އިންޑިއާގެ "ބެޓްލް އޮފް ބޭންޑްސް އިންޓަނޭޝަނަލް"ގައި ދެއްކި ހުނަރުވެރި ހުށަހެޅުންތަކާ އެކު މަގުބޫލުކަން ލިބުނު 'ޓޫ އޮފް އަސް' ބޭންޑް އިން މުހައްމަދު ނަސޫހް ވަކިވެއްޖެ އެވެ.

އެކި ގައުމުތަކުގެ ކޮންސެޓްތަކުގައި ޕާފޯމް ކުރުމަށް ވޯލްޑް ޓުއާއެއް ފެށުމަށް އެ ބޭންޑްއިން އަންނަނީ ތައްޔާރުވަމުންނެވެ. ފުރަތަމަ މެލޭޝިއާގައި އޮންނަ ކޮންސެޓަށެވެ.

އެ ބޭންޑްއިން ނެރުނު ބަޔާނުގައި ބުނީ މެލޭޝިއާގެ ކޮންސެޓް ހިމެނޭ ގޮތަށް އެ ބޭންޑްގެ ޓުއާގައި ނަސޫހު ނުފެންނާނެ ކަމަށެވެ.

އެ ބޭންޑްއާ ނަސޫހް ވަކިވެ، ވަކިން މިއުޒިކް ކެރިއަރު ކުރިއަށް ގެންދަން އޭނާއާއި ޓޫ އޮފް އަސް ބޭންޑްއަށް އެއްބަަސްވެވި، އެ ނިންމުމަށް އިހުތިރާމު ދީފައިވާ ކަމަށް ޓޫ އޮފް އަސް ބޭންޑް އިން ބުންޏެވެ.

 

ޓޫ އޮފް އަސްގެ ބަޔާނުގައި އެ ބޭންޑްގެ ލީޑު ވޮކަލިސްޓް އަދުހަމްގެ ބަހެއް ވެސް ހިމަނާފައިވެ އެވެ. އަދުހަމް ބުނި ގޮތުގައި ނަސޫހަކީ ރާއްޖޭގައި ހުރި އެންމެ ހުނަރުވެރި އެންމެ މޮޅު އެއް ވޮކަލިސްޓެވެ.

އެ ބޭންޑްއާ ވަކިން ނަސޫހްގެ ކެރިއަރު ކުރިއަށް ގެންދަން ނިންމި ނަމަވެސް އޭނާ އަބަދުވެސް ވާނީ ޓޫ އޮފް އަސްގެ އާއިލީ މެންބަރަކަށް ކަމަށް އަދުހަމް ބުނެފައިވެ އެވެ.