ތަފާތު ފޮޓޯ ނެގުމުގެ ހުނަރުވެރިންނާއި، ސޯޝަލް މީޑިއާއިން އާމްދަނީ ހޯދައިގެން އުޅޭ ގިނަ ބަޔަކު ތިބި މި ރާއްޖޭގައި އެތައް ފޮޓޯއެއް އަދި ވީޑިއޯއެއް އެކި ޕްލެޓްފޯމްތަކުން ކޮންމެ ދުވަހަކު ވެސް ފެނެ އެވެ. މިއިން ބައެއް ތަސްވީރުތަކަށް ލައިކެއް ދިނުމަށް ފަހު ދޫކޮށްލެވުނު ނަމަވެސް، އަނެއްބައި ތަސްވީރުތަކާ ބެހޭ ގޮތުން ކޮންމެވެސް އެއްޗެއް ބުނެލަން ހިތް މަޖުބޫރުކުރުވަ އެވެ. 

މަޝްހޫރު ފޮޓޯގްރާފަރު ނައުޝަމް ވަހީދު އަކީ މިގޮތަށް ސޯޝަލް މީޑިއާއަށް ދޫކޮށްލާ ތަސްވީރުތަކުން މީހުންގެ މެދުގައި މަގުބޫލުވެފައިވާ ހުނަރުވެރިއެކެވެ. އޭނާ ދޫކޮށްލާ ކޮންމެ ފޮޓޯއަކީ ވެސް އޭގެ ފަހަތުގައި މާނަތަކެއްވާ ޝައުގުވެރިކުރުވަނިވި އުފެއްދުމެކެވެ. މިއަދު ނައުޝަމްގެ ލެންސަށް އެރީ ވެސް ހަމަ މިބުނި ފަދަ ތަފާތު، މާނަފުން ހިތްގައިމު ތަސްވީރެކެވެ. 

ހިނގާބިނގައިވެ އުޅުމަށް ނުކުޅެދިފައިވާ އުމުރުން ދުވަސްވީ ފިރިހެނަކު އޭނާގެ އަންހެނުންނާ އެކު، ހަތަރު ފުރޮޅުލީ ބައިސްކަލެއްގައި ފަތިސް ނަމާދުން އަވަދިވެގެން ގެއަށްދާ މަންޒަރެެވެ. އުމުރުން ދުވަސްވެ ގައިބާރު ދެރަވެފައި ތިބި އެ ދެމަފިރިންގެ ފަނޑުނުވާ ލޯބި ފެންނަ ފަދަ އެވެ. އެކަކު އަނެކަކަށް ކުރާ އިހްތިރާމާއި، އޯގާތެރިކަން ވެސް އެ ފޮޓޯއިން ރަނގަޅަށް އެބަ ފެނެ އެވެ.

އެންމެ ފޮޓޯގަނޑަކުން ނައުޝާދު އެ ގެނެސްދިނީ، ރަމްޒުކޮށްދިނީ ލޯބީގެ ދިގު ވާހަކައެކެވެ. ދެ މީހަކު ލޯބިން ގުޅުނު ޒުވާން އުމުރުން ފެށިގެން ދޮށީ އުމުރާ ހަމައަށް ދެ ގޮތެއް ނުވެ ތިބި ކަން ބުނެދޭ، އެހެން އެންމެނަށް ލާމާސީލު ލޯބީގެ ވާހަކައެކެވެ. ކޮންމެ ހާލަތެއް މެދުވެރިވިޔަސް އެކުގައި ތިބޭނެ ކަމާއި، އެކުގައި ތިބުމުގެ ނަސީބު މެދުވެރިކޮށްދެއްވި ﷲ ތައާލާ ދެމަފިރިންގެ އޮތް ލޯބި ވެސް ދައްކައިދެ އެވެ.

"ފަތިސްނަމާދަށް ފަހު އެމީހުން ގެއަށް އެދަނީ އެކުގައި. އާ ހެނދުނަކަށް ޝުކުރުވެރިވެގެން، އަނެއްކާވެސް އާ ދަތުރަކަށް، އާ ވަގުތުތަކަށް" ނައުޝަމް މި ފޮޓޯ ދޫކޮށްލަމުން ކެޕްޝަންގައި ޖަހާފައި ވެއެވެ. 

