އާސަންދަ ކުންފުނިން ސިޔާސީ ޕާޓީތަކަށް މީހުންގެ ޒާތީ މައުލޫމާތުތައް ހިއްސާކުރާ މައްސަލަ ބޮޑުވެއްޖެ އެވެ. 

އައިޝާ ސިމް ނަމަކަށް ކިޔާ މީހަކު ފޭސްބުކް ގައި ކުރި ޕޯސްޓެއްގައި ބުނީ ނިޔާވެފައިވާ އޭނާގެ މަންމައާ ވާހަކަ ދައްކަން ބޭނުންވާ ކަމަށް ބުނެ މީހަކު ގުޅިކަމަށެވެ. 

''މަންމަގެ ނަންބަރު މީގެ ކުރިން އަހަރެން ވާނީ ބީއެމްއެލް އަދި އާސަންދައާ ހިއްސާކޮށްފައި'' މަންމައާ ގުޅޭ ގޮތުން ވާހަކައެއް ދައްކަން ބޭނުންނަމަ އެ ވާހަކަ އޭނާއާ ހިއްސާކުރަން ގުޅި މީހާ ގާތު ސިމް އެދުނެވެ. އެހެން ބުނުމުން އެ މީހާ ބުނީ އޭނާ ގުޅީ މާލެ ސިޓީގެ މޭޔަރު ކެމްޕޭނު އޮފީހުން ކަމަށެވެ.

''އަހަރެން ވަރަށް ބޮޑަށް ހިތްހަމަނުޖެހުނު، އަދި ނަންބަރު ހޯދީ ކިހިނެއްހޭ ވެސް އެހިން، ނަންބަރަކަށް ގުޅުމުގެ ކުރިން އެ ގުޅާ މީހާ އަކީ ދުނިޔޭގައި ހުރި މީހެއްތޯ ނުވަތަ ނޫންތޯ ބަލަން އެދުނިން'' ސިމް ބުންޏެވެ. 

އޭނާގެ މަންމަގެ ނަންބަރު 'ލީކް' ކޮށްލި އިދާރާތަކަށް އެއްވެސް އިތުބާރެއް ނެތް ކަމަށް ބުނެ ސިމް ކަންބޮޑުވުން ފާޅުކުރި އެވެ. 

ފޭޒޫ، ސޯޝަލް މީޑީއާގައި ކުރި ޕޯސްޓެއްގައި ބުނީ އެފަދަ ކަމެއް އޭނާއަށްވެސް ދިމާވި ކަމަށެވެ. ސިޔާސީ ޕާޓީތަކުން އޭނާގެ މަންމަ ކަމަށް ހީކޮށް އޭނާ އަށް ގުޅަމުންދާ ކަމަށެވެ. 

''އަހަރެންގެ ނަންބަރު ހިއްސާކޮށްފައިވަނީ އާސަންދައަށް އެކަނި. އާސަންދައިގެ ކޮންޓެކްޓް ޑޭޓާބޭސް ސިޔާސީ ޕާޓީތަކަށް ލިބެނީ ކިހިނެއް؟'' ފެޒޫ ބުންޏެވެ. 

'' އެހެން ގައުމުތަކުގައި މީހުންގެ ޒާތީ މައުލޫމާތު އިދާރާއަކުން ލީކްވެއްޖެ ނަމަ ލީކުކުރި ކާކުތޯ އަދި ލީކުކުރަނީ ކިހިނެއްތޯ ބަލައި މައްސަލަ ތަހުގީގުކުރާނެ އެކަމަކު ރާއްޖޭގައި އެކަން ދަނީ ކުރިއަށް'' ބޯހިޔާވަހިކަމުގެ ކަންކަމުގައި ވަކާލާތުކުރާ މިދުއަމް ސައުދު ލިޔުނު ޕޯސްޓެއްގައި ބުންޏެވެ.