ފާއިތުވެމިދިޔަ 24 ގަޑިއިރުތެރޭގައި އަހަރެމެންގެ ލޯތައް ތެންމާލައިފިއެވެ. މައިންބަފައިންނާއި އާއިލާތަކާއި ގާތް ރަހުމަތްތެރިންނާއި ކުދިބޮޑު އެންމެހާ ހިތްތައް ކުދިކުދިވެގެން ގޮއްސިއެވެ. ސޯސަލް މީޑިއާގައި ދައުރުވަމުންދާ ވީޑިއޯތަކުންނާއި ފޮޓޯތަކުންނާއި ހަބަރުތަކުން ހަމަނިދި ގެއްލުވާލައިފިއެވެ. ދައްކަނީ އެއްވާހަކައެކެވެ. ހޮޅުދޫ ބޯޓު (މާވަށު ބޯޓު) ގައި ރޯވެ، އަޑިއަށްދިޔަ ވާހަކައެވެ. އެ ބޯޓުގައި ރޯވެގެން ދިޔައިރު ސަލާމަތުގެ އައްސޭރިއަށް ނުފޯރާ އުޅެނިކޮށް ލ. މާވަށަށް ނިސްބަތްވާ 25 އަހަރުގެ ޒުވާން އަލީ މުޝްފިގް މުހައްމަދު ޝަރީފް ގެއްލިގެން އުޅޭ ވާހަކައެވެ. 

"ކުރިއަށް" މީޑިއާއިން ރެއިންސުރެ މި ކަމާމެދު މައުލޫމާތު ހޯދުމަށް އެކި ފަރާތްތަކަށް ގުޅީމެވެ. އަޑު އިވިގެންދިޔައީ އަސަރުގަދަ ވާހަކަތަކެކެވެ. ލ. މާވަށުގެ ރައްޔިތުންނާއި އެ ރަށުގެ ކައުންސިލްގެ ރައީސްވެސް ހުންނެވީ މާޔޫސްކަމެއްގެ ތެރޭގައެވެ. މިފަދަ ކަމެއް ދިމާވެދާނެ ކަމަށް އެއްވެސް މީހަކަށް އުންމީދުކުރެވިފައި ނޯންނާނެކަން ޔަގީނެވެ. ހޮޅުދޫ ބޯޓަކީ 2008 ވަނަ އަހަރު މާލެ ދަތުރުކުރަން ފެށި ބޯޓެކެވެ. މި ބޯޓަށް ހޮޅުދޫ ބޯޓު ކިޔަނީ އެއީ މާވަށު މީހަކު ހޮޅުދޫ މީހެއް އަތުން ކުއްޔަށް ނަގައިގެން ތ.އަތޮޅާއި މާލެއާ ދެމެދު ދުއްވާ ބޯޓަކަށްވީމައެވެ. އެ ބޯޓު އަނދައިގެންދިޔައިރު، އެ ބޯޓުގެ ހުންގާނުގައި ހުރީ، މާލެ ދަތުރުކުރުމުގައި ހަޔާތުގެ ބޮޑު ބައެއް ހޭދަކޮށްފައިވާ އަލީ އަހުމަދު (މުންޑު ކައްޕި)އެވެ. 

ހޮޅުދޫ ބޯޓުގައި އަނދަނީ

ލަނކުޑިން ނުވަތަ ފައިބަރުން ހަދާފައިވާ ބޯޓެއް ރޯވެ އަނދައިގެން ދެ ވަނަ ފަހަރަށް މަސައްކަތުން އެހެން ބޯޓެއް ބަނދެ ދަތުރުކުރަން ފެށިދާނެއެވެ. ނަމަވެސް ބޯޓުން ދަތުރުކުރި 18 މީހުންގެ ތެރެއިން ޒުވާން މުޝްފިގު މުހައްމަދު ޝަރީފް ގެއްލުމުގެ ހިތާމަ ފިލައި ނުދާނެއެވެ. މުޝްފިގަކީ، މަޔަކާއި ބަފައެއްގެ ހުރި ހަތަރު ކުދިންގެ ތެރެއިން ބޮޑަށް ހުރި ފިރިހެން ދަރިއެވެ. އޭނާ ގެއްލުމުން ލިބޭނެ ހިތާމައެއްގެ އަސަރު ކަނޑުވާނީ ކިހިނަކުން ހެއްޔެވެ؟

