''މޯލްޑިވްސް ޕޮޕިއުލޭޝަން ޕްރޮޖެކްޝަން 2022-2062'' ރިޕޯޓުގައިވާ ގޮތުން 2022 ވަނަ އަހަރު ރާއްޖޭގެ އާބާދީ އަކީ 547،651 މީހުންވާއިރު އޭގެ ތެރޭގައި ހިމެނެނީ 381،436 ދިވެހިންނާއި 166،215 ބިދޭސީންނެވެ. އަންދާޒާތައް ދައްކާ ގޮތުން 2062 ވަނަ އަހަރު އަންނައިރު ރާއްޖޭގެ އާބާދީ 678،024 އަށް އަރާނެ އެވެ. 

މީގެ ކުރިން (2014-2022) އާބާދީ ހުރީ އެވްރެޖްކޮށް 2.3 އިންސައްތާގަ އެވެ. އަންދާޒާތައް ދައްކާގޮތުން 2044 ވަނަ އަހަރާއި 2062 ވަނަ އަހަރު ދެމެދު ރާއްޖޭގެ މުސްކުޅި އާބާދީ ބޮޑުތަނުން އިތުރުވާނެ އެވެ. 2062 ވަނަ އަހަރު އަންނައިރު ރާއްޖޭގައި ކޮންމެ ހަތަރު މީހަކުން އެކަކަށް އުމުރަކީ 65 އަހަރުން މަތީގެ މީހެކެވެ. 

މިހާރުގެ އަންދާޒާތަކުން ދައްކާ ގޮތުގައި 2050 ވަނަ އަހަރު އަންނައިރު ވަޒީފާ އަދާކުރާ އުމުރުގެ 454،000 މީހުން (20-64 އަހަރާ ދެމެދުގެ މީހުން) ތިބޭނެ އެވެ. ބޭރު މަސައްކަތްތެރިންގެ އަދަދު މިއަދާ އެއްގޮތަށް ދެމި އޮތްނަމަ، ވަޒީފާ އަދާކުރާ އުމުރުގެ އާބާދީ 389،000 އަށް އަރާނެ އެވެ. ބޭރު މީހުން ނުތިބޭނަމަ، ވަޒީފާ އަދާކުރާ އުމުރުގެ އާބާދީ 261،000 އަށް ވެއްޓޭނެ އެވެ.

2050 ވަނަ އަހަރު ލޭބާ ފޯސް 261،000 އާއި 454،000 އާ ދެމެދުގެ އަދަދަކަށް ހުންނާނެ އެވެ. އެހެން ކަމުން ބަދަލުވަމުންދާ ހާލަތްތަކަށް ގައުމު އަހުލުވެރި ކުރުމަށް ފްލެކްސިބަލް ޕޮލިސީތައް ގެންނަން ޖެހެ އެވެ. އެ ރިޕޯޓުގައިވާ ގޮތުން ކުރިއަށް އޮތް ތަނުގައި އާބާދީ އަށް އަންނަ ބަދަލުތަކަށް ރާއްޖެއިން ހަރުދަނާ ފިޔަވަޅުތަކެއް އަޅަން ޖެހޭނެ އެވެ. އެގޮތުން ޕެންޝަން، ހެލްތުކެއާ އަދި އާބަން ޕްލޭނިން ފަދަ ކަންކަން ހިންގުމާ ހަވާލުވެ ތިބޭ މުއައްސަސާތައް ހަރުދަނާ ކުރުން މުހިއްމެވެ.

އަންދާޒާތައް ދައްކާ ގޮތުން ކުރިއަށް އޮތް އަހަރުތަކުގައި މާލޭގެ އާބާދީ 54 ޕަސެންޓަށް އިތުރުވެ، 90،000 އަށް ވުރެ ގިނަ މީހުން އިތުރުވާނެ ކަމަށް ވަނީ ލަފާކޮށްފަ އެވެ. އަތޮޅުތަކުން މީހުން ބަދަލުވުމުން، ވަޒީފާތަކާއި ފުރުސަތުތައް މަދުވުމުގެ ސަބަބުން މާލެ ފިޔަވައި އެހެން ހިސާބުތަކުގެ އާބާދީ 30 ޕަސެންޓަށް ދަށްވާނެ ކަމަށް ލަފާކޮށްފައިވެ އެވެ.

ސަރުކާރުގެ ސިޔާސަތުތަކަކީ ހަގީގީ އާބާދީއަށް އަންނަ ބަދަލުތައް ދައްކުވައިދޭ އަދި އާ ޓްރެންޑަށް އިޖާބަ ދިނުމަށްޓަކައި އެންމެ ރަނގަޅު އަދި މިހާރުގެ ޑޭޓާ ބޭނުންތެރި އެއްޗަކަށްވާއިރު، އޭގެ ތެރޭގައި އުފަންވުމާއި މަރުވުމާއި ހިޖުރަކުރާ މީހުންގެ އެންމެ ފަހުގެ މައުލޫމާތުތައް އަޕްޑޭޓް ކުރުން މުހިއްމު އެވެ.

ބޭރުގެ މަސައްކަތްތެރިންގެ ޕްލޭންގައި ފަތުރުވެރިކަމާއި ގުޅުންހުރި ސިނާއަތްތަކަށް އަންނާނެ ކަމަށް ލަފާކުރެވޭ ބަދަލުތަކަށް ބަލައި، އިކޮނޮމިކް ޕްލޭނަރުންނާއި ހައުސިން އޮތޯރިޓީތަކާ ދެމެދު އޮންނަ ގުޅުން އިތުރަށް ހަރުދަނާ ކުރުމަށް ތަފާތު ސިނާރިއޯތަކަށް ރިއާޔަތް ކުރަން ޖެހޭނެ ކަމަށް ރިޕޯޓުގައިވެ އެވެ.