ދައުލަތުން މުސާރައަށް ކުރާ ހޭދަ އާދަޔާ ހިލާފަށް މަތިވަމުންދާ ކަން އެނގިއްޖެ އެވެ.

ކޮންމެ ސަރުކާރަކުން ވެސް، ޕާޓީގެ އެކްޓިވިސްޓުންނަށާއި ރައީސްގެ ތާއީދު ދެމެހެއްޓުމަށް ގިނަ އަދަދެއްގެ ސިޔާސީ ވަޒީފާ އުފައްދަ އެވެ. އަދި ސިވިލް ސާވިސްގެ މުވައްޒަފުން ވެސް ގިނަކޮށް މުސާރަތައް ވެސް ދަނީ ބޮޑުކުރަމުންނެވެ.

މައުލޫމާތު ހޯދުމާއި ލިބިގަތުމުގެ ގާނޫނުގެ ދަށުން، އާންމުންގެ ޖަމިއްޔާގެ މުއައްސިސް މިދުއަމް ސައުދު ވަނީ ފިނޭންސް މިނިސްޓްރީން މީގެ ތަފާސްހިސާބު ހޯދައިފަ އެވެ.

މިދިޔަ 10 އަހަރު ދައުލަތުން މުސާރައަށް ހޭދަކުރި ޖުމުލަ އަދަދުތައް:

• 2016 - 8.36 ބިލިއަން ރ.
• 2017 - 8.43 ބިލިއަން ރ.
• 2018 - 9.18 ބިލިއަން ރ.
• 2019 - 9.83 ބިލިއަން ރ.
• 2020 - 9.77 ބިލިއަން ރ.
• 2021 - 10.33 ބިލިއަން ރ.
• 2022 - 11.14 ބިލިއަން ރ.
• 2023 - 12.09 ބިލިއަން ރ.
• 2024 - 13.64 ބިލިއަން ރ.
• 2025 - 15.92 ބިލިއަން ރ.
• 2026 - 17 ބިލިއަން ރ. (ބަޖެޓް ކުރެވިފައިވާ)

މިއިން ދައްކައިދޭ ގޮތުގައި ކުރީގެ ރައީސް އިބްރާހިމް މުހައްމަދު ސޯލިހުގެ 5 އަހަރު މުސާރައަށް ޖުމުލަ 53.17 ބިލިއަން ރުފިޔާ ހޭދަކޮށްފައިވެ އެވެ. އަދި އޭރު ކޮންމެ އަހަރަކު އިތުރުވަމުން ދިޔައީ ބިލިއަނެއްހާ ރުފިޔާ އެވެ. އޭރު ވެސް ބަޖެޓުގެ ބޮޑު ބައި ދަނީ މި ކަމަށެވެ. 

ރައީސް ޑރ. މުހައްމަދު މުއިއްޒުގެ ވެރިކަމަށް މިވީ ތިން އަހަރު މުސާރައަށް 46.56 ބިލިއަން ރުފިޔާ ހޭދަވާނެ އެވެ. އެއީ ސޯލިހާ އަޅާބަލާއިރު މުޅި 5 އަހަރު ހޭދަކުރި ވަރާ ގާތްކުރާ އަދަދެކެވެ. އަދި މުއިއްޒު ވެރިކަމާ ހަވާލުވެވަޑައިގަތް ފަހުން އަހަރަކު ދެ ބިލިއަން އިތުރުވަމުން އެބަ ދެ އެވެ.