އައްޑޫ ސިޓީ ކައުންސިލް އެއް ކައުންސިލެއްގެ ގޮތުގައި ބޭއްވުމުގެ ބަދަލުގައި ވަކިވަކި ރަށްރަށުގައި ކައުންސިލްތައް ގާއިމު ކުރުމާ ގުޅޭ ގޮތުން އާންމުންގެ ހިޔާލު ހޯދުމަށް ވޯޓެއް ނެގުމަށް ވަޒީރުންގެ މަޖިލީހުން އިއްޔެ ވަނީ ނިންމާފަ އެވެ.

ވަޒީރުންގެ މަޖިލީހުން ނިންމީ އައްޑޫ ފޭދޫ، އައްޑޫ ހުޅުދޫ އަދި އައްޑޫ މީދޫގެ ނަމުގައި ކައުންސިލްތައް އުފައްދަން ފެނޭތޯ ބެލުމަށް އައްޑޫ ސިޓީގެ ހުޅުދޫއާއި މީދޫއާއި ފޭދޫގެ ރައްޔިތުންގެ މެދުގައި އާންމު ވޯޓު ނެގުމަށް ނިންމަވައި، އައްޑޫ ހުޅުދުއާއި އައްޑޫ މީދޫ، އެއް ރަށު ކައުންސިލެއްގެ ދަށުން ހިންގުމަށްޓަކައި ދެ ރަށުގައި އެއް ކައުންސިލް (އައްޑޫ ހުޅުމީދޫ ކައުންސިލް) އުފައްދަން ފެނޭތޯ ބެލުމަށެވެ.

 އެ ވޯޓު މި ހިނގާ އޮކްޓޫބަރު މަހުގެ 24 ނުވަތަ 25 ގައި ނަގަން ނިންމާފައިވާއިރު އެކަމުގައި ހިޔާލުތައް ތަފާތެވެ.

ވަޒީރުންގެ މަޖިލީހުން އެ ނިންމުން ނިންމުމުގެ މާކުރިންވެސް އިދިކޮޅު އެމްޑީޕީއަށް ނިސްބަތްވެވަޑައިގަންނަވާ އައްޑޫގެ މޭޔަރު އަލީ ނިޒާރު ވަނީ އެކަމާއި ދެކޮޅު ހަދާފަ އެވެ. މީގެ މަހެއް ކުރިން "އެކްސް" ގައި ކުރި ޕޯސްޓެއްގައި ނިޒާރު ވިދާޅުވީ 2011 ވަނަ އަހަރު ކުރީގެ ރައީސް މުހައްމަދު ނަޝީދުގެ ސަރުކާރުގައި ސިޓީއެއްގެ ދަރަޖަ ލިބުނު އައްޑޫ އިދާރީ ގޮތުން ބައިބައިކޮއްލައި ނިކަމެތި ކޮށްލުމުގެ މަސައްކަތް ފަށާފައިވާ ކަމަށެވެ.

ނިޒާރު ވިދާޅުވީ ގޮތުގައި އައްޑޫ ސިޓީ އެއްގެ ގޮތުގައި އެ ކައުންސިލެއްގެ ގޮތުގައި އޮތުމަކީ ސިޔާސީ ގޮތުންނާއި އިޖްތިމާއީ ގޮތުންނާއި އަދި އިގްތިސާދީ ގޮތުންވެސް އެތަކެއް މަންފާ ލިބޭ މުހިންމު ކަމެކެވެ.

 އަދި އައްޑޫ ރުޅާލުމަށް ދައްކާ ވާހަކަތަކަކީ އިލްމީ ބަރުދަނެއް ނެތް ޖާހިލު ވާހަކަތަކެކެވެ. އެއީ އައްޑޫ ނިކަމެތި ކޮއްލަން ދައްކާ މަކަރުވެރި ވާހަކަތަކެކެވެ. އައްޑޫގެ ފަހުރުވެރި ނަންފޮހެވިގެންދާނެ ހިތާމަވެރި ހާލަތެކެވެ

ނިޒާރު ވިދާޅުވީ އައްޑޫ ސިޓީ ކައުންސިލު އެއް ކައުންސިލެއްގެ ގޮތުގައި މަސައްކަތްކުރާ ގޮތަށް ކަންކަންވެއްޖެ ނަމަ އެކަން ވެގެންދާނީ ޣައްދާރުންތަކެއ ކުރިކަމެއްގެ ގޮތުގައި ކަމަށެވެ.

މި ސަރުކާރުގެ ސިޔާސަތަށް ފާޑުކިޔަމުން އަންނަ އައްޑޫ މީދު ދާއިރާގެ މެންބަރު ވިދާޅުވާ ގޮތުގައި ވަޒީރުންގެ މަޖިލީހުގެ ނިންމުން ރަނގަޅެވެ. އެކަމަށްޓަކައި އޭނާ ވަނީ ސަރުކާރަށް ޝުކުރު އަދާކޮށްފަ އެވެ.

ވަޒީރުންގެ މަޖިލީހުގެ ނިންމުމާ ގުޅޭ ގޮތުން "އެކްސް" ގައި ކުރި ޕޯސްޓެއްގައި އައްޑޫގެ ކަންކަމުގައި ވަކާލާތުކުރާ އަމީރާ ވަޒީރުންގެ މަޖިލީހުން ނިންމި ނިންމުމުގައި މަރަދޫ-ފޭދޫ ނެތުމުން ސުވާލު އުފައްދާފަ އެވެ.