ބޭންކް އޮފް މޯލްޑިވްސް މެދުވެރިކޮށް ތަނަކަށް ފައިސާ ދައްކަން ޓްރާންސްފާކުރުން އޮންނަނީ އަބަދުހެން ބޮޑުކަމަކަށްވެފަ އެވެ. އުދަނގޫލީ ޓްރާންސްފާކުރާކަށް ނޫނެވެ. އެކަން ކުރަން އޮންނަ ޕްރޮސެސްގެ ދިގު ކަމުންނެވެ. އެކައުންޓު ނަންބަރު ޖަހައި އެއަށް ފަހު ފައިސާ ޓްރާންސްފާވިކަން ޔަގީންކުރަން ސްލިޕް ވައިބާ/ވަޓްސް އަޕް ވެސް ކުރަން ޖެހުން ވެފައި އޮންނަނީ އުދަނގޫ ކަމަކަށްވެފަ އެވެ. އެކަމަކު އެކަމަށް ބީއެމްއެލުން ވަނީ މިހާރު ނިމުމަކަށް ގެނެސްފަ އެވެ. އެއީ ބީއެމްއެލްގެ މޯބައިލް އެޕްލިކޭޝަން މެދުވެރިކޮށް ފައިސާ ޓްރާންސްފާކުރަން ކިއުއާރް ކޯޑް ބޭނުންކުރެވޭ ގޮތް ހަމަޖެހިގެން ދިޔުމުންނެވެ.

''އެންމެ ފަހުން ޓްރަފްސާ ސްލިޕް ވައިބާ ކްރުން ނިމުމަކަށް އައި'' ބީއެމްއެލްގެ ނިންމުމަށް މަރުހަބާ ކިޔަމުން މީހަކު ލިޔުނެވެ. އިތުރު މީހަކު ކުރި ޕޯސްޓެއްގައި ބުނީ ބީއެމްއެލްގެ މި ނިންމުމަކީ ވަރަށްވެސް ރަނގަޅު ނިންމުމެއް ކަމަށެވެ. 

''އަވަހަށް ވައިބާ އަންއިންސްޓޯލް ކުރަންވީ'' ބީއެމްއެލްގެ ނިންމުމަށް ތާއިދުކޮށް އެހެން މީހަކު ކުރި ޕޯސްޓެއްގައި ބުންޏެވެ. 

ބީއެމްއެލް އިން ރޭ ނެރުނު ނޫސްބަޔާނެއްގައި ބުނީ، ފަސޭހަ އަދި އަވަހަށް ޓްރާންސްފާ ކުރެވޭ ގޮތަށް "ޕޭއެމްވީ ކިއުއާރު"ގެ ހިދުމަތް މިހާރު ފަށާފައިވާ ކަމަށެވެ. އަދި އެ އަޕްޑޭޓް ފޯނުތަކަށް ވަރަށް އަވަހަށް ލިބޭނެ ކަމަށް ބީއެމްއެލުން ބުންޏެވެ.