ހުޅުމާލެ ސެންޓްރަލް ޕާކުގައި މިދުވަސްކޮޅު ކުރިއަށްދާ ދިވެހިންގެ އުފެއްދުންތެރިކަމުގެ މައުރަޒު 2025 ގެ ތެރެއިން ގެނެސްދޭ "ބޮޑުބެރު ޗެލެންޖުން "1438" ކާމިޔާބުކޮށްފިއެވެ.

އެއްވަނަ ޓީމަށް 1438 ހޮވުމުން އިނާމުގެ ގޮތުގައި 75,000 ރުފިޔާ ވަނީ ހަވާލުކޮށްފަ އެވެ.

ދެވަނައަށް ދިޔައީ ހޭވައްލާ އެވެ. ދެވަނައަށް ދިޔަ ޓީމުގެ އިނާމަކީ 50,000 ރުފިޔާ އެވެ.

އެންމެ މަގުބޫލު ބޮޑުބެރު ގުރޫޕަށް ވެސް ހޮވުނީ ހޭވައްލާ އެވެ. ހޭވައްލާއަށް 47,790 ވޯޓެވެ.

ތިންވަނައަށް ދިޔައީ ރިދަމް ބޮޑުބެރު ގްރޫޕެވެ. ތިންވަނައިގެ އިނާމަކީ 25,000 ރުފިޔާ އެވެ.

ބޮޑުބެރު ޗެލެންޖުގެ ފައިނަލަށް ދިޔައީ މުޅިއަކު ތިން ގްރޫޕެވެ.

އޭގެ ތެރެއިން ދެ ގްރޫޕު ފައިނަލަށް ދިޔައީ ޖަޖުންގެ މާކްސް އިންނެވެ. އެ ދެ ގްރޫޕަކީ "ރިދަމް" އާއި "1438" އެވެ. ތިންވަނަ ގްރޫޕުން ހޮވީ ސަޕޯޓަރުންގެ ވޯޓުންނެވެ. އެއީ "ހޭވައްލާ" އެވެ.

މި މުބާރާތުގައި ޖުމްލަ ހަ ޓީމަކުން ބައިވެރިވެފައިވެ އެވެ. އެއީ 1438 އާއި ރިދަމްގެ އިތުރުން، ހޭވައްލާ، ބެރު ގަބީލާ، ސަތޯރާ އަދި ކަވާސާ އެވެ.

1438 ބޮޑުބެރު ގުރޫޕަކީ ދިވެހިންގެ މެދުގައި މަޝްހޫރު ބޮޑުބެރު ގުރޫޕެކެވެ.