ރޯޔަލް އައިލެންޑް ރިސޯޓުގައި ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމްއާއި އުއްތަމަ ފަނޑިޔާރު، މުއުތަސިމް އަދުނާނުގެ އިތުރުން ބައެއް ފަރާތްތަކުން ސިއްރު ބައްދަލުވުމެއް ބޭއްވި ކަމަށް ބުނެ ދެކެވޭ ވާހަކަތައް އެ ރިސޯޓުގެ ވެރިޔާ، އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމް ދޮގުކުރައްވައިފިއެވެ.

ސްޕްރީމް ކޯޓުގެ ފަނޑިޔާރުންގެ ބެންޗަށް ބަދަލު ގެނައުމާ ގުޅޭ މަޝްރާތަކެއް މަޖިލީހުގެ ނައިބު ރައީސް ނާޒިމްއާއި މަޖިލީހުގެ ކުރީގެ ރައީސް މުހައްމަދު ޝިހާބާއި އުއްތަމަ ފަނޑިޔާރު، މުއުތަސިމް އަދުނާން ހިމެނޭހެން، ބައެއް އިސް ފަރާތްތަކުން ރޯޔަލް އައިލެންޑުގައި މިދިޔަ ޖެނުއަރީ މަހުގެ ތެރޭގައި ކުރިއަށްގެންދިޔަ ކަމަށް ބުނެ އޮންލައިން ސައިޓެއް ކަމަށްވާ "ދިޔަވަރު" ގައި ޝާއިއުކޮށްފައިވާ ލިޔުމަކާ ގުޅިގެން މާމިގިލީ ދާއިރާގެ މެންބަރުކަންވެސް ކުރައްވާ ގާސިމް އެކްސްގައި މިރޭ ވިދާޅުވީ، އޭނާ އެންމެ ފަހުން ރޯޔަލް އައިލެންޑަށް ގޮސްފައިވަނީ 2022 ވަނަ އަހަރުގެ ފެބްރުއަރީ މަހުގެ ފަސް ވަނަ ދުވަހު ކަމަށެވެ. އެއީ ށ ކޮމަންޑޫ ދާއިރާގެ ބައި- އިލެކްޝަނާ ގުޅިގެން ކުރެއްވި ދަތުރެއް ކަމަށް ގާސިމް ވިދާޅުވިއެވެ.

ގާސިމް ވިދާޅުވީ، "ދިޔަވަރު" ގެ ލިޔުމުގައިވާ އެއްވެސް ފަރާތެއް މިދިޔަ އަހަރު އަދި މި އަހަރުވެސް ރޯޔަލް އައިލެންޑަށް ގޮސްފައި ނުވާ ކަމަށެވެ. 

"މިއީ އެއްވެސް ހަގީގަތެއް ނެތް، ހަމަ ބުހުތާން ވާހަކަތަކެއް. މި ފަދަ ލިޔުންތައް ލިޔެ ޝާއިއުކުރާ މީހުންނަކީ މުޖުތަމައު ފަސާދަ ކުރުމުގެ ބޭނުމުގައި މިފަދަ އަމަލުތައް ތަކުރާރުކޮށް ކުރާ ބައެއް،" ގާސިމް ވިދާޅުވިއެވެ.

ގާސިމް ވަނީ، ރައްޔިތުންގެ މެދުގައި ފިތުނަ އުފެދޭ ގޮތަށް، ސިޔާސީ ބޭނުމުގައި އޮންލައިން ނޫސްތަކުގައި ފަތުރާ ދޮގު ވާހަކަތައް ބަލައި ފިޔަވަޅު އަޅަން ކަމާ ބެހޭ ފަރާތްތަކަށް ގޮވާލައްވައިފައެވެ. 

"ނޫސްވެރިކަމާއި ހިޔާލު ފާޅުކުރުމުގެ މިނިވަންކަމަކީ، ހަގީގަތެއް ނެތް ދޮގު ވާހަކަ ފަތުރާ ސިޔާސީ މަގުސަދުތައް ހާސިލުކުރުމުގެ ބޭނުމުގައި މުޖުތަމައު ފަސާދަކުރުމަށް އޮތް ލައިސަންސެއް ނޫން،" ގާސިމް ވިދާޅުވިއެވެ.

ގާއިމް އިތުރަށް ވިދާޅުވީ، އެ ފަދަ ދޮގު ހަބަރުތައް ފަތުރާ ފަރާތްތަކާމެދު ގާނޫނީ ފިޔަވަޅު އެޅިގެން ނޫން ގޮތަކަށް އެކަންކަމަށް ހުއްޓުމެއް ނާންނާނެ ކަމަށެވެ.