އޭދަފުށިން ގޯލްޑަން ފުޓުސަލް ޗެލެންޖު އެއް ފަހަރު ކާމިޔާބުކޮށްފި އެވެ. އޭގެ ފަހުން މި އަހަރު ރަށްރަށުގެ މެދުގައި ބޮޑު ފުޓުބޯޅައިގެ ވާދަވެރިކަން ފެނުނު ގޯލްޑް ކަޕްގެ ފުރަތަމަ ޗެމްޕިއަނުންނަކީ އޭދަފުއްޓެވެ. "ބާ ބްރެޒިލް" ކަމަށް ބުނާ އޭދަފުއްޓަކީ އަބަދުވެސް ދިވެހި ފުޓުބޯޅައިގެ ރަސްގެފާނުންނޭ ބުނަން ހައްގެވެ.

މި ފަހުން ރަށަށް ލިބިފައިވާ ފަހު ދެ ކާމިޔާބީ ގުޅޭ އެކަކަކީ މިއީ އެވެ. އެ ދެ މުބާރާތުގައި ވެސް އޭދަފުށީގެ ދިފާއީ ބާރަކީ އެއީ އެވެ. އޭދަފުށި ކޮންމެ މީހަކު ވެސް މިއަދު ފަހުރުވެރިވާ، އެ ރަށުގެ ޝަރަފު، އަލީ އަޖުފާން އަމްޖަދު (25އ) ވެ. 'ކުރިއަށް މީޑިއާ" ގެ 'ކުރިއެރުން' ޕްރޮގްރާމްގައި ވާހަކަ ދައްކަމުން ބުނި ގޮތުގައި ފުޓުބޯޅައަކީ އެންމެ ކުޑައިރުން ފެށިގެން ވެސް އޭނާގެ ލޯތްބެވެ.

ސްކޫލް ދައުރުގައި ވެސް ގިނަ ވަގުތު ހޭދަކުރީ ފުޓުބޯޅަ ކުޅުމުގަ އެވެ. ސްކޫލްގެ ދައުރުގެ ދުވަސްތަކުގައި އެންމެ ހަނދާން ވަނީ ވެސް ފުޓުބޯޅަ ކުޅުމުގައި އެ ހޭދަކުރި ދުވަސްތަކެވެ. ގިނަ ވަގުތަކީ ފުޓުބޯޅަ ކުޅެން ހޭދަކުރި ވަގުތެވެ. 
 

"އިންޓޯލަށް ފަހު ވެސް ކުޅެން ދާނީ. ބްރޭކަށް ނުގޮސް ވެސް ކުޅެން ވަގަށް ދަން. ދެން މަންމަމެނަށް އެނގިގެން ބައެއް ދުވަސްދުވަހު އަންނާނެ ދަނޑު ދޮަށަށް ވެސް ބަލައި،" ސްކޫލް ދައުރުގެ ދުވަސްތަކުގެ ހަނދާންތައް އާކުރަމުން އަޖުފާން ބުންޏެވެ.

ޅައިރުގެ ދުވަސްތަކުން އޭނާގެ ހަނދާންތަކާ ދުރުނުވާ ތަނަކީ ވެސް އޭދަފުށީގެ ރުއްފަލެވެ. އެއީ ކުޅެން ގޮސް އުޅުނު ބިމެވެ. އެންމެ ހަނދާން ވަނީ ހުކުރު ދުވަހުގެ ކުޅުމެވެ. ހުކުރު ދުވަހު ހެނދުނު އިރާކޮޅުން ފެށިގެން ހުކުރު ގަޑި ގާތްވަން ދެން ކުޅޭނެ އެވެ. ހަވީރު ވެސް ކުޅޭނެ އެވެ. މުޅި ދުވަހަކީ ކުޅުމުގެ ދުވަހެކޭ ބުނެވިދާނެ އެވެ. 

އަޖުފާންގެ ވާހަކަތަކުން އެނގޭ ގޮތުގައި އޭދަފުށި ފަސްގަނޑުގައި އޮތް ފުޓުބޯޅަ ލޯބި ޖެހިފައިވާ ސަގާފަތުން އޭނަ ވެސް ސަލާމަތް ނުވީ އެވެ. އޭގެ ބަޔެއްގެ ތެރޭގައި އުޅެމުން އޭނަ ވެސް އެ ކަމުގެ ތެރެއަށް ވަދެވުނީ އެވެ.

