ކޮންމެ އަހަރެއްގެ ވެސް މާޗް މަހުގެ މެދުތެރެއިން ފެށިގެން އޭޕްރީލް މަހުގެ ދުވަސްތައް ގުނަނީ އަހަރުގެ އެންމެ ހޫނު ގަދަ ދުވަސްތަކުގެ ގޮތުގަ އެވެ. މިއަހަރުގެ އެންމެ ހޫނުގަދަ ދުވަސްތަކާ ހަމައަށް އާދެވިފައިވާއިރު، މި ދުވަސްވަރު ދިމާވަނީ ރަމަޟާން މަހުގެ ދުވަސްތަކާ އެވެ. 

ރާއްޖެއަކީ އާންމު ގޮތެއްގައި ހޫނު ގައުމެއް ނަމަވެސް، 2020 ވަނަ އަހަރުން ފެށިގެން އަހަރުގެ ހޫނު ދުވަސްތަކުގައި، އާންމު ދިރިއުޅުމަށް އުނދަގޫވާ މިންވަރަށް ހޫނުމިން މައްޗަށް ދެ އެވެ. 

މޫސުމާ ބެހޭ ގައުމީ އިދާރާ (މެޓް އޮފީސް)އިން އިއްޔެ ރާއްޖޭގެ ބައެއް ހިސާބުތަކުގެ އިހުސާސްކުރެވޭ ފިނިހޫނުމިން 37 ޑިގްރީ ސެލްސިއަސްއަށްވުރެ މައްޗަށް ދިޔަ އެވެ. 

އިއްޔެ ރާއްޖޭގެ އެކި ހިސާބުތަކުގެ ހޫނުމިން ހުރި މިންވަރު:

އިއްުޔެ ރާއްޖޭގެ އެކި ހިސާބުތަކަށް ފިނިހޫނުމިން ހުރި މިންވަރަށް ބަލާއިރު، ހުޅުލޭގެ ފިނިހޫނު މިން 32.2 ޑިގްރީ ސެލްސިއަސްގައި ހުރިއިރު އިހުސާސް ކުރެވޭ ފިނިހޫނުމިން ހުރީ 37.2 ޑިގްރީ ސެލްސިއަސްގައެވެ. އުތުރުން ހދ. ހަނިމާދޫ ހަނިމާދޫގެ ފިނިހޫނު މިން 32.4 ޑިގްރީ ސެލްސިއަސްގައި ހުރިއިރު އިހުސާސް ކުރެވޭ ފިނިހޫނުމިން ހުރީ 36.9 ޑިގްރީ ސެލްސިއަސްގަ އެވެ.

ކާޑެއްދޫގެ ފިނިހޫނުމިން 31 ޑިގްރީ ސެލްސިއަސްގައި ހުރިއިރު، އިހުސާސް ކުރެވޭ ފިނިހޫނުމިން ހުރީ 36.6 ޑިގްރީ ސެލްސިއަސްގަ އެވެ. އައްޑޫސިޓީ ގަމާއި ލ. ކައްދޫގެ ފިނިހޫނުމިން 31 ޑިގްރީ ސެލްސިއަސްގައި ހުރިއިރު، އިހުސާސް ކުރެވޭ ފިނިހޫނުމިން ހުރީ 36.3 ޑިގްރީ ސެލްސިއަސްގަ އެވެ. 

ހޫނު ދުވަސްވަރު ސަމާލުވާންވީ ކަންކަން: 

• ރަނގަޅަށް ފެންބުއިން؛ މިއަހަރުގެ ހޫނު ދުވަސްތައް ދިމާވަނީ ރަމަޟާން މަހުގެ ދުވަސްތަކާ ކަމަށް ވުމުން، ރޯދަޔަށް ނުތިބޭ ވަގުތުތަކުގައި ރަނގަޅަށް ފެންބުއިމަކީ މުހިންމު ކަމެކެވެ. ހަށިގަނޑަށް ބޭނުންވާ މިންވަރަށް ފެންބުއިމަށް ސަމާލުކަން ދިނުމުގެ އިތުރުން، ރޭގަނޑުގެ ވަގުތުތަކުގައި ކެފެއިން ގިނަ ބުއިންތަކުން ދުރުހެލިވުން މުހިންމެވެ.
• އަލި ކުލަތަކުގެ އަންނައުނު އިހްތިޔާރުކުރުން؛ ކަޅުކުލަ އާއި އެހެނިހެން އަނދިރި ކުލަކުލައިގެ އަންނައުނު ލުމުން ހަށިގަނޑު ހޫނުވެ، ދާހިއްލުމާއި ވަރުބަލިވުން ފަދަ މައްސަލަތައް ދިމާވުން އެކަށީގެންވެ އެވެ. ހޫނު ދުވަސްތަކުގައި ބޭރަށް ނިކުންނަ ނަމަ ގަޔަށް ދޫކޮށް ހުންނަ އަލި ކުލަ ކުލައިގެ އަންނައުނު އިހްތިޔާރުކުރުން ބުއްދިވެރި އެވެ. 
• ހޫނުގަދަ ވަގުތުތަކުގައި ބޭރުގައި ނޫޅުން؛ އާންމުކޮށް ދުވަހުގެ އެންމެ ހޫނު ވަގުތުތަކަކީ މެންދުރު 11:00 އިން ހަވީރު 4:00 ދެމެދުގެ ވަގުތުތަކެވެ. މި ވަގުތުތަކުގައި ކޮންމެހެން ބޭރަށް ނުކުންނަން މަޖުބޫރު ނޫންނަމަ ގޭގައި ތިބުމަކީ ގަދަ ހޫނުން ސަލާމަތްވެ ތިބެވޭނެ ގޮތެކެވެ. 