ހޮޅުދޫ ބޯޓު މާލެއަށް ދަތުރުފެށީ ތ. ކަނޑޫދޫއިން މުދާބަރުކޮށްގެން އެ އަތޮޅު ހިރިލަންދޫއިން މުދާ ބަރުކޮށްގެންނެވެ. އެ ބޯޓުގެ ފަޅުވެރިންގެ އިތުރުން ބޯޓުގައި ދެން ތިބީ މުޝްފިގާއި އޭނާގެ ފިރިހެން ކޮއްކޮ، މިންޝާވީ 23އ އެވެ. އެ މީހުން އޭގެން ދަތުރުކުރީ އީދު ބަންދަށް ފަހު، އެނބުރި މާލެ ދިއުމަށެވެ. ނަމަވެސް ނަގަމުންދާ ވިލާގަނޑު ބޮޑުމިން ރޭކާވެސް ނުލާނެތާއެވެ. އެއީ ހަޔާތުގެ އެންމެ ނާމާން އެއް ދަތުރަށްވެދާނެކަމަށް ހިޔާލަށްވެސް ނުގެންނާނެތާއެވެ. 

ހޮޅުދޫ ބޯޓުގައި އަނދަނީ

ހޮޅުދޫ ބޯޓު ހިރިލަންދޫއިން މުދާ ބަރުކޮށްގެން، މިސްރާބު ޖެހީ ސީދާ މާލެއަށެވެ. އެ ބޯޓުގައި ރޯވީ، ކަނޑޫދޫއާއި ވަންދޫއާ ދެމެދުގައި އޮންނަ ފަޅުރަށެއް ކަމަށްވާ ކަފިދޫ ކައިރިންނެވެ. ނަމަވެސް ފަހުން އެ ބޯޓު އޮޔާއެކު ވަނީ ކަނޑޫދޫއާ ގާތަށް ޖެހިފައެވެ. ހޮޅުދޫ ބޯޓުގައި ރޯވީ ރޭ 9:02 ހާއިރުއެވެ. ބޯޓުގައި ރޯވާކަށް މާ ގިނަ އިރުތަކެއް ނުނަގައެވެ. އަމާންކޮށް އޮތް ދަތުރު ބިރުވެރި ދަތުރަކަށް ބަދަލުވެގެންދާން ނެގީ އެންމެ ދެ މިނެޓު ކަމަށް ދޯނީގެ ކައްޕި ބުނެފައިވެއެވެ. 

ހޮޅުދޫ ބޯޓުގައި އަލިފާން ރޯވާން ދިމާވި ސީދާ ސަބަބެއް އެއްވެސް މީހަކަށް ނޭނގެއެވެ. ހުސް މަންޒަރު ދުތް މީހުންގެ ހިޔާލުތަކެވެ. އަލިފާނުގެ ހާދިސާ ހިނގަން ދިމާވެދާނެކަމަށް ލަފާކުރެވޭ ސަބަބުތަކެވެ. ބޯޓުން ދަތުރުކުރި މީހަކު ކިޔާދިންގޮތުގައި ބޯޓުގައި ތިން ސައިކަލާއި ޕެޓްރޯލް ފުޅިއެއްވެސް ހުއްޓެވެ. ބޯޓުން ދަތުރުކުރި އެންމެން އިއްތިފާގުވާ ގޮތުގައި ބޯޓުގައި ފުރަތަމަ ހުޅު ހިފީ ޖަނަރޭޓަރުގައެވެ. 

ބޯޓުގައި ހުޅު ހިފުމާއެކު މުންޑު ކައްޕި  ބޯޓުގެ ދުވެލި މަޑު ގިޔަރަށް ބަދަލުކޮށްލިއެވެ. ތިރިއަށް ކައްޕި ފޭބީ ތިރީގެ ހާލަތު ބަލާލާށެވެ. އޭރު އެވީ ކުޑަކުޑަ ވަގުތުކޮޅު ތެރޭގައި ބިރުވެރިކަމުގެ ތެރެއަށް ދާވަރަށް އަލިފާންގަނޑު އޮތީ ރޯވެފައެވެ. ހަދާނެގޮތް ހުސްވެފައި ހުރި ބޯޓުގެ ކައްޕި ދެން އަވަސްވީ ބޯޓުގައި ތިބި ދަތުރުވެރިންގެ ފުރާނަ ސަލާމަތްކުރެވޭތޯއެވެ. އަވަސް ފިޔަވަޅު ނަގާ ކައްޕި އެންގީ ބޯޓުގައި ތިބި މީހުން ދިރުނބާކޮޅަށް ގޮސް މޫދަށް ފުންމާލުމަށެވެ. ގިނަ މީހުން މޫދަށް ފުންމާލީ އެބަޔަކު އަތުގައި ޖެހުނު އެއްޗެއް ހިފައިގެންނެވެ. އެ ވަގުތު ބޯޓުގައި ހުރި މުޝްފިގް އާއި އޭނާގެ ކޮއްކޮ މިންޝާވީ ފުންމާލީ ކޮއްކޮ މިންޝާވީ ލައިފްޖެކެޓު އަޅައިގެން މުޝްފިގް ކޮއްކޮގެ ބުރަކަށި މަށްޗަށް ލައިގެންކަމަށް މާވަށު ކައުންސިލްގެ ރައީސްއަށް މިންޝާވީ ކިޔައިދީފައިވެއެވެ.

