ސަރުކާރުގެ ސްކޫލުތަކުގެ ދަރިވަރުންގެ ޔުނީފޯމް އުސޫލަށް ހުސްވި އަހަރުގެ ފަހުކޮޅު ވަނީ ބަދަލުތަކެއް ގެނެސްފަ އެވެ. އަންނަ ދިރާސީ އަހަރުން ފެށިގެން އެ އޫސޫލަށް އަމަލުކުރަން ނިންމާފައިވާއިރު ޔުނީފޯމަށް ބަދަލު ގެނައުމަކީ ހަރަދުތައް ބޮޑުވާނެ ކަމެއް ކަމަށް އައި ވާހަކަ ދެކެވެމުންނެވެ. އެގޮތުން ކުރީގެ ރައީސް މުހައްމަދު ނަޝީދުވެސް ވަނީ އެކަން ފާހަގަކުރައްވާފަ އެވެ. 

އާ ޔުނީފޯމަށް ކުރަން ޖެހޭ ހޭދަ ބޮޑުކަން، ބެލެނިވެރިއަކު ''އެކްސް'' ގައި ކުރި ޕޯސްޓަކުން އެކަނިވެސް އެނގެ އެވެ. 

ނިޝާރް އިބްރާހިމް ނަމަކަށް ކިޔާ މީހަކު ''އެކްސް'' ގައި ވަނީ ދަރިވަރުންގެ ސްކޫލު ޔުނީފޯމް ސެޓެއްގެ ބިލު ހިއްސާކޮށްފަ އެވެ. އެ ބިލުގައިވާ ގޮތުން ޔުނީފޯމް ސެޓަކަށް 617 ރުފިޔާ ހޭދަވެ އެވެ. 

''ޔުނީފޯމު ސެޓެއްގެ އަގު 600 ރުފިޔާ، އެވްރޭޖް އާމްދަނީ އެއް ލިބޭ (3 ނުވަތަ 4) ކުދިން ތިބޭ އާއިލާއަކުން އެމީހުންގެ ދަރިންނަށް ތައުލީމު ފޯރުކޮށްދިނުމަށް ތަހައްމަލު ކުރަން ބުރައާމެދު ވިސްނާލާ، ކޮންމެ ކަމެއްވެސް އޮންނަނީ ވިޔަފާރިތަކުން ރައްޔިތުންނަށް ފައިދާވާ ގޮތަށް'' އޭނާ ބުންޏެވެ.

ނިޝާރުގެ ޕޯސްޓަށް ރިޕްލައި ކުރި މީހަކު ޔުނީފޯމުގެ ކަންކަމުގައި ސުވާލު އުފައްދައި ބުނީ ޔުނީފޯމަށްވެސް  ސަރުކާރުން ފައިސާ ދައްކާނެ ކަަމަށް އުއްމީދު ކުރަނީތޯ އެވެ. 
 

އޭގެ ޖަވާބުގައި ނިޝާރު ބުނީ އޭނާގެ ޕޯސްޓުގެ މަގްސަދަކީ ޔުނީފޯމު ސަބްސިޑައިޒް ކުރުމެއް ނޫން ކަމަށެވެ. އެކަމަކު ޕޯސްޓުން ދޭން ބޭނުންވާ މެސެޖަކީ ރާއްޖޭގައި ތަކެތީގެ އަގު ބޮޑު ވާހަކަ ކަމަށެވެ.