• ސަންސްކްރީން، އައިނު އަދި ތޮފި؛ މި ދުވަސްވަރު މެންދުރުގެ ވަގުތުގައި ބޭރަށް ނުކުންނަ ނަމަ މި ތިނެތި ބޭނުންކުރުމަކީ ކޮންމެހެންވެސް މުހިންމު ކަމެކެވެ. މީގެ ތެރެއިން ސަންސްކްރީނަކީ ގަދަ ހޫނުގެ ސަބަބުން ހަންގަނޑު ފިހުމުން ރައްކާތެރިކޮށް، ހަމުގެ ކެންސަރަށް މަގުފަހިކޮށްދިނުމުން ދުރުކޮށްދޭނެ އެއްޗެކެވެ. ސަންސްކްރީން އިހްތިޔާރުކުރުން ރަނގަޅީ އެސްޕީއެފް 50 އަށްވުރެ މަތީގެ ބާވަތްތަކެވެ. 

• ހީޓް ސްޓްރެސްއަށް ސަމާލުވުން: ހޫނުގަދަ ދުވަސްވަރު ދިގުލައިގެން ދިއުމަކީ، ގަދަ ހޫނު ބަރުދާސްތުކުރުމަށް ހަށިގަނޑަށް ދަތިވެ، ހަށިގަނޑު ސްޓްރެސްކޮށްލާނެ ކަމެކެވެ. މީގެ ސަބަބުން ބޯ އެނބުރުމާއި، އާދަޔާ ހިލާފަށް ދާހިތްލުމާއި، ހަށިގަނޑުގެ ވަރުބަލިކޮށްލުން ފަދަ ހާލަތްތައް މެދުވެރިވެ އެވެ. މިފަދަ އަލާމާތެއް ފެނިއްޖެ ނަމަ، ހިޔަލަކަށް ނުވަތަ ފިނިތަކަށް ދިއުން އަދި ގޭގައި ނަމަ ފެންވަރާލައި ހަށިގަނޑު ފިނިކޮށްލުން މުހިންމެވެ. 

މަތީގައިވާ ކަންކަމަކީ ސިއްހަތަށް ޓަކައި ސަމާލުކަންދީ އެޅުން މުހިންމު ފިޔަވަޅުތައް ކަމަށްވާއިރު، މިކަންކަމުގެ އިތުރަށް ހޫނު ދުވަސްވަރަކީ އެންމެ ކަރަންޓު ބިލްތަކަށް ވެސް ބާރުބޮޑުވާ ދުވަސްވަރުކަން ހަނދާނުގައި ބެހެއްޓުމަކީ މުހިންމު ކަމެކެވެ.

މި ދުވަސްވަރު ބިލްތައް އަންތަރީސްވާ މިންވަރަށް މަތިވެގެން ދިޔަނުދިނުމަށް، ބޭނުން ނުކުރާ ވަގުތުތަކުގައި ކަރަންޓުން ހިންގާ އާލާތްތައް ނިއްވާލާފައި ބެހެއްޓުމާއި، އެއާ ކޮންޑިޝަނާގެ ފިނިމިން މާބޮޑަށް ދަށްކޮށްލާފައި ނުބެހެއްޓުން މުހިންމެވެ. މި ކަންކަމަށް ސަމާލުކަން ދީފި ނަމަ ހޫނު ދުވަސްތައް ނިމޭނީ ރަނގަޅު ސިއްހަތެއްގައި، ޖީބަށް ވެސް ބާރުބޮޑު ނުވާ ގޮތަށެވެ.