ފުޓުބޯޅައަށް ވަދެވުނު ސަބަބު ސުވާލުކޮށްލުމުން ވެސް ފުރަތަމަ ދެއްކީ ހަމަ އޭދަފުށީގެ ވާހަކަ އެވެ. އޭދަފުށީގެ އެކި ހަނދާންތައް ބުނެދެމުން ގޮސް ދެން ބުނީ އޭނާގެ އެއްބަފާ ބޭބެ ޒިޔަޒަންގެ ވާހަކަ އެވެ. ފުޓުބޯޅަ ކެރިއަރެއް ފެށުމަށް ހިތް ޖެހުނީ ބޭބެގެ ސަބަބުންނެވެ. އޭދަފުށީގެ ސަބަބުން ފުޓުބޯޅައަށް ވަދެވުނު ނަމަވެސް ފުޓުބޯޅައަށް ލޯބި އުފެދުނީ ކީއްވެގެންތޯ ސުވާލުކޮށްލުމުން ޖަވާބަކަށް ވީ ބޭބެ އެވެ.

އިންޓަވިއުގެ އިތުރު ސުވާލުތަކާއި ޖަވާބު:

ސުވާލު: ފުޓުބޯޅަ ކެރިއަރު ފަށަން ބޭނުންވާ ޒުވާނުންނަށް ދޭން ބޭނުންވާ މެސެޖަކީ ކޮބައި؟

ޖަވާބު: މީތި ނަގާށޭ ސީރިއަސްކޮށް. ނުނިދާ، ނުކާ އުޅޭ ގޮތަށް ނޫޅޭށޭ. އެ ކަހަލަ ކަންކަން ވެސް ރަނގަޅުކޮށްގެން ކުރިއަށް ދެވޭނީ. ވަރަށް ސީރިއަސްކޮށް ނަގައިގެން، ކުޑަ ހިތްވަރެއް ކޮށްލީމަ މި ކަން ވާނެ.

ސުވާލު: ދާއިރާއަށް ކުރިމަތިވެފައި އޮތް އެންމެ ބޮޑު ގޮންޖެހުމަކީ ކޮބައި؟

ޖަވާބު: ފަސްޓް ޑިވިޝަން ނުފެށުން އެއީ. ރަސްމީ ފުޓުބޯޅަ ހުއްޓިފައި އޮތުން.

ސުވާލު: އަޖުފާނަށް ރާއްޖޭން މި ވަގުތު އެންމެ ކަމުދާ ފުޓުބޯޅަ ކުޅުންތެރިޔާ؟

ޖަވާބު: އޭދަފުށީގެ އިޝާން އިބްރާހީމް (ސައްޓޯ) އެއީ އެންމެ ފޭވަރިޓް. އެޓޭކް ވެސް ކުރާނެ، ޑިފެންޑް ވެސް ކުރާނެ. ހުރިހާ ކަމެއް ވެސް ކުރާނެ، ކޮންމެ ޕޮޒިޝަނަކަށް ވިޔަސް ކުޅޭނެ. 

ސުވާލު: ފުޓުބޯޅަ އިން ދުރުވާނެ ދުވަހެއް އަންނާނެތަ؟ ދެން އެންމެ ބޮޑަށް ކުރިއަށްދާން ބޭނުންވާ ދާއިރާއަކީ؟

ޖަވާބު: ފުޓުބޯޅަ ދުލެއް ނުކުރާނަން. ހަމަ މި ގޮތުގައި ހުންނާނަން.

ސުވާލު: ދާއިރާގައި އެންމެ ހިތާމަވި ދުވަހަކީ ކޮބައި؟

ޖަވާބު: ފުޓުސަލް މުބާރާތުގައި މައިލޯ ބަލިވާ ކޮންމެ ފަހަރަކީ ވަރަށް ދެރަވާ ދުވަހެއް. މައިލޯ ސިޓީއަކީ ހިތް ހަމަ. 

ސުވާލު: އެންމެ ބޮޑު ސަޕޯޓެއް ލިބެނީ ކާކުގެ ފަރާތުން؟

ޖަވާބު: އެންމެ ބޮޑު ސަޕޯޓަކީ މައިންބަފައިންނާއި އަނބިމީހާ ދެން އޭދަފުށީގެ ސަޕޯޓަރުން.