ބޭބެ ގެއްލުނީ މިންޝާވީގެ ލޯމަތިންނެވެ. ދެ މީހުން އެއްކޮށް ފުންމާލުމުން ދެ މީހުނަށް އެއްކޮށް ލޮނުބޮވި އަޑިއަށްދާން ފެށިކަމަށް މިންޝާވީ ކިޔައިދިނެވެ. އަސަރުން ފުރިގެންވާ ވަގުތުކޮޅެކެވެ. މޫދުގެ އެތަށް މިތާ މޫދަށް ފުއްމާލި މީހުނެވެ. މީހުން ތިބި ހިސާބަށް ޒުވާން މިންޝާވީ ކުރަމުން ގެންދިޔައީ އެތަކަށް މަސައްކަތްތަކެކެވެ. ބޭބެއަށް ދޫކޮށްނުލާށޭ ބާރަށް ހިފަހައްޓާށޭ ގޮވަމުން ދަނިކޮށް މީހުން ތިބި ފަޅިއަށް ދެވުމުގެ ކުރިން މިންޝާވީ އާއި މުޝްފިގު ވަކިވެއްޖެއެވެ. ޒުވާން މިންޝާވީގެ ލޯމަތިން ބޭބެ އެދިޔައީ ބީވެގެންނެވެ. އަޑިއަށް ދިޔަ މަންޒަރު ފެނުނެވެ. ދެންވީގޮތެއް ނޭނގުނެވެ.

މާވަށުން އެ ގެއްލުނީ އަލިގަދަ ތަރިއެއް ކަމަށް އެ ރަށު މީހުން ބުނެފައިވެއެވެ. އެއީ ގުރުއާނުން އަތޮޅުގެ ޗެމްޕިއަނެވެ. އިމާމުގެ ނަމާދުކުރާ ދީންވެރިއެކެވެ. މާވަށުގެ ފުރާވަރުގެ ކުދިންގެ "ރޯލް މޮޑެލް" އެވެ. މާވަށު ކައުންސިލްގެ ރައީސްވެސް މުޝްފިގު ސިފަކުރަނީ އެގޮތަށެވެ. ރަށަށް ރަން ވަނަތަނެއް ހޯދައިދީފައިވާ އެންމެންގެ ލޯބި ހޯދާފައިވާ މީހެއްގެ ގޮތުގައެވެ.

މުޝްފިގު ހޯދުމުގެ މަސައްކަތް ރެއިން ފެށިގެން ކެނޑި ނޭޅި އަންނަނީ ކުރަމުންނެވެ. އެމްއެންޑީއެފުގެ ކޯސްޓްގާޑް ޝިޕް ގާޒީ އާއި އެފްއައިސީ މާފަތް އަދި އެޗްޕީ 114، ޑައިވަރުންނާއި އެއާކޯގެ ޑްރޯން އަދި އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން ގުޅިގެން ކަނޑުމަތިންނާއި ޑައިވްކޮށްގެން އަދި ވައިގެ މަގުން މުޝްފިގް ހޯދުމުގެ މަސައްކަތުގައި އެންމެ ފިޔަވަޅެއްވެސް ފަހަތަކަށް ނުޖެހެއެވެ. އުންމީދަކާއެކު، މުޅި ސަރަހައްދު އަތްފުނާއަޅަނީއެވެ. "ކުރިއަށް" މީޑިއާގެ ދުއާއަކީ މުޝްފިގު ހެޔޮ ހާލުގައި ފެނުމެވެ.