ނައުޝަމް އޭނާގެ ފޮޓޯގްރަފީއަށް ހާއްސަ ޕޭޖަށް މި ފޮޓޯ ދޫކޮށްލިތާ ގާތްގަނޑަކަށް 15 ގަޑިރު ވެފައިވާއިރު، މިހާތަނަށް 800 އަށްވުރެ ގިނަ ރިއެކްޓް މި ފޮޓޯއަށް ލިބިފައި ވެއެވެ. 200 އަށްވުރެ ގިނަ މީހުން މި ފޮޓޯ ޝެއާކޮށްފައިވާއިރު، އަދި ސްޓޯރީތަކުގައި ވެސް މި ފޮޓޯ އަންނަނީ ދައުރުވަމުންނެވެ. 

އޭނާގެ ފޭސްބުކް ޕޭޖުން މުޅިން ވެސް ފެންނަނީ މިފަދަ ތަފާތު ތަސްވީރުތަކެވެ. އޭނާގެ ފޮޓޯތައް ބަލައިގަނެ، ކަމުދާ މީހުންނަށް ރަމަޟާން މަހުގެ ހެޔޮ އެދުންތައް ފޮނުވަމުން ވެސް ނައުޝަމް ހިއްސާކޮށްލީ ހަމަ މިފަދަ ރީތި ފޮޓޯއެކެވެ. ތެޅިގަލުން ރާނާފައިވާ ގެއެއްގެ އަސްކެނި ދޮށުގައި، އުމުރުން ދުވަސްވީ ދެމަފިރިއަކު ދޮންވެ ފައްކާވެފައިވާ ކަރައެއް ފަޅާލައިގެން ވަރަށް ހެވިފައި ތިބި ފޮޓޯއެކެވެ. އެ ކަރާ ފެނުމުން ރަމަޟާންމަހުގެ ހަނދާންތައް އާކުރުވަ އެވެ. އަދި އެ ދެމަފިރިންގެ ސާދާ ދިރިއުޅުމާއި އެ ހިނިތުންވުމުގައިވާ ސާފްކަން އިހްސާސްވެ އެވެ. 

މީގެ އަހަރުތަކެއް ކުރިން މުޅި ގައުމަށް ބަނަކަން ގެނުވި ގުދުރަތީ ކާރިސާ ސުނާމީއާ ގުޅުވައިގެން ނަގާފައިވާ ފޮޓޯތަަކަކީ ވެސް އޭގެ އަނެއް މިސާލެވެ. އެ ފޮޓޯތަކުގައި ފެންނަނީ އެތައް އުންމީދަކާ އެކު ބަޔަކު ބިނާކޮށް އުފާވެރި ރައްޔިތުންތަކެއް އުޅެމުން ދިޔަ ރ. ކަނދޮޅުދޫ އިން އަދިވެސް ފެންނަ ހިތްދަތި މަންޒަރުތަކެވެ. އެ ރަށުގައި މީހުން ދިރިއުޅުނުކަމުގެ ނިޝާންތަކެވެ. 

އެ ފޮޓޯތަކުން ރަށުގެ ހުކުރު މިސްކިތާއި، އޭރާ އަޅާ ބަލާއިރު ފެންވަރު ރަނގަޅުކޮށް ހަދާފައިވާ ސްކޫލާއި، އެތައް ޒަމާނަކުން މީހުން ދިރިއުޅުމަށް ބިނާކުރި ގެދޮރު ފެނުމުން އެ ހަނދާންތައް އާވެ ފެންކަޅިވެ އެވެ. 

ނައުޝަމްގެ ފޮޓޯތަކުގެ ވާހަކަ މިފަދަ ކުރު ލިއުމަކުން ބަޔާންކޮށްދޭން ވެސް ހަގީގަތުގައި ދައްޗެވެ. މި ނޫނަސް މިފަދަ ފާހަގަކޮށްލެވޭ އެތައް ފޮޓޯއެއް އޭނާ ވަނީ ނަގައިފަ އެވެ. ފަންނުވެރިކަމުގެ ރޮނގުން އޭނާ ކުރަނީ ފާހަގަކޮށްލެވޭ ހިތްގައިމު މަސައްކަތްތަކެކެވެ.

މި ފަހަރު ދޫކޮށްލީ، ލޯބީގެ ދަތުރުގައި ދެގޮތެއް ނުވި ހަޔާތެއް ވޭތުކުރަމުން ގޮސް މިއަދު އެކުއެކީ މުސްކުޅިވެފައިވާ ދެމަފިރިއްގެ ފޮޓޯއެކެވެ. އެއީ ހަމައެކަނި ފޮޓޯއެއް ނޫނެވެ. އެ ރަމްޒުކޮށްދިނީ ލޯބީގެ ދިގު ވާހަކައެކެވެ.