ހުޅުމާލެ ސެންޓްރަލް ޕާކުގައި މިދުވަސްކޮޅު ކުރިއަށްދާ ދިވެހިންގެ އުފެއްދުންތެރިކަމުގެ މައުރަޒު 2025 ގެ ތެރެއިން ގެނެސްދޭ "ބޮޑުބެރު ޗެލެންޖު" ގެ ފައިނަލަށް "1438" ގްރޫޕާއި ލ. އަތޮޅަށް ނިސްބަތްވާ "ރިދަމް" ގްރޫޕު ގޮސްފި އެވެ.

ބޮޑުބެރު ޗެލެންޖުގެ ފައިނަލަށް ދިޔުމަށް ހަމަޖެހިފައިވަނީ މުޅިއަކު ތިން ގްރޫޕެވެ. އޭގެ ތެރެއިން ދެ ގްރޫޕު ޖަޖުންގެ މާކްސް އިން ފައިނަލްގައި ޖާގަ ހޯދާއިރު، ތިންވަނަ ގްރޫޕު ހޮވަނީ ސަޕޯޓަރުންގެ ވޯޓުންނެވެ.

އެގޮތުން ޖަޖުންގެ މާކްސް އިން ފައިނަލަށް މިހާރު ގޮސްފައިވާ ދެ ގްރޫޕަކީ "ރިދަމް" އާއި "1438" އެވެ.

މި މުބާރާތުން މިހާތަނަށް ލިބިފައިވާ ނަތީޖާ އަށް ބަލާއިރު، އެންމެ ގިނަ މާކްސް ލިބިފައި ވަނީ 1438 އަށެވެ. އެ ގްރޫޕަށް މުޅިއަކު 506 މާކްސް ވަނީ ލިބިފަ އެވެ. ދެވަނަ އަށް އެންމެ ގިނަ މާކްސް ލިބިފައިވާ ރިދަމް ގްރޫޕަށް ލިބިފައި ވަނީ 483 މާކްސް އެވެ.

މި މުބާރާތުގައި ޖުމްލަ ހަ ޓީމަކުން ބައިވެރިވެފައިވެ އެވެ. އެއީ 1438 އާއި ރިދަމްގެ އިތުރުން، ހޭވައްލާ، ބެރު ގަބީލާ، ސަތޯރާ އަދި ކަވާސާ އެވެ.

ހޭވައްލާ ގްރޫޕަށް ލިބިފައި ވަނީ 475 މާކްސް އެވެ. ބެރު ގަބީލާ އަށް 405 މާކްސް ލިބުނު އިރު ސަތޯރާ އަށް ލިބިފައި ވަނީ 394 މާކްސް އެވެ. އަދި ކަވާސާ އަށް ލިބިފައި ވަނީ 376 މާކްސް އެވެ.