާ ގޮތަކަށް ނޫން. އޭގައި ބުނެފައި ވަނީ މާލޭގެ ރަށްވެއްސަކަށް ވާތާ 15 އަހަރުނުވާ ފަރާތެއްނަމަ، އެ ފަރާތަކީ މާލޭގައި ދިރިއުޅޭތާ 15 އަހަރު ވެފައިވާ ފަރާތެއް ކަމަށް ކަނޑައަޅާނީ ވެރިފަޔާ ވެރިފިކޭޝަން ނުވަތަ މާލޭގައި ދިރިއުޅެފައިވާ ކަމަށް ސާބިތުކޮށްދޭން ހުށަހަޅާ ލިޔުންތަކުން

------

ދެން އުފެދޭ ސުވާލަކީ ސަރުކާރުން އިދިކޮޅު އެމްޑީޕީއަށް މި ރައްދުކުރި ޖަވާބަށް އެމްޑީޕީން ދައްކާނީ ކޮން ވާހަކައެއް ތޯއެވެ.؟ މިފަދަ ދަނޑިވަޅެއްގައި އެމްޑީޕީން އެމީހުންގެ ޕާޓީގެ މީހުނަށް ދޭން އޮތް ޖަވާބަކީ ކޮބައިތޯއެވެ؟