އިދިކޮޅު އެމްޑީޕީން މިދިޔަ ހުކުރު ދުވަހަގުރޭ މާލޭގައި ބޭއްވި ބޮޑު މުޒާހަރާގައި ބައިވެރިންނަށް އަނިޔާކުރި ކަމަށް ބުނާ ފުލުހެއްގެ ފޮޓޯ ސޯޝަލް މީޑިއާގައި ދަނީ ދައުރުވަމުންނެވެ. 

އޮފިސަރުގެ ފޮޓޯ ދައުރުވާން ފެށީ އެ ރޭގެ މުޒާހަރާގެ ބައިވެރިންނާ ދެކޮޅަށް ބާރުގަދަ އަޑު އިއްވާ "ސޮނިކް ވެޕަން" އެއް ކަމަށްވާ ލޯންގް ރޭންޖް އެކޯސްޓިކް ޑިވައިސް (އެލްއާރުއޭޑީ) ބޭނުންކުރުމުންނެވެ. 

ފޮޓޯ ދައުރުވާ މައްސަލަ ކުށްވެރިކޮށް ފުލުހުން ރޭ ނެރުނު ބަޔާނެއްގައި ބުނީ ގާނޫނު ތަންފީޒުކުރާ އިދާރާގެ މުވައްޒަފެއް، އޭނާގެ ރަސްމީ ވާޖިބު އަދާކުރުމަށް ހުރަސް އެޅުމުގެ ގޮތުން އެ އޮފިސަރަކަށް ނިސްބަތްކޮށް، އާންމު ރައްޔިތުންގެ މެދުގައި ވަކިވަކި އޮފިސަރުންނާއި އެއޮފިސަރުންގެ އާއިލާ އަށް ނަފްރަތު އުފެދޭގޮތަށާއި އެއޮފިސަރެއްގެ އާންމު ދިރިއުޅުމަށް ނޭދެވޭ އަސަރު ކުރާގޮތަށް އަދި އޭނާއަށް ބިރު ހީވާގޮތަށް އެއްވެސް އަމަލެއް ސޯޝަލް މީޑިއާގެ ވަސީލަތެއް މެދުވެރިކޮށް ނަމަވެސް، ހިންގައިފިނަމަ، އެފަދަ ފަރާތަކާމެދު އަޅަންޖެހޭ ގާނޫނީ ފިޔަވަޅު އަޅާނެ ކަމަށެވެ.

''ގާނޫނު ހިންގުމަށް ހުރަސް އެޅުމަށް ކުރާ އަމަލަކީ، މާއްދީގޮތުން ހުއްޓުވައިގެން އަދި އެނޫން ގޮތަކުން ހުރަސްތަކެއް ކުރިމަތިކުރުވައިގެން ކުރާ އަމަލަކުން ހުއްޓުވަން މަސައްކަތްކުރިނަމަވެސް، ގާނޫނީގޮތުން ފިޔަވަޅު އެޅޭނެކަންކަން ކަމުގައި ދަންނަވަމެވެ'' ފުލުހުންގެ ބަޔާނުގައި ބުންޏެވެ.

ފުލުހުން ނެރުނު ބަޔާނަށްވެސް ފާޑުކިޔުންތަކެއް އަމާޒުވެފައިވެ އެވެ.

އެކަމާއި ގުޅޭ ގޮތުން ކުރީގެ ބަންޑާރަ ނައިބު ޑރ. އަހްމަދު އަލީ ސަވާދު ވިދާޅުވީ ލާއިންސާނީ އަދަބު ދީ ޣައިރު ގާނޫނީ އަދަބު ދޭ ވަކިވަކި ފުލުހުންގެ ވާހަކަ ދެއްކުމަކީ ބިރުދެއްކުން ނޫން ކަމަށެވެ. އަދި އެ ވާހަކަތައް ދައްކަނީ ފުލުހުން ޒިންމާދާރު ކުރުވަން ކަމަށް ސަވާދު ވިދާޅުވި އެވެ.

''ލާއިންސާނީ އަދަބު ދީ ޣައިރު ގާނޫނީ އަދަބު ދޭ ވަކިވަކި ފުލުހުންގެ ވާހަކަ ދެއްކުމަކީ ބިރުދެއްކުން ނޫން ކަމަށާއި އެ ވާހަކަތައް ދައްކަނީ ފުލުހުން ޒިންމާދާރު ކުރުވަން ކަމަށް'' ސަވާދު އެކްސްގައި ކުރި ޕޯސްޓެއްގަިއ ވިދާޅުވި އެވެ.